ქალთა ლიგის 2024 წლის ჩემპიონატი ოფიციალურად 16 ნოემბერს დასრულდება. ამ დღის ინტრიგად თბილისში, სფფ-ის ნუცუბიძის პლატოს საფეხბურთო ცენტრში დაგეგმილი დედაქალაქური დერბია, რომელშიც „კვარტალი“ - „ნიკე-ლუსოს“ დაუპირისპირდება. გათამაშების დასრულებამდე ერთი ტურით ადრე, გუნდებს თანაბარი 20-20 ქულა აქვთ და სწორედ, ბოლო ტურში გადაწყდება, თუ საბოლოოდ, რომელი კლუბი, რომელი ადგილით დაასრულებს ასპარეზობას.

რა თქმა უნდა, ბოლო ტურში, თეორიული შანსი რომ ქალთა ფეხბურთში ყველაზე ტიტულოვანი კლუბი „ლანჩხუთი“ ზედა ჯგუფის აუტსაიდერ „ბათუმთან“ დიდი ანგარიშით დამარცხდეს, ზემოთხსენებული წყვილიდან კი ერთ-ერთმა მოიგოს და სატურნირო ცხრილში ლიდერთან, „ლანჩხუთთან“ ქულები გაათანაბროს არის, თუმცა, ჩემპიონატის დებულების თანახმად, „ლანჩხუთს“ უშუალო კონკურენტებთან, დადებითი ბალანსი აქვს: „ნიკე-ლუსოსთან“, რეგულარული ჩემპიონატისა და ზედა ჯგუფში ჩატარებული შეხვედრებიდან, გურულების გუნდს 2 შეხვედრა მოგებული აქვს, ერთი ფრედ ჩატარებული და ერთიც წაგებული. რაც შეეხება „კვარტალს“, „ლანჩხუთის“ სასარგებლოდ, აქაც ანალოგიური მაჩვენებელია. შესაბამისად, ამ მოცემულობით, ჩემპიონატის დებულების სხვა მუხლები აღარ ამოქმედდება და „ლანჩხუთმაც“, დღეს, ევგრაფი შევარდნაძის სახელობის სტადიონზე, ჩემპიონატის დასრულებამდე ერთი ტურით ადრე მორიგი ტიტული იზეიმა. ქალთა ფეხბურთის მოყვარულებს შევახსენებთ, რომ ორჯერ ზედიზედ, 2016 და 2017 წლებში საქართველოს ჩემპიონობა ქუთაისის „მართვემ“ მოახერხა. მეორე ქართული გუნდი კი, ვინც ამის გაკეთება მოახერხა სწორედ, „ლანჩხუთია“, რომელმაც 2023 წელს მოგებული ტიტული დაიცვა. საერთო ჯამში კი, გიორგი ჩხეიძის გაწვრთნილი გუნდი ქვეყნის ჩემპიონი მეოთხედ გახდა. 

ზედა ჯგუფის დღევანდელი შეხვედრა „ლანჩხუთსა“ და „კვარტალს“ შორის ფრედ 1-1 დასრულდა. ანგარიში, 31-ე წუთზე სტუმრებმა გახსნეს. გოლი, ლიზი გოგალაძემ გაიტანა. გურულებმა ანგარიში, თითქმის თამაშის მიწურულს, 73-ე წუთზე ლელუ ჭიჭინაძის გოლის შემდეგ გაათანაბრეს და როგორც უკვე აღვნიშნეთ, ერთი ტურით ადრე, ქვეყნის ჩემპიონობა გაინაღდეს.

ზედა ჯგუფის მეორე შეხვედრაში, რომელიც თბილისში, „ნიუ ვიჟენის“ სტადიონზე გაიმართა, „ნიკე-ლუსომ“, „ბათუმს“ უმასპინძლა და ორბურთიანი სხვაობით, 2-0 დაამარცხა. თითო ტაიმში თითო და საერთო ჯამში დუბლი (29’, 71’) ნინო ბუხრიკიძის ანგარიშზეა.

იხილეთ ზედა ჯგუფის სატურნირო ცხრილი

ჩემპიონატის დასრულებამდე ერთი ტურით ადრე, ქვედა ჯგუფს დამაჯერებლად ლიდერობს „ნორჩი დინამო“, რომელიც დღეს, თბილისში, სფფ-ის ვარკეთილის საფეხბურთო ცენტრში სტუმრად, „ელიტას“ ეწვია და 2-0 დამარცხდა. უნდა აღნიშნოს, რომ „ელიტამ“, რომელიც ქალთა მთავარ ლიგას 2024 წლის სეზონის დასაწყისში შეუერთდა, წელი სტაბილურად ჩაატარა და პირველ წელს, ძლიერთა შორის ადგილიც დაიმკვიდრა. დღევანდელ შეხვედრაში კი, გოლები პირველ ტაიმში გავიდა. ანგარიში სწრაფი გოლით, მე-3 წუთზე თეკლე ბერიძემ გახსნა, მე-20 წუთზე თამრიკო კვალიაშვილის გატანილი გოლი კი, ამ შეხვედრაში ბოლო გამოდგა.

მეხუთე ტურში, ამ ჯგუფში კიდევ ერთი მატჩი ჩატარდა. ქუთაისში, სფფ-ის საფეხბურთო ცენტრში „მართვე“, გათამაშების აუტსაიდერს ხობის „კოლხეთს“ დაუპირისპირდა და 1-2 დამარცხდა. ანგარიში მე-14 წუთზე სალომე საღარაძემ გახსნა და „მართვემ“ პირველი ტაიმი მოიგო, თუმცა, მეორე ტაიმის დაწყებიდან მალევე, 53-ე წუთზე, ვიკა კურპეიშვილმა გათანაბრება მოახერხა. კიდევ 9 წუთში კი, ლიზი სახვაძის გოლმა, ხობელებს გამარჯვება მოუტანა.

ქალთა ლიგის ქვედა ჯგუფში, ბოლო ადგილზე, ხობის „კოლხეთია“ და ბოლო ტურამდე, ფლეი-აუთის ყველაზე რეალური კანდიდატია. ერთ-რაუნდიან ფლეი-აუთში კი, 16 ნოემბრის შემდეგ, საბოლოოდ ქვედა ჯგუფის ბოლო ადგილოსანი ქალთა ლიგა 2-ში მესამე ადგილზე გასულ „რაჭა 2020“-ს დაუპირისპირდება. 

იხილეთ ქვედა ჯგუფის სატურნირო ცხრილი

აქვე შეგახსენებთ, რომ 2025 წლის სეზონიდან ქალთა ლიგაში რვის ნაცვლად, ათი გუნდი იასპარეზებს. ქალთა ლიგაში ასპარეზობის უფლება, უკვე განაღდებული აქვთ „სამეგრელოს“ და „ვერეს“.