ქალთა ლიგის 2022 წლის რეგულარული სეზონის დასრულებამდე ორი ტურით ადრე, უკვე ცნობილია თუ რომელი გუნდები გააგრძელებენ ასპარეზობას ჩემპიონობისთვის - „სამეგრელო“, „ლანჩხუთი“, „დინამო სოხუმი“ და ხობის „კოლხეთი“. გათამაშების 12 ტურის შემდეგ, გუნდები ამ თანმიმდევრობით არიან სატურნირო ცხრილში. მე-12 ტურშიც, ოთხულმა თამაშები მოიგო.

„გორი იუნაიტედი“ – „კოლხეთი“ ხობი 0-2

გორის ახალბაღის სტადიონზე, ანგარიში 27-ე წუთზე სტუმრებმა გახსნეს. მასპინძლეთა კარი თამუნა თავდიშვილმა აიღო. მიმდინარე გათამაშებაში, „გორი იუნაიტედი“ ერთადერთი გუნდია, რომელსაც ქულაც კი არ აქვს აღებული. შესაბამისად, მასპინძლები ყველანაირად ეცადნენ ქულის გადარჩენას, თუმცა, ხობელებმა მათ ამის გაკეთების საშუალება არ მისცეს. მატჩის მიწურულს, 82-ე წუთზე კი, სესილი ყოლბაიამ მეორედ მოახერხა გორელთა კარის აღება.

„დინამო“ სოხუმი – „მართვე“ 6-3

მიუხედავად იმისა, რომ ქუთაისის „მართვემ“, რომელმაც სეზონი უხეიროდ დაიწყო, ოდნავ გამოისწორა სატურნირო მდგომარეობა, თბილისში, სფფ-ის ვაკის საფეხბურთო ცენტრში ვერაფერი გააწყო სოხუმის „დინამოსთან“. სოხუმელთა გუნდის ლიდერმა ლელა ჭიჭინაძემ მორიგი ჰეთ-თრიქი (28’, 85’, 89’) შეასრულა . თუმცა, ანგარიში ამ შეხვერდაში 22-ე წუთზე გვანცა ქადაგიშვილმა გახსნა. მასპინძლები პირველ ტაიმში, მხოლოდ ორ გოლს დასჯერდნენ. მეორეს დასაწყისში, 49-ე წუთზე კი, მანონი საღარაძის გოლით, კიდევ უფრო გაიმყარეს უპირატესობა. თუმცა, ქვეყნის რამდენიმე გზის ჩემპიონი „მართვე“, დანებებას არ აპირებდა. ლანა გორგაძემ 57-ე წუთზე ზუსტად დაარტყა 11-მეტრიანი. თუმცა, 66-ე წუთზე მეორე ყვითელი ბარათი მიიღო და მინდვრის დატოვება მოუხდა. ამ მომენტამდე 2 წუთით ადრე, ნინო პასიკაშვილმა კვლავ აღადგინა სამბურთიანი სხვაობა. საინტერესო გამოდგა შეხვედრის ფინალური მონაკვეთი, სადაც ოთხი გოლი გავიდა. ჯერ, უმცირესობაში მყოფმა ქუთაისელებმა მოახერხეს ორი გოლის გატანა (75’ ანა ჯანელიძე, 81’ ანა სინატაშვილი) და ანგარიშის ერთბურთამდე შემცირება, ხოლო შემდეგ, ლელა ჭიჭინაძემ სეზონის ბომბარდირობისკენ კიდევ წაიწია წინ და მას ახლა, 23 გატანილი გოლი აქვს ანგარიშზე.

„ლანჩხუთი“ – „ნორჩი დინამო“ 7-0

უხვგოლიანი გამოდგა შეხვედრა ლანჩხუთშიც, ევგრაფი შევარდნაძის სახელობის სტადიონზე, სადაც ქვეყნის მოქმედმა ჩემპიონმა „ნორჩ დინამოს“ უმასპინძლა და შვიდი უპასუხო გოლი გაუტანა. აქედან, მასპინძლებმა, პირველ ტაიმში ხუთჯერ აიღეს მეტოქის კარი და მატჩის ბედიც, შეხვედრის ამ მონაკვეთში გადაწყვიტეს. საერთო ჯამში, 7 გოლი სამ ფეხბურთელზე მოდის - ხატია ჭყონიას (12’ 43’, 49’), სოფიკო ნარსიასა (14’) და თეონა ბაქარაძის (32’, 37’, 47’) ანგარიშზე.

„კვარტალი“ – „სამეგრელო“ 2-3

და უხვგოლიანი შევხედრა გამოდგა თბილისში, სფფ-ს ნუცუბიძის პლატოს საფეხბუთო ცენტრში. „სამეგრელომ“ კარგად დაიწყო, ფლობდა უპირატესობას და თამაშობდა გამართულ, კომბინაციურ ფეხბურთს. სტუმრებმა, მატჩის დასაწყისშივე მოახერხეს ორი ბურთით დაწინაურება. დუბლი თამრიკო სალუქვაძემ (13’, 24’) შეასრულა. ამის შემდეგ, „სამეგრელომ“, როგორც ჩანს საქმე გაკეთბულდა ჩათვალა და ოდნავ მოეშვა, პასუხად „კვარტალმა“ პირველივე ტაიმში თამაშში „დაბრუნება“ მოახერხა. ჯერ ლიზი კანკიამ გაიტანა 11-მეტრიანი 26-ე წუთზე. 39-ე წუთზე კი, ანანო წიქარიძემ ანგარიში გაათანაბრა. თანაბარი ბრძოლა გაიმართა მეორე ტაიმში და ნათელი იყო, რომ თამაშის საბოლოო ბედს, ერთი ზუსტი დარტყმა გადაწყვეტდა. ასეთი კი, „სამეგრელომ“ გაიტანა, 85-ე წუთზე. „კვარტალის“ საჯარიმოში ჩაწოდებულ ბურთზე, თავით დასწრებაზე სალომე გასვიანმა ითამაშა და „სამქულიანი“ გაიტანა.

ქალთა ლიგის გათამაშების მორიგი, მე-13 ტური 10 სექტემბერს არის დანიშნული.