ქუთაისში, გორში, ლანჩხუთსა და თბილისში დღეს, ქალთა ლიგის 2022 წლის სეზონის მეორე ტურის შეხვედრები გაიმართა. ამ ტურში, 17 გოლი გავიდა. ორი ტურის შემდეგ კი, სამი გუნდი ქულების მაქსიმუმით ლიდერობს. 

„დინამო“ სოხუმი - „კოლხეთი“ ხობი 3-2

თბილისში, სფფ-ს ნუცუბიძის პლატოს საფეხბურთო კომპლექსში, სოხუმის „დინამო“ ხობის „კოლხეთს“ დაუპირისპირდა. ანგარიში, მე-2 წუთზე, ავტოგოლით მასპინძლებმა გახსნეს. სოხუმი დინამოელმა ნათია სხირტლაძემ, მხოლოდ შეხვედრის პირველი ტაიმისთვის კომპენსირებულ დროში მოახერხა ანგარიშის გათანაბრება. თამაში გარდამავალი უპირატესობით მიმდინარეობდა და ეს, ანგარიშშიც აისახებოდა. მეორე ტაიმში, 67-ე წუთზე, სოხუმელები დაწინაურდნენ ლელა ჭიჭინაძის გოლით. 69-ე წუთზე, 11-მეტრიანით ანა წულაიამ წონასწორობა აღადგინა. 76-ე წუთზე ნათია სხირტლაძემ დუბლი გაიფორმა, სოხუმის „დინამომ“ კი, ამ გოლის წყალობით, მიმდინარე გათამაშებაში, მეორე გამარჯვება ჩაიწერა. 

„გორი იუნაიტედი“ – „ნორჩი დინამო“ 0-4

გორის „პარკი არენაზე“ თანაბარი პირველი ტაიმის შემდეგ, რომელშიც ერთი გოლი, 32-ე წუთზე, მარიამ რომანჩუკმა გაიტანა, ცოტა თუ მოელოდა, რომ სტუმრები, მეორე ტაიმში კიდევ სამ გოლს გაიტანდნენ.  52-ე წუთზე რომანჩუკმა, დუბლი გაიფორმა, 82-ე წუთზე კი, ჰეთ-თრიქიც მიითვალა. მანამდე კი, ნორჩდინამოელთაგან 79-ე წუთზე, მასპინძლეთა კარი ელენე კახნიაშვილმა აიღო. „ნორჩმა დინამომ“, ახალ ჩემპიონატში, პირველი გამარჯვება მოიპოვა. 

„ლანჩხუთი“ – „კვარტალი“ 3-0

ლანჩხუთში, ევგრაფი შევარდნაძის სახელობის სტადიონზე, ქვეყნის მოქმედმა ჩემპიონმა „ლანჩხუთმა“, თბილისის „კვარტალი“ მიიღო და ანგარიშით 3-0 დაამარცხა. გურულებში გადაბარგებულმა ეთერ სულაშვილმა, ამ შეხვედრაშიც მოახერხა გოლის გატანა. ეთერმა ამჯერად 25-ე და 65-ე წუთებზე აიღო მეტოქის კარი და ორი ტურის შემდეგ 5 გოლით ბომბარდირთა სიას ჩაუდგა სათავეში. 82-ე წუთზე, მორიგი გოლი, მეორე მატჩში ზედიზედ, გაიტანა მეგი გოცირიძემაც. 

„მართვე“ – „სამეგრელო“ 0-5

ტურის ბოლო შეხვედრა ქუთაისში, „ტორპედოს“ ბაზაზე ჩატარდა. „სამეგრელომ“, პირველივე ტაიმში გადაწყვიტა მატჩის ბედი, რამეთუ, სათამაშო უპირატესობის გარდა, მასპინძელთა კარის აღება სამჯერ მოახერხა. ანგარიში, მე-15 წუთზე თამრიკო სალუქვაძემ გახსნა და მიმდინარე გათამაშებაში, უკვე მეოთხე გოლი ჩაიწერა აქტივში. მე-17 წუთზე ანგარიში ორამდე მაიკო ბებიამ გაზარდა და შეხვედრის მიწურულს დუბლიც გაიფორმა. მასაც, სალუქვაძის მსგავსად, ორი ტურის შემდეგ, უკვე 4 გატანილი გოლი აქვს. დღევანდელ შეხვედრაში კი, თითო გოლი ნინო ბუხრიკიძემ (23’) და სვეტლანა კოლკამ (49’) გაიტანეს. 

ქალთა ლიგის ახალი სეზონის მესამე ტური 14 მაისს გაიმართება. მიმდინარე სეზონში, ახალი ვებ-გვერდი - womensleague.ge  ამოქმედდა, სადაც ქალთა  საფეხბურთო ჩემპიონატის (როგორც ქალთა ლიგის ასევე, ქალთა ლიგა 2-ისა და ქალთა თასის გათამაშების) შესახებ ინფორმაციას იხილავთ.