დღეს, ქალთა ლიგის 2022 წლის გათამაშების რეგულარული ჩემპიონატი ოფიციალურად დასრულდა. ამიერიდან, ჩემპიონის ტიტულისთვის ბრძოლას, ზედა ჯგუფში მოხვედრილი ოთხი გუნდი - „სამეგრელო“, „ლანჩხუთი“, „დინამო სოხუმი“ და ხობის „კოლხეთი“ გააგრძელებს. სხვა ამოცანა ექნებათ ქვედა ჯგუფში მოხვედრილ გუნდებს - „მართვეს“, „ნორჩ დინამოს“, „კვარტალსა“ და „გორი იუნაიტედს“. აქ, ბოლო ადგილზე გასული გუნდი, ავტომატურად, მომავალი სეზონიდან ქალთა ლიგა 2-ში გააგრძელებს ასპარეზობას.

ზედა და ქვედა ჯგუფებში გუნდებს, ურთიერთშეხვედრებში ნაჩვენები შედეგი, ქულები და გოლები გადაჰყვება. შესაბამისად, რეგულარული ჩემპიონატის, ბოლო, მე-14 ტურის მატჩებიდან, ყველაზე საინტერესო, ჯგუფებში ერთად მოხვედრილი გუნდების თამაშებს ჰქონდა. ასეთი კი, ამ ტურში ორი შეხვედრა იყო, თბილისში და ლანჩხუთში.

„კვარტალი“ – „მართვე“ 1-3

თბილისში, სფფ-ის ნუცუბიძის პლატოს საფეხბურთო ცენტრში „კვარტალმა“, საქართველოს ორგზის ჩემპიონ ქუთაისის „მართვეს“ უმასპინძლა. ქუთასიელებმა, ბოლოს ჩატარებული მატჩების მსგავსად, ანგარიში სწრაფი გოლით გახსნეს. მე-2 წუთზე, ლანა გორგაძემ გაიტანა. 24-ე წუთზე კი, ნათია დანელიამ წონასწორობა აღადგინა. თუმცა, ქუთაისელები, რომლებიც ფლობდნენ სათამაშო უპირატესობას, 33-ე წუთზე კვლავ, წინ გადიან. გოლი, მარიამ ხარგელიას ანგარიშზეა. პირველი ტაიმის შედეგი, შენარჩუნდა მეორე ტაიმშიც. თუმცა, მსაჯის მიერ კომპენსირებულ დროში, ქუთაისელებმა, კიდევ ერთი გოლი ანა ჯანელიძემ გაიტანა.

„ლანჩხუთი“ – „დინამო“ სოხუმი 3-0

ლანჩხუთში, ევგრაფი შევარდნაძის სახელობის სტადიონზე, ქვეყნის მოქმედმა ჩემპიონმა, სოხუმის „დინამოს“ უმასპინძლა. გოირგი ჩხაიძის გუნდმა, ანგარიში მე-12 წუთზე მარიამ კაპანაძის გოლით გახსნა. მე-18 წუთზე, ხატია ჭყონიას გოლის შემდეგ, გურულების გუნდი, უკვე 2-0-ს იგებდა. 72-ე წუთზე კი, ჭყონიამ დუბლიც გაიფორმა.

„კოლხეთი“ ხობი - „ნორჩი დინამო“ 5-1

ხობში, პაატა თათარიშვილის სახელობის სტადინზე, „კოლხეთმა“ თამაში, პირველივე ტაიმშივე მოიგო. ანგარიში, მე-5 წუთზე სესილი ყოლბაიამ გახსნა. 32-ე წუთზე, ვიკა კუპრეიშვილის გოლით, მასპინძლები უკვე ორი ბურთით იყვნენ წინ. ტაიმის მიწურულს, ერთწუთიან შუალედში, 38-ე და 39-ე წუთებზე დუბლი, სალომე თოდუამ გაიფორმა. თუმცა, კარი მშრალად მაინც ვერ შეინახა და ტაიმის მიწურულს, ერთი გოლი გაუშვა. 45-ე წუთზე, ანა საღირაშვილმა გაიტანა. ამ შეხვედრაში კიდევ ერთმა ფეხბურთელმა შეასრულა დუბლი, 89-ე წუთზე, ხობელთათვის მეხუთე, გოლი გაიტანა ვიკა კუპრეიშვილმა.

„გორი იუნაიტედი“ – „სამეგრელო“ 0-3

გორში, ახალბაღის სტადიონზე, მიმდინარე სეზონის ლიდერმა „სამეგრელომ“ სამი გოლი გაუტანა „გორი იუნაუტედს“, რომელსაც 2022 წლის ჩემპიონატის სატურნირო ცხრილში 0 ქულა აქვს. მიუხედავად იმისა, რომ გივი კვარაცხელიას გუნდი, მთელი მატჩის მანძილზე ფლობდა ბურთსაც და უპირატესობასაც, ანგარიში სტუმრებმა, 39-ე წუთზე 11-მეტრიანით გახსნეს. მორიგი გოლი თამრიკო სალუქვაძემ ჩაიწერა აქტივში. კიდევ ორი გოლი, 54-ე და 59-ე წუთებზე, სალომე გასვიანმა და ანა კირვალიძემ გაიტანეს. სტუმრებს მეოთხე გოლის შანსიც ჰქონდათ, თუმცა, სვეტლანა გაბელაიამ პენალტი გააცუდა.

ქალთა ლიგის გათამაშების ზედა და ქვედა ჯგუფების კალენდარი ჩვენს ვებ-გვერდზე, womensleague.ge-ზე იხილეთ.

დღეს, ქალთა ლიგა 2-ის, მე-17 ტურის ოთხი მატჩი გაიმართა:

„ბახტრიონი“ – „ფენიქსი“ 0-2

„ზარზმა“ – „ელიტა“ 0-4

„რაჭა 2020“ – „ქარიშხალა“ 5-0

„ბათუმი“ – „ეძანი“ 6-1

ამ ტურის კიდევ ერთი შეხვედრა, „ივერიასა“ და „დინამო 2 სოხუმს“ შორის 1 ნოემბერს გაიმართება. 

ამ მომენტისთვის, ქალთა ლიგა 2-ის სატურნირო ცხრილს ერთპიროვნულად „ბათუმი“ ლიდერობს, რომელსაც 15 თამაშის შემდეგ, 41 ქულა აქვს.