დღეს, საქართველოს რამდენიმე ქალაქში, ქალთა ლიგის 2022 წლის სეზონის დასკვნითი ეტაპი დაიწყო. ამ ეტაპზე გუნდები ზედა და ქვედა ჯგუფებად არიან გადანაწილებულნი. ზედა ჯგუფში მოხვედრილი გუნდები („სამეგრელო“, „ლანჩხუთი“, სოხუმის „დინამო“ და ხობის „კოლხეთი“) ქვეყნის ჩემპიონის ტიტულის მოსაპოვებლად იბრძვიან. ქვედა ჯგუფში („მართვე“, „ნორჩი დინამო“, „კვარტალი“ და „გორი იუნაიტედი“), ბოლო ადგილზე გასული გუნდი კი, მინიმუმ ერთი წლით, ერთი ლიგით დაბლა, ქალთა ლიგა 2-ში ჩაინაცვლებს. ტურნირის დებულების თანახმად, ასპარეზობის ამ ეტაპზე, ჯგუფები 4-4 გუნდისგან დაკომპლექტდა და სატურნირო ცხრილში ურთიერთშეხვედრებში მოპოვებული ქულები და გოლები გადაჰყვათ. დღეს, ამ ეტაპის პირველი ტური გაიმართა დაგეგმილი ექვსიდან.

ზედა ჯგუფი

„ლანჩხუთი“ – „დინამო სოხუმი“ 6-1

ლანჩხუთში, ევგრაფი შევარდნაძის სახელობის სტადიონზე, ქვეყნის მოქმედი ჩემპიონი „ლანჩხუთი“, სოხუმის „დინამოს“ დაუპირისპირდა. სოხუმელებმა, რომლებმაც ქალთა ჩემპიონატის შეცვლილი ფორმატის შემდეგ, ძლიერთა შორის მიმდინარე სეზონში მოახერხეს დაბრუნება, რეგულარული ჩემპიონატის დროს, სტაბილურად ასპარეზობდნენ, რამაც გუნდს, მედლების მოსაგებად გზა გაუხსნა. ზედა ოთხეულში, მათ 6 ქულა გადაჰყვათ, ცხრილში მესამე საფეხურზე იყვნენ და 5 ქულით უსწრებდნენ ხობის „კოლხეთს“. თავის მხრივ, „ლანჩხუთი“ 5 ქულით ჩამორჩებოდა, მიმდინარე გათამაშების ლიდერს, „სამეგრელოს“. შესაბამისად, გურულებმა, მშობლიურ კედლებში, დარჩენილ თამაშებში ქულების მაქსიმუმის აღება გადაწყვიტეს და სოხუმელებს, საკუთარი თამაში მოახვიეს. უხვგოლიან შეხვედრაში პირველი გოლი 29-ე წუთზე სოფო ნარსიამ გაიტანა, 31-ე წუთზე კი, ეთერ სულაშვილმა „ლანჩხუთი“ კიდევ უფრო დააწინაურა. მეორე ტაიმის დასაწყისში, 49-ე წუთზე სულაშვილმა კიდევ ერთხელ აიღო სოხუმელთა კარი, მატჩის მიწურილს 82-ე წუთზე კი, ჰეთ-თრიკიც გაიფორმა. მე-60 და 71-ე წუთზებზე სტუმართა გუნდის კარი მარიამ კაპანაძემ და ხატია ჭყონიამ აიღეს. სოხუმელთაგან კი, 86-ე წუთზე სტანდარტულიდან, პრესტიჟის გოლი ნინო პასიკაშვილმა გაიტანა. რამდენჯერმე მეტოქის კარის აღების შესაძლებლობა, მიმდინარე გათამაშების ბომბარდირს, სოხუმის დინამოელ ლელა ჭიჭინაძესაც ჰქონდა, თუმცა, მან დღეს, ნადავლის გაზრდა ვერ მოახერხა.

„სამეგრელო“ – „კოლხეთი“ ხობი 2-0

ჩხოროწყუელთა გამარჯვებით დასრულა მეგრული დერბი. ბონდო პაპასკირის სახელობის ცენტრალური სტადიონზე, ქალთა ლიგის გათამაშების ლიდერმა, „სამეგრელომ“, ხობის „კოლხეთი“ მიიღო. მედლებისკენ მიმავალ გზაზე „სამეგრელოს“ რეგულარული ჩემპიონატიდან 16 ქულა გადმოჰყვა. „კოლხეთს“, მხოლოდ 1. დღევანდელ შეხვედრაშიც, „სამეგრელომ“ ლიდერის სტატუსი გაამართლა და ანგარიში, 25-ე წუთზე, სალომე თოდუას გოლით გახსნა. კიდევ ერთხელ, სტუმართა გუნდის კარი მასპინძლებმა, 55-ე წუთზე აიღეს. გოლი თამარ სალუქვაძემ გაიტანა. „სამეგრელომ“, საჭირო სამი ქულა აიღო და სატურნირო ცხრილში, ოქროს მედლებისთვის უშუალო კონკურენტთან „ლანჩხუთთან“ კვლავ შეინარჩუნა 5-ქულიანი უპირატესობა.

ქვედა ჯგუფი

„მართვე“ – „გორი იუნაიტედი“ 4-0

ოთხი უპასუხო გოლი გაიტანა „მართვემ“, ქუთაისში, „ნიკეას ბაზაზე“, მიმდინარე გათამაშების აუტსაიდერის „გორი იუნაიტედის“ კარში. თუმცა, გორელებმა, რომლებსაც მიმდინარე სეზონში, ქულა არ აქვთ აღებული, პირველი გოლი, მხოლოდ 42-ე წუთზე გაუშვეს. ამ შეხვედრაში ეს და ბოლო გოლები, ქუთაისელთა გამოცდილი მოთამაშის ლანა გორგაძის ანგარიშზეა (42’, 90+1’). მეორე ტაიმში, 11-მეტრიანი გააცუდა მარიამ ხარგელიამ. შეხვედრის დასრულებამდე 10 წუთით ადრე კი, ქუთაისელებმა სტუმართა კარის შტურმი მოაწყეს და გორგაძის მეორე გოლამდე, 81-ე და 87-ე წუთებზე კიდევ ორი გოლი გაიტანეს. ისინი ანა ჯანელიძისა და სალომე საღარაძის ანგარიშზეა. ახლა „მართვეს“ 18 ქულა აქვს და 8 ქულით უსწრებს, „ნორჩ დინამოს“, რომელმაც დღეს, ქულების აღება ვერ მოახერხა.

„კვარტალი“ – „ნორჩი დინამო“ 2-0

ქვედა ჯგუფის პირველ ტურში, მიმდინარე გათამაშების ყველაზე ახალგაზრდულმა „კვარტალმა“ მორიგი 3 ქულის აღება მოახერხა. თბილისურ დერბიში, რომელიც სფფ-ს ნუცუბიძის პლატოს საფეხბურთო ცენტრში გაიმართა, გოლები, პირველ ტაიმში გავიდა. ანგარიში სწრაფი გოლით, მე-3 წუთზე ნათია დანელიამ გახსნა. პირველი ტაიმის დასრულებამდე 3 წუთით ადრე, 42-ე წუთზე კი, ელენე გაზდელიანმა „კვარტალის“ უპირატესობა ორამდე გაზარდა. მასპინძლებმა, მეორე ტაიმში მოახერხეს ანგარიშის შენარჩუნება და მოპოვებული 3 ქულით, ქვედა ჯგუფის სატურნირო ცხრილში 13 ქულით, „ნორჩ დინამოს“, გადაასწრეს.

ქალთა ლიგის ზედა და ქვედა ჯგუფების შეხვედრები 22 ოქტომბერს გაიმართება.