სანაკრებო შესვენების შემდეგ, 12 და 13 აპრილს ქალთა ლიგის 2025 წლის გათამაშება განახლდა. მე-5 ტურის თამაშებიდან, რომლებიც სამ სათამაშო დღეს გადანაწილდა, შაბათ კვირას ოთხი მატჩი გაიმართა და ოთხიდან, სამ შეხვედრაში, ანგარიში სწრაფი გოლით გაიხსნა.

საქართველოს მოქმედმა ჩემპიონმა „ლანჩხუთმა“, გვიმბალაურის სფფ-ის საფეხბურთო ცენტრში, გათამაშების აუტსაიდერს „ნორჩ დინამოს“ უმასპინძლა და დიდი ანგარიშით მოიგო. ანგარიში, პირველივე წუთზე, ქართული ფეხბურთის ერთ-ერთმა ვეტერანმა, ლელუ ჭიჭინაძემ გახსნა, რომელმაც პირველივე ტაიმში პოკერი (2', 20', 31', 43') შეასრულა. დუბლი გაიფორმა, პირველივე ტაიმში, ეთერ სულაშვილმა (8', 11), ანასტასია ბოლქვაძის (28') ანგარიშზე კი, შეხვედრის ამ მონაკვეთში ერთი გოლი იყო. „ლანჩხუთმა“ პირველი ტაიმი 7-0 მოიგო. სტაბილურად, პირველი ტაიმის მსგავსად, პოკერი (57' 61', 68', 81') შეასრულა და საბოლოოდ, 8 გოლით დაასრულა შეხვედრა ჭიჭინაძემ. დუბლს პოკერი (54', 78', 83', 90') დაამატა სულაშვილმაც და საბოლოოდ, 6 გოლი გაიტანა.  ამ ტაიმში, კი, თანაგუნდელებს ბოლქვაძემ აჯობა და ხუთი (52', 56', 71', 74', 87') გოლი  გაიტანა და საბოლოოდ, სულაშვილის მსგავსად, მანაც 6 გოლით დაასრულა აღნიშნული მატჩი. ლანჩხუთმა კი, 20-0 მოიგო და სატურნირო ცხრილში კვლავ დაუმარცხებელია. თუმცა, ისევე, როგორც „ნიკე-ლუსო“, რომელიც პირველ ადგილზე, თანაბარი ქულებით, მხოლოდ ორით მეტი გატანილი გოლის წყალობით არის.

სწრაფი გოლით გაიხსნა ანგარიში თბილისში, სფფ-ის დიდი დიღმის საფეხბურთო ცენტრში გამართულ შეხვედრაში, რომელშიც „ნიკე-ლუსომ“, „ვერეს“ უმასპინძლა. პირველივე წუთზე ნინო ბუხრიკიძემ გაიტანა. თამაში, როგორც მოსალოდნელი იყო, „ნიკე-ლუსოს“ უპირატესობით წარიმართა, თუმცა, სატურნირო ცხრილის ლიდერებმა პირველი მონაკვეთი მინიმალური ანგარიშით, 1-0 მოიგეს. ნიკელებმა, ტაიმის მიწურულს ორი კარგი შანსიც გაანიავეს. ერთში, კარი ლიკა მარკოიძემ იხსნა, მეორეში კი, კარის ხაზიდან ბურთო ლალო ბაბაიანმა გამოიტანა. მეორე ტაიმში, მასპინძლები უფრო გააქტიურდნენ და ჯერ 49-ე წუთზე დამუშავებული სტანდარტულით გოლის გატანა არ გასჭირვებია, გუნდის ლეგიონერს ზეჰრა ბორაზანჩიმ, 52-ე წუთზე კი, ნათია დანელიამ, სამბურთიანი სხვაობით დააწინაურა „ნიკე-ლუსო“. მიუხედავად იმისა, რომ საბოლოოდ, „ვერეს“ კარში 5 გოლი გავიდა, ალბათ, ორივე გუნდში საუკეთესო, სწორედ, ვერელთა მეკარე მარკოიძე იყო, რომელმაც, სხვა მოგერიებულ ბურთებს, ხატია ჭყონიასთვის აღებული პენალტიც ჩაიწერა აქტივში. თუმცა, ჭყონიამ მაინც გაიტანა, ხსენებული მომენტიდან სამ წუთში, 61-ე წუთზე. შეხვედრას წერტილი კი, 79-ე წუთზე სოფო ნარსიამ დაუსვა. „ნიკე-ლუსომ“ 5-0 მოიგო.

ქუთაისში, სფფ-ის საფეხბურთო ცენტრში, „მართვემ“ „სამეგრელოს“ უმასპინძლა. ანგარიში, მსაჯის მიერ პირველი ტაიმისთვის კომპენსირებულ დროში, „სამეგრელოს“ ლეგიონერის ჰილი ალიას გოლით გაიხსნა. მეორე ტაიმში, მე-60 წუთზე, ქუთაისელთა ახალწვეულმა და გამოცდილმა ქართველმა მცველმა, ნათია სხირტლაძემ, რომელიც ტრავმის შემდეგ დაუბრუნდა მინდორს, ანგარიში გაათანაბრა. თუმცა, 71-ე წუთზე, მასპინძლებს საკუთარ კარში ჩაეჭრათ გოლი, რაც ამ შეხვედრაში გადამწყვეტი გამოდგა. „სამეგრელომ“ 1-2 მოიგო და სატურნირო ცხრილში, 12 ქულით ლიდერ სამეულშია.

12 აპრილს, თბილისში, „ნიუ ვიჟენის“ საფეხბურთო მოედანზე, ქალთა ლიგის მეხუთე ტურის პირველი შეხვედრა გაიმართა. „ელიტა“, რომელიც აღნიშნულ ტურამდე, სატურნირო ცხრილში, ბოლოს წინა, მე-9 ადგილზე იყო, ქალთა ლიგის დებიუტანტ „რაჭა 2020“-ს დაუპირისპირდა, 3-1 გაიმარჯვა და საბოლოოდ, ცხრილში, ადგილიც გაუცვალა. თუმცა, ანგარიში ამ შეხვედრაში, სწრაფი გოლით, მე-2 წუთზე, ნინო მაისაშვილის გოლით, სტუმრებმა გახსნეს. თუმცა, მალევე, თბილისელთა გამოცდილმა ფეხბურთელმა, ანა ზაქაიძემ, წონასწორობა აღადგინა. თამაშის დაწებიდან ნახევარი საათის შემდეგ, „ელიტა“ უკვე ორბურთიანი სხვაობით 3-1 იგებდა. თბილისელთაგან გოლები,  ჯესიკა შეარსმა (15’) და მარიამ დანელიამ (30’) გაიტანეს. სხვათა შორის, თამაშის მიწურულს ერთი გოლის გაქვითვის შესაძლებლობა რაჭველებსაც ჰქონდათ, თუმცა, 81-ე წუთზე 11-მეტრიანი გააცუდეს.

ქალთა ლიგის მეხუთე ტურის გადადებული შეხვედრა 30 აპრილს, ბათუმში, ლეონიძის საფეხბურთო ცენტრში გაიმართა. „ბათუმმა“, თბილისის „კვარტალს“ უმასპინძლა და 1-2 დამარცხდა. შეხვედრის დასაწყისი საკმაოდ დაძაბული გამოდგა. ორივე გუნდი ცდილობდა უპირატესობის მოპოვებას, რაც პირველი სტუმრებმა მოახერხეს. ანგარიში 30-ე წუთზე თინათინ ამბალიამ გახსნა, თუმცა, მალევე ბათუმელებმა გათანაბრება მოახერხეს. 35-ე წუთზე,  საპასუხო გოლი თათია შაინიძემ  გაიტანა. ამ შეხვედრაში, გადამწყვეტი მეორე ტაიმის სტარტი გამოდგა, რა დროსაც „კვარტალმა“ კიდევ ერთხელ მოახერხა დაწინაურება. 47-ე წუთზე ლიზი გოგოლაძის გატანილმა გოლმა, სტუმრები კვლავ, ერთი ბურთით გაიყვანა წინ. ამასთან, სწორედ ეს მომენტი აღმოჩნდა გადამწყვეტი - ბათუმელებმა, თამაშის შემოტრიალება ვეღარ მოახერხეს.

რაც შეეხება მომდევნო, მე-6 ტურს, ის, 17 აპრილს არის ჩანიშნული. ტურის ცენტრალური შეხვედრა გვიმბალაურში, სფფ-ის საფეხბურთო ცენტრში გაიმართება და „ლანჩხუთი“, „ნიკე-ლუსოს“ უმასპინძლებს.