სამი ტურის შემდეგ, ქალთა ლიგის გათამაშებას წაუგებლად „სამეგრელო“ ლიდერობს. პირველი ქულები დაკარგა ამ ტურში, ქვეყნის მოქმედმა ჩემპიონმა „ლანჩხუთმა“ და ძლიერთა ლიგაში დაბრუნებულმა სოხუმის „დინამომ“. მე-3 ტურის შეხვედრები 14 და 15 მაისს გაიმართა.

„სამეგრელო“ – „დინამო“ სოხუმი 2-0

სოხუმის დინამოელებმა, ქალთა ლიგაში პირველი შეხვედრა წააგეს. თბილისში, სფფ-ს ვაკის საფეხბურთო ცენტრში, სავსე ტრიბუნის ფონზე, „სამეგრელოსა“ და „დინამოს“ შეხვედრა საკმაოდ დაძაბულ, საინტერესო და თანაბარ დაპირისპირებაში წარიმართა. ორივე ტაიმში, გუნდებს, ჰქონდათ ანგარიშის გახსნის შესაძლებლობა, თუმცა, მშრალი პირველი ტაიმის შემდეგ, 58-ე წუთზე თამრიკო სალუქვაძემ, „სამეგრელოს“ დაწინაურება მოახერხა. 73-ე წუთზე კი, დუბლი გაიფორმა. 3 ტურის შემდეგ სალუქვაძეს 6 გატანილი გოლი აქვს და ბომბარდირთა დავას უდგას სათავეში. ქულების მაქსიმუმით კი, სატურნირო ცხრილს, „სამეგრელო“ ლიდერობს.

„კოლხეთი“ ხობი - „ლანჩხუთი“ 0-0

გოლების გარეშე დასრულდა შეხვედრა ხობში, პაატა თათარაშვილის სახელობის სტადიონზე, სადაც, მოლოდინისამებრ, თამაში ქვეყნის მოქმედი ჩემპიონის, „ლანჩხუთის“ კარნახით წარიმართა. მთლიანობაში, მატჩი გარდამავალი უპირატესობით, დაძაბულ ბრძოლაში ჩატარდა. პროცენტულად, მეტი სახიფათო მომენტიც, სტუმრებმა შექმნეს, თუმცა, მათი გოლად გადაქცევა ვეღარ მოახერხეს. ლანჩხუთელებს, ამ შეხვედრაში მიკრო-ტრავმების გამო ორი ლიდერი, ხატია ჭყონია და ირინა ხაბურზანია აკლდნენ. თავის მხრივ, პოზიციურად სწორად უტევდა „კოლხეთიც“, თუმცა, კარის ჩარჩოში, მასპინძლებს, რეალურად, არც დაურტყამთ.

„კვარტალი“ – „გორი იუნაიტედი“ 4-1

თბილისში, სფფ-ს ნუცუბიძის პლატოს საფეხბურთო ცენტრში, ქალთა ლიგის ყველაზე ახალგაზრდულმა გუნდმა „კვარტალმა“, პირველივე ტაიმში გადაწყვიტა შეხვედრის ბედი. მასპინძელ გუნდს ემჩნეოდა მონდომება და 3 ქულის აღების სურვილი. მარიამ ცისკარიშვილმა, ანგარიში, მე-18 წუთზე გახსნა. კიდევ სამ წუთში, ნათია ჯოჯუამ, მასპინძელთა უპირატესობა გაზარდა. 37-ე წუთზე კი, ანანო წიქარიძემ, გორელთა კარში მესამე გოლიც გაიტანა. შესვენების შემდეგ, „გორი იუნაიტედმა“ სწრაფი გოლის გატანა შესძლო. ანგარიში, თამარ ეპიტაშვილმა შეამცირა, თუმცა, კვარტლელებმა, სტატუს-კვო მალევე აღადგინეს. დუბლი, მარიამ ცისკარიშვილმა გაიფორმა. ამ შეხვედრაში, აქილევსის მყესის ტრავმა მიიღო და მოგვიანებით ოპერაცია ჩაუტარდა, 2021 წლის საქართველოს საუკეთესო ქალ ფეხბურთელს ნინო სუთიძეს, რომელსაც ხანგრძლივი რეაბილიტაცია ელის.

„ნორჩი დინამო“ – „მართვე“ 1-0

ტურის ბოლო შეხვედრა, თბილისში, სფფ-ს გლდანის საფეხბურთო ცენტრში გაიმართა. „ნორჩი დინამო“, ქუთაისის „მართვეს“ დაუპირისპირდა. ქალთა საფეხბურთო ჩემპიონატების ყველაზე სტაჟიანი გუნდების შეხვედრა, მასპინძელთა გამარჯვებით დასრულდა. ამ მატჩში ერთადერთი გოლი, შეხვედრის დაწყებიდან მალევე, მე-2 წუთზე მარიამ მოდრეკილაძემ გაიტანა.

***

ქალთა ლიგის ახალი სეზონის მეოთხე ტური 21 მაისს გაიმართება. გათამაშების კალენდარი და სატურნირო ცხრილი იხილეთ ბმულზე

მიმდინარე სეზონში, ახალი ვებ-გვერდია - womensleague.ge ამოქმედდა, სადაც ქალთა საფეხბურთო ჩემპიონატის (როგორც ქალთა ლიგის ასევე, ქალთა ლიგა 2-ისა და ქალთა თასის გათამაშების) შესახებ ინფორმაციას იხილავთ.