6 და 7 აგვისტოს ქალთა ლიგის 2022 წლის სეზონი განახლდა. მე-9 ტურის თამაშები ორ დღეზე იყო გადანაწილებული. ლიდერებმა, როგორც მოსალოდნელი იყო დაგეგმილი ქულები აიღეს. ტურის ყველაზე სწრაფი გოლი კი, ხობის „კოლხეთისა“ და სოხუმის „დინამოს“ დაპირისპირებაში მე-15 წუთზე, სოხუმელთა მცველმა, ნათია სხირტლაძემ გაიტანა.

ხობის „კოლხეთი“ – „დინამო“ სოხუმი 0-2

ამ ტურამდე ხობელები, სოხუმელებს 2 ქულით ჩამორჩებოდნენ. ტრადიციულად, „კოლხეთი“ საკუთარ სტადიონზე მოსაგებად გადის, თუმცა, ამ ჯერზე სტუმრებმა მათი გეგმები ჩაშალეს. ხობში, პაატა თათარიშვილის სახელობის მოედანზე ანგარიში მე-15 წუთზე სოხუმელებმა გახსნეს. მართალია, ამ დღეს, გათამაშების ბომბარდირმა, ლელა ჭიჭინაძემ (15 გატანილი გოლი), ვერ გაიტანა, თუმცა, დინამოელებმა, მასპინძლებს, კიდევ ერთი გოლი, 56-ე წუთზე გაუტანეს. მერი ეჯიბიას გოლის წყალობით, სოხუმის „დინამომ“ გაიმარჯვა და უშუალო კონკურენტს „კოლხეთს“, 5 ქულით გაადაასწრო.

„ნორჩი დინამო“ – „გორი იუნაიტედი“ 3-1

2 ქულამდე შეამცირა სხვაობა ხობის „კოლხეთთან“ „ნორჩმა დინამომ“, რომელმაც ამ ტურში გათამაშების აუტსაიდერს, „გორი იუნაიტედს“ უმასპინძლა. თბილისში, სფფ-ის ვარკეთილის საფეხბურთო ცენტრში გამართულ შეხვედრაში ანგარიში, მე-18 წუთზე ლიკა მანუჩარიშვილმა გახსნა. შეხვედრის 31-ე წუთზე, ანა საღირაშვილის გოლის შემდეგ, მასპინძლები უკვე 2-0-ს იგებდნენ. ნორჩ დინამოელთა უპირატესობა აშკარა იყო და 50-ე წუთზე, მანუჩარიშვილის დუბლით, თბილისელების სასარგებლოდ ანგარიში 3-0 გახდა. თუმცა, გორელებმა პრესტიჟის გოლი მაინც გაიტანეს. 51-ე წუთზე მარჯან ალიკვარზანიმ ერთი ბურთი გაქვითა.

„კვარტალი“ – „ლანჩხუთი“ 1-2

სფფ-ის ნუცუბიძის პლატოს საფეხბურთო ცენტრში, ქალთა ლიგის ყველაზე ახალგაზრდულმა გუნდმა „კვარტალმა“, „ლანჩხუთს“, რომელიც უეფა-ს ქალთა ჩემპიონთა ლიგის გათამაშებისთვის ემზადება თანაბარი ბრძოლა გაუმართა. ეს, „კვარტალს“ განსაკუთრებით პირველ ტაიმში გამოუვიდა კარგად. „ლანჩხუთმა“ ანაგრიში, მხოლოდ, ტაიმის მიწურულს მე-40 წუთზე გახსნა. გოლი, გუნდის ახალწვეულმა აიშან აჰმადოვამ გაიტანა. „კვარტალის“ კარი მეორედ, ქვეყნის მოქმედმა ჩემპიონმა 75-ე წუთზე, გუნდში დაბრუნებული ქრისტინა ბაკარანძის გოლით აიღო. შეხვედრის მიწურულს კი, საქართველოს ასაკობრივი ნაკრების წევრმა ლიზი კანკიამ ერთი გოლის გაქვითა მოახერხა.

„სამეგრელო“ – „მართვე“ 6-0

მე-9 ტურის ბოლო შეხვედრა თბილისში, სფფ-ის ვაკის საფეხბურთო ცენტრში გაიმართა. მიმდინარე სეზონის ლიდერმა „სამეგრელომ“ ქუთაისის „მართვეს“ დიდი ანგარიშით სძლია. თუმცა, ანგარიშის გახსნა სწორედ „მართვეს“ შეეძლო. ლანა გორგაძემ, მე-12 წუთზე 11-მეტრიანი გააცუდა. „სამეგრელოს“ მეკარემ თამარ ნადირაშვილმა ჯერ პენალტი მოიგერია, შემდეგ დამატებული დარტყმის შემდეგაც იხსნა კარი. ამ მომენტიდან მალევე, ამ მატჩი, „სამეგრელოს“ გოლების ათვლა ლიზი მწყერაშვილმა დაიწყო, რომელმაც საბოლოოდ, დუბლი გაიფორმა. თითო გოლი კი, ნუცა გურიელიძემ, თამრიკო სალუქვაძემ, ნინო ბუხრიკიძემ და მაიკო ბებიამ გაიტანეს. 9 ტურის შემდეგ, „სამეგრელო“ 25 ქულით გათამაშების ლიდერია.

ქალთა ლიგის მე-10 ტური 13 აგვისტოს არის დაგეგმილი.