11 და 12 ივნისს ქალთა ლიგის მეშვიდე ტურის მატჩები გაიმართა. მორიგი გამარჯვებები ჩაიწერეს აქტივში „სამეგრელომ“, რომელიც 7 ტურის შემდეგ, 6 მოგებითა და 1 ფრედ ჩატარებული შეხვედრის შემდეგ 19 ქულით უდგას სატურნირო ცხრილს სათავეში და „ლანჩხუთმა“, რომელსაც ამჟამად, 17 ქულა აქვს და ერთი მოგებით ნაკლები „სამეგრელოზე“. გათამაშების ბომბარდირთა დავაში კი, 12 გატანილი გოლით, კვლავ, სოხუმის დინამოელი ლელა ჭიჭინაძე ლიდერობს.

„დინამო“ სოხუმი - „ლანჩხუთი“ 2-4

სფფ-ს ნუცუბიძის პლატოს საფეხბურთო ცენტრში, სოხუმის „დინამო“ ქვეყნის მოქმედ ჩემპიონს, „ლანჩხუთს“ დაუპირისპირდა. საკმაოდ საინტერესო და დაძაბული შეხვედრა, ორმხრივ იერიშებში წარიმართა. ანგარიში, მე-14 წუთზე ლელა ჭიჭინაძემ, 11-მეტრიანით გახსნა. ტაიმის ბოლოს, მსაჯის მიერ კომპენსირებილ დროში კი, დუბლიც გაიფორმა. მეორე ტაიმში, ჩემპიონი გააქტიურდა და უფრო აქტიურად შეუტია, თუმცა, გოლის გაქვითვა, მხოლოდ მე-60 წუთზე მოახერხა. ანგარიში თეონა თოდაძემ შეამცირა. ამ მომენტიდან რამდენიმე წუთში, ტრავმა მიიღო ლელა ჭიჭინაძემ, რომელიც იძულების წესით შეცვალეს. ამის შემდეგ, კი, ლანჩხუთელებმა, რომელსაც მთავარი თავსატეხი მოაკლდათ, უფრო ლაღად დაიწყეს თამაში და დარჩენილ დროში, 3 უპასუხო გოლი გაიტანეს. 70-ე წუთზე თოდაძემ 11-მეტრიანით დუბლი გაიფორმა, 82-ე წუთზე ეთერ სულაშვილმა შორი მანძილიდან თავზე გადაუგდო მეკარეს და პირველად, ამ შეხვედრაში „ლანჩხუთი“ დააწინაურა. 87-ე წუთზე კი, მარიამ კაპანაზე, შეხვედრის ბოლო გოლი გაიტანა.

„მართვე“ – „კვარტალი“ 3-0

ქუთაისში, საფეხბურთო კლუბ „ტორპედოს“ საწვრთნელ ბაზაზე, „მართვემ“, „კვარტალი“ მიიღო. მიმდინარე გათამაშების ყველაზე ახალგაზრდულ გუნდს, რომელსაც სულ სამი გამოცდილი მოთამაშე ჰყავს განაცხადში, ორი ტრავმის გამო აკლდა. ერთი კი, მეკარე თეკლე გულორდავა, საჯარიმო ხაზსს გარეთ ხელით თამაშის გამო, „მართვესთან“ შეხვედრაში მინდვრიდან გააძევეს. მატჩის დასრულება, თბილისელებს 10-ს მოუხდათ, მომდევნო ტურებში, მათ ძირითად მეკარის გარეშეც მოუწევთ თამაში. ამ შეხვედრაში კი, მშრალი პირველი ტაიმის შემდეგ, ანგარიში, 50-ე წუთზე გამოცდილმა ლანა გორგაძემ გახსნა. 63-ე წუთზე ანა ჯანელიძემ, 84-ზე კი, მარიამ შონიამ ქუთაისელებს 3 ქულა, დამსახურებულად მოუტანეს.

„ნორჩი დინამო“ – „კოლხეთი“ ხობი 1-1

დრამატული გამოდგა შეხვედრა თბილისში, სფფ-ს გლდანის საფეხბურთო ცენტრში. აქ, ანგარიში, პირველი ტაიმის ბოლოს, მსაჯის მიერ კომპენსირებულ დროში გაიხსნა. გოლი მარიამ მოდრეკილაძემ გაიტანა. მეორე ტაიმის შუაწელში, თინათინ ამბალიამ ანგარიშის გათანაბრება მოახერხა. აი შეხვედრის ბოლო წუთზე, მასპინძელთა კარში დადებული 11-მეტრიანი კი, ანა წულაიამ გააცუდა, მისმა გუნდმა კი, „ნორჩ დინამოსთან“ ქულები გაიყო.

„სამეგრელო“ – „გორი იუნაიტედი“ 4-0

მიუხედავად იმისა, რომ მიმდინარე გათამაშებაში, „სამეგრელო“ პირველ ადგილზეა, „გორი იუნაიტედი“ კი, 0 ქულით ბოლოზე, გორელებმა, „სამეგრელოს“ შეკავება 39-ე წუთამდე მოახერხეს. ანგარიში, თბილისის სფფ-ს ვარკეთილის საფეხბურთო ცენტრში, სწორედ ამ დროს, თამრიკო სალუქვაძის გოლით გაიხსნა. მეორე ტაიმის სტარტზევე კი, სვეტლანა კოლკას გოლის შემდეგ, სტუმრებს ნირი წაუხდათ და „სამეგრელომაც“ ინიციატივა სრულად და საბოლოოდ იგდო ხელთ. 58-ე და 64 წუთებზე ლიზი მწერავილმა დუბლი გაიფორმა. მისმა გუნდმა კი, მომედვნო, მე-8 ტურისთვის შემოიანახა ძალები, რომელშიც, მისი მეტოქე, „ნორჩი დინამო“ იქნება.

ქალთა ლიგის მომდევნო ტური, 18 ივნისს არის დაგეგმილი.