27 და 28 მაისს ქალთა ლიგა 2-ის მესამე ტური გაიმართა. ამ ტურში, „დასვენება“ თბილისურ „ელიტას“ მოუხდა. „ბათუმმა“ კი, მესამე შეხვედრა მოიგო, თან ისე, რომ კარი, კვლავ მშრალად შეინახა. აჭარული გუნდის მსგავსად, ქულადაუკარგავად ასპარეზობენ რაჭველებიც. ქალთა გუნდს ამბროლაურიდან, რომელიც მეორე სეზონია ქალთა გათამაშებაში მონაწილეობს, სამი ტურიდან სამი მოგება აქვს და მხოლოდ, ბურთების თანაფარდობის გამო, „ბათუმის“ შემდეგ, სატურნირო ცხრილის მეორე საფეხურზეა.

„ივერია“ – „ბათუმი“ 0-2

ცხრამუხას სტადიონზე შეხვედრა, ბათუმელთა უპირატესობით წარიმართა. ანგარიში კი, მეორე ტაიმში გაიხსნა. 51-ე წუთზე გოლი ელენე არჩუაძემ გაიტანა. თუმცა, არჩუაძე, წინა ტურისგან განსხვავებით, სადაც „პოკერი“ შეასრულა, ამ ჯერზე მხოლოდ ერთ გოლს დასჯერდა. მეორე გოლი ბათუმელთაგან ლიზი დიასამიძემ, 83-ე წუთზე გაიტანა და მიმდინარე გათამაშებაში, საკუთარ ნადავლს მე-6 გოლი შემატა. „ბათუმი“ მომდევნო ტურში დაისვენებს. „ივერია“ კი, სტუმრად, „დიდგორს“ დაუპირისპირდება.

„რაჭა 2020“ – „დინამო-2“ სოხუმი 2-1

ამბროლაურში, აგრანო ვაჩაძის სახელობის სტადიონზე, „რაჭა 2020“-მა სოხუმის „დინამო-2“-ს უმასპინძლა. ამ შეხვედრაში სამი გოლი გავიდა და სამივე პირველ ტაიმში. ანგარიში კი, სწრაფი გოლით, მე-3 წუთზე რაჭველებმა გახსნეს. კესო მეტონიძის გოლს, 4 წუთში სტუმრებმა, ლიზი კაკულიას გოლით უპასუხეს. მე-15 წუთზე კი, თინათინ სილაგაძემ, კვლავ მოახერხა ამბროლაურელთა დაწინაურება.

„ქარიშხალა“ – „ფენიქსი“ 1-1

ივანწმინდას ცენტრალურ სტადიონზე, საჩხერის „ქარიშხალა“ ზუგდიდის „ფენიქსს“ დაუზავდა. ანგარიში სტუმრებმა 21-ე წუთზე გახსნეს. გოლი, თაკო ბულიამ გაიტანა. ზუგდიდელებს, ამ შეხვედრაში, მცირე უპირატესობა ჰქონდათ, თუმცა, საკუთარ კართან დაშვებული შეცდომა 11-მეტრიანად დაუჯდათ. პენალტი კი, 61-ე წუთზე ზუსტად გამოიყენა მარიამ შეყლაშვილმა.

„ზარზმა“ – „ეძანი“ 1-1

პირველი ქულები აიღეს მიმდინარე სეზონში „ზარზმამ“ და გათამაშების დებიუტანტმა წალკის „ეძანმა“. შეხვედრაში ანგარიში, სწრაფი გოლით გაიხსნა. მე-3 წუთზე, სტუმრები მარი გობაძემ დააწინაურა. ეს წალკელთა პირველი გოლია ქალთა საფეხბურთო ჩემპიონატებში. ზარზმელებმა, მხოლოდ შეხვედრის 56-ე წუთზე მოახერხეს ანგარიშის აღდგენა, გოლი ანი მელიქიძემ გაიტანა. მატჩი კი, ფრედ დასრულდა.

„ბახტრიონი“ - „დიდგორი“ 0-3

ახმეტის ცენტრალურ სტადიონზე მეორე გამარჯვება იზეიმა მცხეთის „დიდგორმა“, რომელიც სამი ტურის შემდეგ, სატურნირო ცხრილში, მესამე საფეხურზეა. მცხეთელებმა მასპინძლებს, სამი უპასუხო გოლი გაუტანეს. თუმცა, ეს ყველაფერი მეორე ტაიმში მოახერხეს. პირველში კი, ახმეტელებმა, კარის მშრალად შენახვა შეძლეს. გადამწყვეტი, მეორე ტაიმის პირველი 10-წუთიანი მონაკვეთი გამოდგა, როდესაც, ჯერ 47-ე წუთზე ქეთი ჩიტაურმა, შემდეგ კი, 54-ე წუთზე მარიამ მერებაშვილმა, „ბახტრიონის“ კარი, ორჯერ აიღეს. ანგარიში კი, შეხვედრაში მე-80 წუთზე ანი მიდელაშვილის გატანილი გოლით დაფიქსირდა.

ქალთა ლიგის მომდევნო ტური 2 ივნისს გაიმართება.