ახალი ამბები

სამი ტურის შემდეგ, ქალთა ლიგაში „ორხელისუფლიანობაა“

25 მარტს, ქალთა ლიგის მე-3 ტურის შეხვედრები გაიმართა. გათამაშების ლიდერებმა, „სამეგრელო“ და „ლანჩხუთმა“ მორიგი გამარჯვებები ჩაიწერეს აქტივში. ამასთან ორივე გუნდმა იდენტური ანგარიშით, ხუთბურთიანი მშრალი ანგარიშით გაიმარჯვა.

„ლანჩხუთი“ – „ბათუმი“ 5-0

გვიმბალაურში, სფფ-ს საფეხბურთო ცენტრში, „ლანჩხუთმა“ 5-0 დაამარცხა, ქალთა ლიგაში დაბრუნებული „ბათუმი“. მიუხედავად იმისა, რომ თეონა ბაქრაძემ, ანგარიში მე-8 წუთზე გახსნა, ბათუმელებმა, პირველ ტაიმში მეტი გოლი აღარ გაუშვეს. ტიტულოვან მეტოქესთან ერთბურთიანი სხვაობა 61-ე წუთამდე შეინარჩუნეს კიდეც. თუმცა, 61-ე წუთზე ბაქრაძე, დუბლი შეასრულა, 64-ე წუთზე, ლანა გორგაძემ სამამდე გაზარდა სხვაობა, 69-ე და 89-ე წუთებზე კი, ეთერ სულაშვილის დუბლი მოდის.

„დინამო სოხუმი“ – „სამეგრელო“ 0-5

თბილისში, სფფ-ს ვაკის საფეხბურთო ცენტრში „დინამო სოხუმმა“ „სამეგრელოს“ უმასპინძლა. შეხვედრა, როგორც მოსალოდნელი იყო, ქვეყნის მოქმედი ჩემპიონის კარნახით წარიმართა, რომელმაც პირველი ტაიმი, გუნდის ლეგიონერის ნატალია რეისის წყალობით, ორი ბურთით წაიყვანა. მეორე ტაიმის შუაწელში, სოხუმელებმა საკუთარ კარში ჩაჭრეს ბურთი, ჩხოროწყუელებმა კი, ბოლო 10-წუთეულში ორი გოლი გაიტანეს, ჯერ თეონა თოდაძემ გაიტანა გოლი 81-ე წუთზე. შემდეგ კი, მსაჯის მიერ კომპენსირებულ დროში, გვანცა პაპასკირმა საბოლოოდ დააფიქსირა ანგარიში.

„კოლხეთი“ ხობი - „ნორჩი დინამო’ 1-3

ხობში, პაატა თათარაშვილის სახელობის სტადიონზე, ადგილობრივი „კოლხეთი“ „ნორჩ დინამოსთან“ დამარცხდა. ანგარიში, ლიზი ცაავას გოლით, მე-11 წუთზე მასპინძლებმა გახსნეს. თუმცა, პირველი ტაიმი ანა საღირაშვილისა და ანასტასია ბუჩუკურის გოლების წყალობით, თბილისელებმა მოიგეს. ნორჩმა დინამოელებმა, მეორე ტაიმში კიდევ ერთ გოლი გაიტანეს. 57-ე წუთზე, ქეთევან სუხიაშვილმა, მატჩის საბოლოო ანგარიში დააფიქსირა.

„მართვე“ – „კვარტალი“ 0-2

ქუთაისში, ნიკეას საფეხბურთო ცენტრში, თბილისის „კვარტალმა“ „მართვე“ დაამარცხა და სამი ტურის შემდეგ, 6 ქულით გათამაშების ცხრილის მესამე საფეხურზეა. ამასთან კვარტალს, 1-2 ადგილებზე მყოფ „სამეგრელოსთან“ და „ლანჩხუთთან“ შედარებით, ერთით ნაკლები თამაში აქვს ჩატარებული. დღევანდელ შეხვედრაში კი, ანგარიში, მე-4 წუთზე ანანო წიქარიძემ გახსნა, 53-ე წუთზე კი, ლიზი კანკიამ მეორე გოლიც გაიტანა.

ქალთა ლიგის მომდევნო, მე-4 ტური 22 და 23 აპრილს გაიმართება.

ქსკ ლანჩხუთის ფოტო