ქალთა ლიგა 2-ში ხუთი ტურის შემდეგ ორი ლიდერი გამოიკვეთა, „რაჭა 2020“ რომელსაც 5 თამაშიდან 5 მოგება აქვს და „ბათუმი“, რომელსაც ერთი თამაშით ნაკლები აქვთ ჩატარებული, თუმცა დანარჩენი ყველა მოგებული აქვს. გამომდინარე იქიდან, რომ ქალთა ლიგა 2-ის გათამაშებაში 11 გუნდი მონაწილეობს, ტურებში, თითოს დასვენება უწევს. დღეს, „ქარიშხალა“ ისვენებდა.

„ზარზმა“ – „ფენიქსი“ 0-14

ზუგდიდის „ფენიქსმა“, რომელიც გათამაშების ცხრილში, მე-5 ადგილზეა, დიდი ანგარიშით, 0-14 დაამარცხა „ზარზმა“. ახალციხეში, მიხეილ იაძის სახელობის სტადიონზე, პირველი გოლი მე-17 წუთზე ლიკა კემულარიამ გაიტანა, რომელიც სტუმარი გუნდისთვის სასიგნალო აღმოჩნდა. ამის შემდეგ, „ფენიქსმა“, მასპინძლებს ამოსუნთქვის საშუალება არ მისცა და უკვე პირველ ტაიმში კომფორტული უპირატესობით, 0-6 მოიგო. საერთო ჯამში, ზუგდიდელთაგან ამ დღეს 8 ფეხბურთელმა აიღო მეტოქის კარი, მათ შორის თაკო ბულია, 4 გატანილი გოლით საუკეთესო იყო. მასზე ერთით ნაკლები სოფო კვარაცხელიამ გაიტანა, დუბლი კი, სესილი ყოლბაიამ შეასრულა.

„რაჭა 2020“ – „ელიტა“ 6-1

საინტერესოდ წარიმართა გათამაშების ლიდერის, „რაჭა 2020“-ის შეხვედრა ამბროლაურში, აგრანო ვაჩაძის სახელობის სტადიონზე, სადაც მასპინძლებმა, ანგარიში, მე-9 წუთზე, 11-მეტრიანით გახსნეს. გოლი, კესო მეტანიძემ გაიტანა, რომელმაც ამავე ტაიმში, 43-ე წუთზე კიდევ ერთი 11-მეტრიანი შეასრულა ზუსტად. პენალტებს შორის კი, ორწუთიან შუალდეში ორი გოლი გავიდა. ჯერ მასპინძლები, ნინო მაისაშვილმა გაიყვანა წინ, თუმცა, მალევე, ჯულიანა ჯიქიამ, ერთი ბურთის შემცირება მოახერხა. მეორე ტაიმში, ამბროლაურელებმა, კიდევ სამი გოლი გაიტანეს. შეხვედრის საბოლოო ანგარიში კი, კესო მეტონიძემ დააფიქსირა და შეხვედრაში, ჰეთ-თრიქიც გაიფორმა.

„ბახტრიონი“ – „დინამო- 2“ სოხუმი 0-4

ახმეტის ცენტრალურ სტადიონზე, სოხუმის „დინამოს“ მეორე გუნდმა, ოთხი უპასუხო გოლი გაუტანა მასპინძლებს. ბახტრიონელებმა, მიუხედავად იმისა, რომ პირველ პირველ ტაიმში გოლი გაუშვეს, მაინც მოახერხეს მეტოქესთან თანაბრად ეთამაშათ. თუმცა, მეორე ტაიმის სტარტზევე, სოხუმელებმა თამაშს უმატეს და მასპინძლებს სამი გოლი გაუტანეს. შეხვედრაში დუბლი, მარიამ გოგოლაძემ შეასრულა.

„ივერია“ – „ეძანი“ 5-1

ხაშურში, გრიგოლ ჯომართიძის სახელობის სტადიონზე მასპინძლებმა, გათამაშების დებიუტანტის წაკლის „ეძანის“ დამარცხება ოთხბურთიანი სხვაობით მოახერხეს და სატურნირო ცხრილში, უშუალო კონკურენტს, რომელსაც მომდევნო ტურში შეხვდებიან, ბურთების უკეთესი შეფარდების ხარჯზე გადაასწრეს. „ივერიამ“, შეხვედრის პირველ ოც წუთში, ირმა ლომიძის გოლით, დაწინაურება მოახერხა. ტაიმის მიწურულს კი, მსაჯის მიერ კომპენსირებულ დროში, კვლავ მოახერხა 2-ბურთიანი უპირატესობისთვის მიღწია, ვინაიდან მანამდე, სტუმრებმა ერთი გოლი გაქვითეს. წალკელებმა, რომლებიც დებიუტანტის კვალობაზე, ცუდად არ გამოიყურებიან, ყველა ღონე იხმარეს თუნდაც ქულის ასაღებად, გამოიყენეს ყველა შეცვლა, თუმცა, ამ ჯერზე გოლები, კვლავ საკუთარ კარში მიირეს და ქულის აღებაც, მომდევნო ტურისთვის გადადეს.

„ბათუმი“ - „დიდგორი“ 5-1

ოთხი ბურთის უპირატესობით დაამარცხა ბათუმში, „ბაკურის“ სტადიონზე ადგილობრივმა გუნდმა მცხეთის „დიდგორი“. მორიგ შეხვედრაში მაოტანა გოლის, თანაც ორის გატანა ანა ხავთასმა. ბათუმელმა ანგარიში 33-ე წუთზე გახსნა, თუმცა, მასპინძლებმა, ამ ტაიმში მეტის გაკეთება ვეღარ მოახერხეს. მეორე ტაიმში კი, ლიზი დიასამიძის დუბლით 3-ბურთიანი უპირატესობით დაწინაურდნენ. 76-ე წუთზე ნინო ივანიძემ, კიდევ ერთი გოლის გატანა მოახერხა, თუმცა, მცხეთელებიც არ დარჩნენ ვალში და საპასუხო შეტევისას ანასტასია გაბრელიანმა ერთი გოლი გაქვითა. საბოლოო ანგარიში კი, ანა ხავთასმა დააფიქსირა.

ქალთა ლიგა 2-ის მომდევნო ტური 15 ივნისს არის დაგეგმილი.