29 ოქტომბერს საქართველოს ქალთა ლიგის დასკვნითი ეტაპის მესამე ტურის შეხვედრები გაიმართა. მიმდინარე გათამაშების ოქროს მედლების მაძიებელმა ორივე გუნდმა გამარჯვება იზეიმა. გათამაშების დასრულებამდე სამი ტურით ადრე, კვლავ უქულოდ არის „გორი იუნაიტედი“. 

ზედა ჯგუფი

„დინამო“ სოხუმი - „სამეგრელო“ 0-1

დაძაბული და საინტერესო გამოდგა ამ ტურის ცენტრალური შეხვედრა სოხუმის „დინამოსა“ და გათამაშების ლიდერ „სამეგრელოს“ შორის. სფფ-ს ნუცუბიძის პლატოს საფეხბურთო ცენტრში თამაში თანაბარი იყო, თუმცა, საგოლე მომენტი, უფრო მეტი სტუმრებს ჰქონდათ და სოხუმელთა მეკარის, ნინო კურტანიძის დამსახურებაა, რომ დინამოელთა კარში, ერთზე მეტი გოლი არ გასულა. აღსანიაშნავია ისიც, რომ გოლამდე, სოხუმელებმა ორი კარგი მომენტი ვერ გამოიყენეს. ამ შეხვედრაში ერთადერთი გოლი, მე-14 წუთზე, მაიკო ბებიამ სტანდარტულიდან გაიტანა. „სამეგრელომ“ ზედა ჯგუფის მესამე შეხვედრაც მოიგო და ოქროს მედლებს და პირველ ტიტულს, 3 ტური აშორებს. სოხუმელები კი, მიუხედავად მარცხისა, კვლავ 8 ქულით ჯობნიან ხობის „კოლხეთს“ და ბრინჯაოს მედლების მოგების შანსს ინარჩუნებენ. გათამაშების ბომბარდირთა დავას სოხუმის დინამოელი ლალუ ჭიჭინაძე (27 გოლით) ლიდერობს, თუმცა, მას ნელ-ნელა „ლანჩხუთის“ თავდამსხმელი, ეთერ სულაშვილი ეწევა. 

„ლანჩხუთი“ – „კოლხეთი“ 8-0

ლანჩხუთში, ევგრაფი შევარდნაძის სახელობის სტადიონზე ქვეყნის მოქმედმა ჩემპიონმა „ლანჩხუთმა“ შანსი არ დაუტოვა ხობის „კოლხეთს“. გურულებმა ანგარიში, მე-5 წუთზე ხატია ჭყონიას გოლით გახსნეს და საერთო ჯამში 8 უპასუხო გოლი გაიტანეს. 24-ე წუთზე, ლანჩხუთელთაგან გოლი თათია გაბუნიამაც გაიტანა, რომელიც მეორე შეხვედრაა, მისთვის უჩვეულო ამპლუაში, მინდვრის მოთამაშედ გვევლინება და გოლებიც გააქვს. მასპინძელთა კარს კი, ამ დღეს, ლანა მჟავია იცავდა. პირველ ტაიმიში, მასპინძელთაგან გოლი ეთერ სულაშვილმაც გაიტანა, რომელმაც ამ შეხვედრაში 5 გოლის (17’ 49’ 71’ 85’ 90’) გატანა მოახერხა. ჭყონიამ კი, 81-ე წუთზე დუბლი გაიფორმა. ჩემპიონატის დასრულებამდე, 3 ტურით ადრე, „ლანჩხუთი“, ლიდერს, „სამეგრელოს“ 5 ქულით ჩამორჩება და ტიტულის შენარჩუნების შანსს თეორიულად, კვლავ ინარჩუნებს. 

 

ქვედა ჯგუფი

„კვარტალი“ – „გორი იუნაიტედი“ 3-1

სფფ-ს ნუცუბიძის პლატოს საფეხბურთ ცენტრში, ამ დღეს, კიდევ ერთი შეხვედრა გაიმართა. თბილისის „კვარტალმა“, ქალთა ლიგის აუტსაიდერს, „გორი იუნაიტედს“ უმასპინძლა და 3-1 დაამარცხა. ანგარიში მე-8 წუთზე სტუმრებმა, გუნდის ლეგიონერის ნგემო ლაზოლას გოლით გახსნეს და მთელი ნახევარი საათი ლიდერობდნენ კიდეც. თუმცა, 39-ე წუთზე ნათია დანელიამ ანგარიში გაათანაბრა. თანაბარ თამაშში, თბილისელებმა, მხოლოდ 72-ე წუთზე, მარიამ ცისკარიშვილის გოლით მოახერხეს წინ გასვლა,  84-ე წუთზე ანანო წიქარიძემ კი, შეხვედრაში საბოლოო ანგარიში დააფიქსირა. 

„ნორჩი დინამო“ – „მართვე“ 2-5

სწრაფი გოლით გაიხსნა შეხვედრა თბილისში, სფფ-ს ვაკის საფეხბურთო ცენტრში. ანი მინაძემ, „ნორჩი დინამოდან“, მე-5 წუთზე გაიტანა. თუმცა, ქუთაისელთა გამოცდილმა მოთამაშემ ლანა გორგაძემ, მე-7 წუთზე (21’ 27’ ) წონასწორობა აღადგინდა და შეხვედრის დაწყებიდან ნახევარ საათში ჰეთ-თრიკიც გაიფორმა. გორგაძის გოლებამდე, ქუთაისელთაგან, ანი ჯანელიძემაც გამოიჩინა (10’) თავი და შესაბამისად შესვენებაზე, სტუმრები, კომფორტული უპირატესობით, 1-4 გავიდნენ. მეორე ტაიმში კიდევ ორი გოლი გავიდა. 5 წუთიან მონაკვეთში, ჯერ ლიკა მანუჩარიშვილმა (61’) მოახერხა ანგარიშის შემცირება, თუმცა, რამდენიმე წუთში, ნორჩ დინამოელთა ავტოგოლის წყალობით, სტატუს-კვი აღსდგა. 

ქალთა ლიგის ზედა და ქვედა ჯგუფების მორიგი, მე-4 ტურის შეხვედრები 5 ნოემბერს გაიმართება. 

ქალთა ლიგა 2

სამი დღის მანძილზე მიმდინარეობდა ქალთა ლიგა 2-ის თამაშებიც, რომელსაც კვლავინდებურად „ბათუმი“, ქულათა მაქსიმუმით ლიდერობს. თუმცა, 21-ე ტურში მათი შეხვედრა „ქარიშხალასთან“ გადაიდო. დანარჩენი მატჩები ასე დასრულდა: 

„ეძანი“ – „ფენიქსი“ 1-2

„ივერია“ – „რაჭა 2020“ 1-1

„ბახტრიონი“ – „ზარზმა“ 5-0

„დიდგორი“ – „ელიტა“ 4-5

 

ქსკ „სამეგრელოს“ ფოტო