შაბათ-კვირას ქალთა ლიგის მე-5 ტურის მატჩები გაიმართა. გათამაშებას კვლავინდებურად „სამეგრელო“ ლიდერობს. მას ორი ქულით ჩამორჩება, ქვეყნის მოქმედი ჩემპიონი „ლანჩხუთი“. მიმდინარე სეზონში, სოხუმის „დინამოში“ გადასული ლელა ჭიჭინაძე კი, 7 გატანილი გოლით, 5 ტურის შემდეგ ბომბარდირთა დავას ჩაუდგა სათავეში.

„სამეგრელო“ – „კვარტალი“ 3-0

თბილისში, სფფ-ის ვაკის საფეხბურთო ცენტრში, „სამეგრელო“, „კვარტალს“ დაუპირისპირდა. ანგარიში, მე-3 წუთზე მაიკო ბებიას გოლით გაიხსნა. ამავე ტაიმში, 32-ე წუთზე ანა კირვალიძემ, მასპინძელთა უპირატესობა ორ ბურთამდე გაზარდა. შეხვედრა, „სამეგრელოს“ კარნახით წარიმართა. „კვარტალი“ კი, რომელიც მეორე მატჩია, გუნდის ყველაზე გამოცდილი მცველის ნინო სუთიძის გარეშე თამაშობს, ცდილობს, დაცვაში ცოტა შეცდომა დაუშვას. თუმცა, თავად, მეორე შეხვედრაა გოლის გატანას ვერ ახერხებს. „სამეგრელომ“ კი, მეორე ტაიმში, 72-ე წუთზე კიდევ ერთი გოლი გაიტანა. საბოლოო ანგარიში ნინო ბუხრიკიძემ დააფიქსირა.

„კოლხეთი“ ხობი - „გორი იუნაიტედი“ 3-0

სამბურთიანი სხვაობით მოიგო ხობში, პაატა თათარაშვილის სახელობის სტადიონზე, ადგილობრივმა „კოლხეთმაც“, რომელმაც ამ დღეს, „გორი იუნაიტედი“ მიიღო. მასპინძლებმა ანგარიში, პირველი ტაიმის მიწურულს, 43-ე წუთზე, ანა წულაიას ზუსტად შესრულებული 11-მეტრიანით გახსნეს. მეორე ტაიმში კი, უპირატესობა, რომელსაც მთელი მატჩი ფლობდნენ, კიდევ ორ გოლში გარდასახეს. ჯერ, 61-ე წუთზე ნატა კვირკვაიამ აიღო სტუმართა კარი, მე-80 წუთზე კი, ნინი ბერიძემ, ამ შეხვედრაში ბოლო გოლი გაიტანა.

„მართვე“ – „დინამო“ სოხუმი 2-3

უხვგოლიანი გამოდგა დაპირისპირება ქუთაისში, „ტორპედოს“ ბაზაზე. „მართვემ“, სოხუმის „დინამოს“ უმასპინძლა. ანგარიში, 37-ე წუთზე ლელა ჭიჭინაძემ გახსნა, რომელმაც საბოლოოდ ამ შეხვედრაში ჰეთ-თრიქიც შეასრულა. აღსანიშნავია, რომ მასპინძელთაგან ორი გოლი ერთმა ფეხბურთელმა, ანა ჯანელიძემ გაიტანა. ამ მხრივ, ქუთაისური დაპირისპირება ამ ორი ფეხბურთელის მინი-დუელიც კი გამოდგა. ჯანელიძემ პირველად, პირველი ტაიმის მიწურულს აიღო სტუმართა კარი და მეორე ტაიმშიც, გუნდებს თავიდან მოუხდათ დაწყება. აქ კი, როგორც უკვე აღვნიშნეთ, კვლავ ჭიჭინაძემ იჩინა თავი. ლელამ , ორი გოლი 10-წუთიან შუალედში გაიტანა. აი, ჯანელიძემ კი, კვლავ ტაიმის მიწურულს, ამჯერად, 88-ე წუთზე კიდევ ერთხელ შეამცირა სხვაობა, გასათანაბრებლად კი, მას და „მართვეს“ დრო აღარ ეყოთ.

„ნორჩი დინამო“ – „ლანჩხუთი“ 0-4

ბევრი გოლი და ყვითელი ბარათი - ასეთია, მე-5 ტურის ბოლო მატჩის სტატისტიკა. თუმცა, თუკი ყვითელი ბარათები ორივე გუნდის წარმომადგენლებმა დაიმსახურეს, გოლები, ერთ, მასპინძელთა კარში გავიდა. ანგარიში კი, 34-ე წუთზე ეთერ სულაშვილმა გახსნა. ეს სულაშვილის მე-6 გოლია მიმდინარე გათამაშებაში. ამ მომენტიდან, 6 წუთში, მეგი გოცირიძემ, მეორედ აიღო ნორჩდინამოელთა კარი. მეორე ტაიმში კი, დუბლი, ხატია ჭყონიამ გაიფორმა.

***

ქალთა ლიგის მე-6 ტური 4 ივნისს გაიმართება.