ახალი ამბები

ქალთა ლიგა 2 დაიწყო

დღეს, 15 მაისს, საქართველოს ხუთ ქალაქში, სტარტი აიღო ქალთა ლიგა 2-ის გათამაშებამ. აღნიშნულ ლიგაში ქალთა 11 გუნდი მონაწილეობს. შესაბამისად, ყველა ტურში თითო გუნდი დაისვენებს. პირველ ტურში ასეთი, ზუგდიდის „ფენიქსი“ იყო.

„ელიტა“ – „დინამო 2“ სოხუმი 1-2

თბილისში, სფფ-ს ვარკეთილის ცენტრში, ერთმანეთს ქალთა ლიგის გათამაშების დებიუტანტები „ელიტა“ და სოხუმის „დინამოს“ მეორე გუნდი დაუპირისპირდნენ. ანგარიში მე-2 წუთზე, სოხუმელებმა გახსნეს. ტურის სწრაფი გოლი, თაკო წვიმიტაძემ გაიტანა. 25-ე წუთზე ელენე გაზდელიანმა ანგარიში ორამდე გაზარდა. „ელიტამ“ ერთი გოლის გაქვითვა, მსაჯის მიერ კომპენსირებულ დროში მოახერხა. ელიტელთაგან ქალთა ჩემპიონატებზე, პირველი გოლი მედეა მუმლაძემ გაიტანა. დინამოელებმა კი, პირველი 3 ქულა ჩაიწერეს.

„ქარიშხალა“ – „ეძანი“ 2-0

საჩხერეში, „ქარიშხალამ“, რომელმაც 2021 წლის სეზონზე კარგი გამოცდილება შეიძინა, ქალთა ლიგა 2-ის დებიუტანტი, წალკის „ეძანი“ ორბურთანი სხვაობით დაამარაცხა. პირველი გოლი ამ შეხვედრაში, მე-16 წუთზე 11-მეტრიანით, მარიამ შეყლაშვილმა გაიტანა. მანვე, 38-ე წუთზე დუბლიც გაიფორმა. პირველი ტაიმის შემდეგ, ანგარიში აღარ შეცვლილა. „ქარიშხალამ“, მიმდინარე გათამაშებაში პირველი 3 ქულა ჩაიწერა.

„რაჭა 2020“ – „დიდგორი“ 1-0

ამბროლაურში, აგრანო ვაჩნაძის სახელობის სტადიონზე, ადგილობრივი „რაჭა 2020“-ისა და მცხეთის „დიდგორის“ შეხვდრა საკმაოდ დაძაბულად წარიმართა. სტადიონზე მისული გულშემატკივარი, 90 წუთის შემდეგ, მშრალ ფრეზე ყაბულს იყო, როდესაც, მასპინძლებმა ბოლო ძალები მოიკრიფეს და მსაჯის მიერ კომპენსირებულ დროში გოლი გაიტანეს. პირველი სამი ქულა, რაჭველებს, ნინო მაისაშვილმა მოუტანა.

„ზარზმა“ – „ბათუმი“ 1-17

ახალციხეში, მიხეილ იაძის სახელობის სტადიონზე ადგილობრივი „ზარზმა“, 2021 წლის სეზონზე, ქალთა ლიგა 2-ში დაქვეითებული „ბათუმთან“ დიდი ანგარიშით დამარცხდა. ბათუმის 8 ფეხბურთელმა ამ დღეს, საერთო ჯამში, 17 გოლი გაიტანა. პირველივე ტურის შემდეგ, ქალთა ლიგა 2-ის გოლეადორების სათავეში, ლიზი დიასამიძე აღმოჩნდა 5 (3’ 9’ 33’ 51’ 69’) გატანილი გოლით. ნინო ივანიძემ, რომელიც მეორე ტაიმში შეცვლაზე შემოვიდა ჰეთ-თრიქი (52’ 55’81), ჭურკვეიძე ქეთევანმა (28’35), ანა ხავთასმა (40’ 71’) და ქეთევან ბოლქვაძემ კი, დუბლი გაიფორმეს. თითო გოლი, დარინა სელიმბასა (42’) და ანი ტაკიძის (79’) ანგარიშზეა. მასპინძლებმა, ბათუმურ შტორმში, მხოლოდ, ერთი პრესტიჟის გოლის გატანა მოახერხეს. ის, ელზა ბერიძის (48’) ანგარიშზეა.

„ბახტრიონი“ – „ივერია“ 0-5

ახმეტის ცენტრალურ სტადიონზე, ადგილობრივმა „ბახტრიონმა“, ხაშურის „ივერიასთან“ დიდი ანგარიშით წააგო. სტუმართაგან 3 გოლი, თამარ მოდებაძემ (34’ 48’ 67’) გაიტანა. თითო გოლი კი, თამარ დარცემელიასა (22’) და სალომე არაბულის (62’) ანგარიშზეა.

***

მიმდინარე სეზონში, ახალი ვებ-გვერდი - womensleague.ge ამოქმედდა, სადაც ქალთა საფეხბურთო ჩემპიონატის (როგორც ქალთა ლიგის ასევე, ქალთა ლიგა 2-ისა და ქალთა თასის გათამაშების) შესახებ ინფორმაციას იხილავთ.