დღეს, ოფიციალურად დასრულდა საქართველოს ქალთა ლიგის 2024 წლის გათამაშება. საქართველოს მიმდინარე და საერთო ჯამში ოთხგზის ჩემპიონს „ლანჩხუთს“, ბათუმში, სფფ-ის საფეხბურთო ცენტრში, კუთვნილი თასი და ოქროს მედლები გადაეცა. გამარჯვებულები, რომლებიც 2025-2026 წლების სეზონზე საქართველოს წარადგენენ უეფა-ს ქალთა ჩემპიონთა ლიგაზე, კუთვნილი ჯილდოები სფფ-ის ვიცე-პრეზიდენტმა აკაკი ალადაშვილმა გადასცა.

თუმცა, დაჯილდოებამდე „ლანჩხუთმა“ სეზონის ბოლო შეხვედრა სტუმრად, აღნიშნულ სტადიონზე, თავსხმა წვიმაში „ბათუმის“ წინააღმდეგ ჩაატარა და 2-4 გაიმარჯვა. ანგარიში, გურულთა გუნდმა მე-6 წუთზე, თეონა ბაქრაძემ გახსნა. თუმცა, აჭარლები დანებებას, თუნდაც უკვე ჩემპიონთან, რომელსაც თამაშის დასაწყისში საპატიო დერეფანიც კი მოუწყვეს, არ აპირებდნენ. მე-10 წუთზე მათი აქტიურობის შემდეგ, ხელით თამაშისთვის, „ლანჩხუთის“ კარში 11-მეტრიანი დაინიშნა, რომელიც, გუნდის გამოცდილმა მოთამაშემ, დარინა სელიმბამ გოლით დაასრულა, 1-1.  33-ე წუთზე გამოცდილმა ლელუ ჭიჭინაძემ, ლანჩხუთელები ორი ბურთით დააწინაურა. 65-ე წუთზე გურულების თურქმა ლეგიონერმა, იამურ იალვაჩიმ, რომლის სახელიც წვიმას აღნიშნავს, მასპინძლებს მესამე გოლი გაუტანა. კიდევ რამდენიმე წუთში, ანა-მარია ბეჟამ ანგარიში ოთხამდე გაზარდა. თუმცა, ბოლო გოლი ამ შეხვედრაში მასპინძლებმა გაიტანეს. თეონა სუხაშვილის კარი, 70-ე წუთზე, აჭარული გუნდის მეგოლემ თათია შაინიძემ გაიტანა. საბოლოოდ, ზედა ჯგუფში, „ლანჩხუთმა“ 26 ქულა დააგროვა და ასპარეზობა პირველი ადგილით დაასრულა.

ზედა ჯგუფის ერთ შეხვედრაში, თბილისური დერბი უნდა შემდგარიყო, თუმცა, „კვარტალისა“ და „ნიკე-ლუსოს“ დაპირისპირებაში, სტუმართა გუნდს ტექნიკური წაგება ჩაწერა და შესაბამისად, ასპარეზობა მესამე ადგილით დაასრულა. „კვარტალი“, ვიცე-ჩემპიონია.

ზედა ჯგუფის სატურნირო ცხრილი იხილეთ ბმულზე.

უკვე საბოლოოდ, გაირკვა, რომ მომავალი სეზონიდან ძლიერთა შორის დასარჩენად ხობის „კოლხეთი“, ქალთა ლიგა 2-ის მესამე ადგილოსან „რაჭა 2020“-თან გაარკვევს ერთმატჩიან ფლეი-ოფში ურთიერთობას და ქალთა ლიგის საგზურის მფლობელის ვინაობას. მატჩის შესახებ მოგვიანებით გაცნობებთ.

ქალთა ლიგის ბოლო ტურში, ხობის კოლხეთი, საკუთარ, პაატა თათარიშვილის სახელობის სტადიონზე თბილისის „ელიტასთან“ 1-2 დამარცხდა.

1-2 მოუგო გასვლაზე ქუთაისის „მართვემ“ ტრადიციულ და მეტოქეს „ნორჩ დინამოს“, რომელმაც თავის მხრივ ქვედა ჯგუფი მოიგო. „მართვემ“ კი, საბოლოოდ, 14 ქულა დააგროვა და ქვედა ჯგუფში, მესამე ადგილზე გავიდა.

ქვედა ჯგუფის სატურნირო ცხრილი იხილეთ ბმულზე.