დღეს ქალთა ლიგის საჩემპიონო რბოლის მეორე ტური ჩატარდა. თავიდანვე გეტყვით, რომ აღნიშნული ტურის ქვედა ჯგუფის ერთ თამაში „ნორჩ დინამოსა“ და „ელიტას“ შორის გადაიდო. თბილისური გუნდების დაპირისპირების თარიღი მოგვიანებით გაირკვევა, მანამდე კი, ქვედა ჯგუფში, ბოლო ადგილზე მყოფმა ხობის „კოლხეთმა“, ანგარიშით 2-0, ქუთაისის „მართვე“ დაამარცხა და სატურნირო ცხრილში ოთხ ქულამდე შეამცირა სხვაობა. შეგახსენებთ, რომ ქვედა ჯგუფს, 19 ქულით „ნორჩი დინამო“ უდგას სათავეში.

საკმაოდ საინტერესოდ განვითარდა მოვლენები ზედა ჯგუფში, სადაც სავარაუდოდ ბოლო ტურამდე რთული იქნება გამოიცნო, ვინ გახდება 2024 წლის ჩემპიონი. ტიტულის მოგების შანსი ორი ტურის შემდეგ, სამ კლუბს „ლანჩხუთს“, „კვარტალსა“ და „ნიკე-ლუსოს“ აქვს.

ბათუმში, ადგილობრივი „ბათუმი“, დიდი ანგარიშით 0-5 დამარცხდა თბილისის „ნიკე-ლუსოსთან“. ანგარიში მე-6 წუთზე ელენე ჩიქოვანმა გახსნა. ამავე ტაიმში მე-11 და მე-20 წუთებზე კლუბის ლეგიონერმა ტატიანა კოზერენკოს დუბლით, სტუმართა გუნდი სამბურთიანი სხვაობით დაწინაურდა. შეხვედრის მიწურულს კი, 79-ე და 89-ე წუთებზე, კიდევ ერთმა ფეხბურთელმა მოახერხა დუბლის გაფორმება, გოლები ნინო ბუხრიკიძემ გაიტანა. „ნიკე-ლუსომ“ კი, ამ გამარჯვების შემდეგ, სატურნირო ცხრილში მეორე ადგილზე მყოფ „კვარტალთან“ სამ ქულამდე შეამცირა სხვაობა.

მოგეხსენებათ, ქალთა ლიგის ამ ეტაპზე, ჩემპიონის გარკვევამდე, კლუბებს 6-6 მატჩის გამართვა უწევთ. ამასთან, სატურნირო ცხრილში, რეგულარული ჩემპიონატის დროს ურთიერთშეხვედრებში დაგროვილი ქულები და გოლები გადმოჰყვათ. შესაბამისად, მეორე ტურამდე, ზედა ჯგუფს „კვარტალი“ ლიდერობდა. მას კი, ერთი ქულით ჩამორჩებოდა, ქვეყნის მოქმედი ჩემპიონი „ლანჩხუთი“. სწორედ, ეს გუნდები დაუპირისპირდნენ დღეს თბილისში, სფფ-ს ნუცუბიძის პლატოს საფეხბურთო ცენტრში ერთმანეთს.

დაძაბული ბრძოლის მოლოდინში, თამაშზე მოსული გულშემატკივრისთვის, სრული მოულოდნელობა გამოდგა, შეხვედრის მეორე წუთზე მასპინძელთა კარში გატანილი გოლი. „ლანჩხუთელმა“ ირინა ხაბურზანიამ, რომელიც აღნიშნული მატჩის ერთ-ერთი გამორჩეული მოთამაშე იყო, საჯარიმო დარტყმა შეასრულა. ბურთზე, „კვარტალის“ მეკარემ ითამაშა, თუმცა, უხერხულად მოიგერია. ბურთის შეჩერებას, თბილისელთა გუნდის მცველი ნათია წოწერია შეეცადა, თუმცა, საკუთარ კარში ჩაჭრა და ანგარიში გაიხსნა. მე-12 წუთზე „კვარტალმა“ სახიფათოდ შეუტია და თინათინ ამბალიამ ანგარიში გაათანაბრა. სხვათა შორის, ამ გოლამდე, „კვარტალს“ კიდევ ჰქონდა ორი სახიფათო მომენტი, თუმცა, ლანჩხუთელთა მეკარე ეკა თაბაგარი, მოწოდების სიმაღლეზე იდგა. აღსანიშნავია, რომ პირველი ტაიმი, საკმაოდ მაღალ ტემპში და ორმხრივი შეტევებით წარიმართა. მე-20 წუთზე კი, კვლავ, „ლანჩხუთელები“ დაწინაურდნენ. მოედნის ცენტრიდან, თეონა ბაქრაძემ კარგად შენიშნა ლესლი რამირესი, რომელმაც თვის მხრივ, ბურთი, ირინა ხაბურზანიას მისამართით გადაგზავნა. ამ უკანასკნელმა კი, ყოფილი თანაგუნდელის, თათია გაბუნიას კარის აღება მოახერხა. 30-ე წუთზე, საგოლე პოზიციაზე ირინა ხაბურზანია უკვე, ეთერ სულაშვილმა გაიყვანა, მასთან კი, თამაშის წესები სალომე გასვიანმა დაარღვია და თბილისელთა კარში პენალტი დაინიშნა. 11-მეტრიანი, ზუსტად დაარტყა თეონა ბაქრაძემ. შეიძლება ითქვას, რომ ამ გოლის შემდეგ, „კვარტალი“ ფსიქოლოგიურად გატყდა და ეს მგომარეობა, მას შემდეგ გამძაფრდა, რაც პირველი ტაიმის მიწურულს, ფიზიკური ორთაბრძოლის შემდეგ, შეხვედრის არბიტრმა, თბილისელთა მხრიდან წესების დარღვევა მიიჩნია და „კვარტალის“ კარში, კიდევ ერთი პენალტი დანიშნა. ბაქრაძე, ამ ჯერზეც ზუსტი იყო. მეორე ტაიმში, ანგარიში აღარ შეცვლილა. „ლანჩხუთმა“ 1-4 გაიმარჯვა და „კვარტალს“ სატურნირო ცხრილში, 2 ქულით გადაასწრო.

ქალთა ლიგის ზედა და ქვედა ჯგუფების მომდევნო, მესამე ტური 5 ოქტომბერს არის დაგეგმილი.