20, 21 და 22 მაისს, ქალთა ლიგა 2-ის მეორე ტურის მატჩები გაიმართა. ზუგდიდის „ფენიქსი“ წლევანდელ გათამაშებაში სწორედ, ამ ტურიდან ჩაერთო და პირველი სამი ქულაც მოიპოვა. დღეს, ხაშურის „ივერია“ ისვენებდა. 

„ფენიქსი“ – „ელიტა“  3-0

კახათის ცენტრალურ სტადიონზე, მიმდინარე ჩემპიონატის სადებიუტი მატჩში, ზუგდიდის „ფენიქსმა“ ანგარიში, მე-19 წუთზე, სესილი ყოლბაიას გოლით გახსნა. სათამაშო უპირატესობასაც, როგორც მოსალოდნელი იყო, მასპინძლები ფლობდნენ. თუმცა, პირველ ტაიმში, მეტი გოლის გატანა ვეღარ მოახერხეს. შეხვედრის მეორე ნახევარში კი, 9-წუთიან მონაკვეთში, ჯერ 57-ე წუთზე თაკო ბულიამ, შემდეგ კი, 68-ე წუთზე სოფო კვარაცხელიამ, თბილისელებს კიდევ ორი გოლი გაუტანეს. 

„დინამო-2“ სოხუმი - „ქარიშხალა“  4-1

სოხუმის „დინამოს“ მეორე გუნდი, სადებიუტო ჩემპიონატში, მე-5 წუთზე, სწრაფი გოლით დაწინაურდა. ანგარიში, ელენე გაზდელიანმა გახსნა. პირველ ტაიმშივე, დროის მოკლე მონაკვეთში, მე-16 და 25-ე წუთებზე, ლიზი კაკულიამ ორჯერ აიღო საჩხერელთა კარი. პირველი ტაიმის შემდეგ, სამბურთიანი უპირატესობის მიუხედავად, სტუმრებმა, შეხვედრის მეორე ნახევარი შემართებით დაიწყეს და 51-ე წუთზე, ნუცა ცარციძის გოლით, ანგარიში ოდნავ შეამცირეს. თუმცა, დინამოელებმაშეხვედრის წარმატებით დასრულებაც მოახერხეს და 75-ე წუთზე, „ქარიშხალას“ კარში, კიდევ ერთი გოლი გაიტანეს. ის, მარიამ გოგოლაძის ანგარიშზეა. 

„დიდგორი“ – „ზარზმა“ 8-1

დუშეთში გამართულ შეხვედრაში, მცხეთის „დიდგორმა“ რვა გოლის გატანა მოახერხა. მასპინძლებმა, ანგარიში, მე-12 წუთზე, მარიამ მერებაშვილის გოლით გახსენს და 3 წუთში, მარიამ დოლიშვილის გოლის წყალობით, უკვე კომფორტულად ლიდერობდნენ. მეორე ტაიმის დასაწყიში, მარიამ მერებაშვილმა დუბლი გაიფორმა. მატჩის ბოლომდე კი, თითო გოლი, ქეთი ჩიტაურმა, ხატია ლომოურმა, ლიზი ლომოურმა, თეონა გიგინეიშვილმა და ანასტასია გობრელიანმაც ჩაიწერეს აქტივში. „ზარზმამ“, 73-ე წუთზე ნონო ბოჩიკაშვილის პრესტიჟის გოლის წყალობით, „დიდგორი“ მინდვრიდან მშრალად არ გაუშვა. 

„ეძანი“ – „რაჭა 2020“  0-1

მეორე სეზონია, რაჭველები, რომლებსაც ქალთა ჩემპიონატებში დებიუტი 2021 წელს ჰქონდათ, თამაშიდან თამაშამდე უმატებენ. მართალია, ამ ტურში, ლაშა რატიანის გუნდმა მიმდინარე გათამაშების დებიუტანს, „ეძანს“ მინიმალური ანგარიშით მოუგო, თუმცა, „რაჭა 2020“-ის პროგრესი შესამჩნევია. წალკის ცენტრალურ სტადიონზე კი, ერთადერთი გოლი, პირველი ტაიმის მიწურულს, 45-ე წუთზე, კესო მეტონიძემ გაიტანა. 

„ბათუმი“ – „ბახტრიონი“ 8-0

ლიგით დაქვეითებული „ბათუმი“, ბედთან შეგუებას არ აპირებს და ქალთა ლიგა 2-ის გათამაშების პირველი ტურებიდან ცდილობს, ლიგის ლიდერობა მოიპოვოს და ძლიერთა შორის დაბრუნდეს. პირველი ტურის მსგავსად, ბათუმელებმა, მეორე ტურშიც დამაჯერებლად გაიმარჯვეს და ამჯერად, „ბახტრიონს“ რვა უპასუხო გოლი გაუტანეს. ტურში პოკერი ელენე არჩუაძემ შეასრულა. ამასთან, ფეხბურთელმა, ტურის სწრაფი გოლიც გაიტანა. დუბლი გაიფორმა ლიზი დიასამიძემ. ანა ხავთასმადა ელენე ბოლქვაძემ კი, ზედიზედ, მეორე მატჩში მოახერხეს გოლების გატანა. ორი ტურის შემდეგ, სატურნირო ცხრილის სათავეშიც, სწორედ, ბათუმელები არიან. 

ქალთა ლიგა 2-ის მესამე ტური 27 და 28 მაისს გაიმართება.