22 და 23 ოქტომბერს ქალთა ლიგის ზედა და ქვედა ჯგუფებში მეორე ტურის შეხვედრები გაიმართა. ზედა ჯგუფში ორივე შეხვედრა პრინციპულ ხასიათს ატარებდა, ვინაიდან პირველ წყვილში გამარჯვებული ქვეყნის ჩემპიონის ტიტულისკენ კიდევ უფრო იმოკლებდა გზას, მეორე წყვილში მოგებული კი, ბრინჯაოს მედლებისკენ გადადგამდა მორიგ ნაბიჯს. 

ზედა ჯგუფი

„სამეგრელო“ – „ლანჩხუთი“ 2-2

საჩემპიონო რბოლაში, ქვეყნის მოქმედმა ჩემპიონმა „ლანჩხუთმა“ ვერც ამჯერად მოახერხა „სამეგრელოს“ დამარცხება. 2022 წლის სეზონზე, ამ გუნდების მესამე დაპირისპირება, ჩხოროწყუში, ბონდო პაპასკირის სახელობის სტადიონზე, ფრედ დასრულდა. გოლები, მშრალი პირველი ტაიმის შემდეგ გავიდა. ანგარიში სტუმრებმა, 67-ე წუთზე ეთერ სულაშვილის დარტყმით გახსნეს. მასპინძლებმა 81-ე წუთზე, თერთმეტმეტრიანით, გაათანაბრეს - გოლი, ნინო ბუხრიკიძის ანგარიშზეა. ძირითადი დროის ამოწურვამდე, ერთი წუთით ადრე, სულაშვილმა დუბლი გაიფორმა და „ლანჩხუთი“ კვლავ წინ გაიყვანა. თუმცა, მსაჯის მიერ კომპენსირებულ დროში, სტუმრები უხეში თამაშისთვის, საჯარიმო მოედანთან ახლოს დაჯარიმდნენ. სტანდარული კი ზუსტად, ლიზი მწყერაშილმა გამოიყენა.

„კოლხეთი“  ხობო - „დინამო“ სოხუმი 0-3

გათამაშების ბომბარდირმა ლელა ჭიჭინაძემ (27 გოლი), ამჯერად გოლი ვერ გაიტანა, თუმცა, მისმა გუნდმა, ხობში, პაატა თათარიშვილის სახელობის სტადიონზე, 3 გოლი გაიტანა და ბრინჯაოს მედლების მოსაგებად, საჭირო 3 ქულა აიღო. დინამოელებმა ანგარიში სწრაფად გახსნეს, მე-9 წუთზე, მაია დანგაძის გოლით.  35-ე წუთზე ნინო პასიკაშვილმა, ლელა ჭიჭინაძის გადაცემის შემდეგ, ხობელებს კიდევ ერთი გოლი გაუტანა. შეხვედრის მიწურულს, 82-ე წუთზე კი, მეგი ეჯიბიამ, თითქმის კუთხურის ალმიდან, სტანდარტულიდან, ულამაზესი გოლი ჩაახვია.  

 

ქვედა ჯგუფი

„გორი იუნაიტედი“ – „ნორჩი დინამო“ 0-1

გორში, „პარკი არენაზე“, კვლავ ვერ მოახერხა ქულების აღება „გორი იუნაიტედმა“. მიმდინარე გათამაშებაში, გორული კლუბი ერთადერთია, რომელსაც არც რეგულარული ჩემპიონატის დროს და არც დასკვნი ეტაპზე, ქულა არ აქვს. შესაბამისად, ქალთა ლიგის დატოვების პრეტენდენტიც ამ გათამაშებაში სწორედ, ეს კლუბია. ქვედა ჯგუფის მეორე ტურის შეხვედრაში კი, „ნორჩ დინამოსთან“ მასპინძლები მინიმალური ანგარიშით დამარცხდნენ. შეხვედრაში ერთადერთი გოლი, მატჩის მიწურულს, 81-ე წუთზე ანა პავლიაშვილმა გაიტანა.  ამ გამარჯვებით, თბილისელები სატურნირო ცხრილში, მეორე თბილისურ კლუბს, კვარტალს“ მიუახლოვდნენ. 

„მართვე“ – „კვარტალი“  2-2

საბრძოლო ფრე და ლამაზი ფეხბურთი, რომელიც ქალთა ლიგაში უკვე იშვიათობა აღარ არის, შესთავაზეს გულშემატკივარს, ქუთაისში, „ნიკეაზე“.  ანგარიში მასპინძლებმა, „მართვეს“ ფეხბურთელებმა გახსნეს. 22-ე წუთზე გოლი ანა ჯანელიძემ გაიტანა. თუმცა, „კვარტალმა“, მალევე მოახერხა ანგარიშის გათანაბრება. 25-ე წუთზე ანანო წიქარიძემ გაქვითა. კიდევ ერთი გოლი წიქარიძემ, 52-ე წუთზე გაიტანდა და „კვარტალმა“ წინ გასვლაც კი მოახერხა. ამის შემდეგ, ქუთაისელებმა იყოჩაღეს და 58-ე წუთზე ჯანელიძემ დუბლი გაიფორმა. ამ შეხვედრაში, „მართვეს“ შეეძლო 3 ქულის აღება, თუმცა, თბილისელთა 13 წლის კარის მცველმა, ვიკა დობროვოლსკაიამ, რომელიც ახლახანს შეურეთდა თბილისურ კლუბს და მხოლოდ მესამე შეხვედრა ჩაატარა, ერთი-ერთზე გასულ ქუთაისელთა შემტევს ბურთი აუღო და „კვარტალს“ ქულა შეუნარჩუნა. 

 

*** 

ქალთა ლიგა 2

ქალთა ლიგა 2-დან, ძლიერთა შორის დაბრუნების ყველაზე რეალური შანსი „ბათუმს“ აქვს, რომელმაც გათამაშების მე-20 ტურში თბილისში სტუმრად „ელიტა“ 1-3 დაამარცხა. 

ქალთა ლიგა 2-ის მე-20 ტურის შეხვედრები შემდეგი ანგარიშები დაფიქსირდა:

„რაჭა 202“ – „ბახტრიონი“ 4-0

„ქარიშხალა“ – „ივერია“ 3-9

„ფენიქსი“ – „დიდგორი“ 0-3

„დინამო სოხუმი 2“ – „ეძანი“ 3-1

„ელიტა“ – „ბათუმი“ 1-3