ქალთა ლიგის რეგულარული ჩემპიონატის დასრულებამდე ერთი ტურით ადრე, გაირკვა ზედა და ქვედა ჯგუფების მონაწილე გუნდების ვინაობა, რომელთაგან ზედა ჩემპიონობისთვის, ქვედა კი, ლიგაში ადგილის შესანარჩუნებლად იბრძოლებს. საქართველოს ჩემპიონობისთვის „კვარტალი“, „ნიკე-ლუსო“, „ლანჩხუთი“ და „ბათუმი“ იბრძოლებენ. თუმცა, მანამდე დღეს, რეგულარული ჩემპიონატის ბოლოს წინა, მე-13 ტურის მატჩები გაიმართა.

ხაშურში, გრიგოლ ჯომართიძის სახელობის სტადიონზე მიიღო „ნორჩმა დინამომ“ „ლანჩხუთ“ და ანგარიშით 0-6 დამარცხდა. საქართველოს მოქმედმა ჩემპიონმა პირველ ტაიმშივე გადაწყვიტა მატჩს ბედი, რამეთუ ოთხი უპასუხო გოლი გაუტანა მასპინძლებს. ანგარიში, მე-14 წუთზე ლანა გორგაძემ გახსნა. შემდეგ კი, ეთერ სულაშვილმა შეასრულა ჰეთ-თრიქი ამ ტაიმში (15’, 32, 38’-პ). 61-ე წუთზე გაიტანა ანა გობრონიძემ. სულაშვილმა კი, საერთო ჯამში პოკერიც შეასრულა და მიმდინარე სეზონში ბომბარდირობაზე აშკარად პრეტენზია განაცხადა. „ლანჩხუთმა“, ანგარიშით 0-6 გაიმარჯვა.

ფრედ, 2-2 დასრულდა შეხვედრა „მართვესა“ და „ელიტას“ შორის. ქუთაისში, სფფ-ის საფეხბურთო ცენტრის მოედანზე, ანგარიში მასპინძლებმა გახსნეს. მე-19 წუთზე ანა ჯანელიძემ დააწინაურა ქუთათურები. თუმცა, მალევე, 22-ე წუთზე თამარ მოდებაძემ ანგარიში გაათანაბრა. კიდევ 3 წუთში, 25-ე წუთზე მარიამ ხარგელიამ გაიტანა და „მართე“ კიდევ ერთხელ დააწინაურა. ტაიმის მიწურულს, მსაჯის მიერ კომპენსირებული დროის პირველ წუთზე კი მანონი საღარაძემ აღადგინა წონასწორობა. მეორე ტაიმში გოლები აღარ გასულა და გუნდებმა ქულები გაიყვეს.

ხობში, პაატა თათარიშვილის სახელობის სტადიონზე ამ ტურში 11 გოლი გავიდა და ყველა მასპინძელთა კარში. „კოლხეთისა“ და „ნიკე-ლუსოს“ დაპირისპირებაში, სტუმრებმა პირველი ტაიმი სამბურთიანი სხვაობით მოიგეს, გოლები შეხვედრის დებიუტში ნინო ბუხრიკიძემ (7’, 9’) წუთებზე გაიტანა. კიდევ ერთი, მე-19 წუთზე ვანესა ფრანკო-ხირალდომ. თუმცა, მეორე ტაიმი ხობელთათვის უშანსო გამოდგა. თუ არ ჩავთვლით 88-ე წუთზე ავტოგოლს, მასპინძლებმა, შეხვედრის ამ მონაკვეთში 8 გოლი გაუშვეს, გაიტანეს ბუხრიკიძემ (51’-პ, 65’ 84’), ვანესამ (58’), მაიკო ბებიამ (56’) და ანა-მარია ბეჟამ (61’, 64’). „ნიკე-ლუსომ“ 0-11 გაიმარჯვა.

ტურის ცენტრალური შეხვედრა კი, ბათუმში, ანგისაზე ჩატარდა. „ბათუმი“, გათამაშების ლიდერთან „კვარტალთან“ 1-4 დამარცხდა. სტუმრებმა, ანასტასია ბოლქვაძისა (21’) და ლიზი კანკიას (36’-პ) გოლების შემდეგ, პირველი ტაიმი 0-2 მოიგეს. მეორეში კი, ნათია დანელიას დუბლით (68’, 90’+4) დუბლით, კომფორტული სხვაობაც დააფიქსირეს. თუმცა, თბილისელთა ბოლო გოლამდე, მასპინძლებმა ერთის გაქვითვა მოახერხეს. 81-ე წუთზე კატერინა მალიშევამ აიღო სტუმართა გოლი. მატჩი კი, გათამაშების ლიდერმა „კვარტალმა“ 1-4 მოიგო.

ქალთა ლიგის რეგულარული ჩემპიონატი თვის ბოლოს დასრულდება. მატჩები 30 ივნისს და 1 ივლისს არის ჩანიშნული. ამის შემდეგ გუნდები ზედა და ქვედა ჯგუფებში განაგრძობენ ასპარეზობას. თუმცა, მანამდე ქალთა ლიგაზე სანაკრებო შესვენება გამოცხადდება.