დღეს, ქალთა ლიგის მერვე ტური გაიმართა, რომლის შემდეგაც სატურნირო ცხრილში, ორხელისუფლებიანობა დროებით დასრულდა და გათამაშებას 22 ქულით „ნიკე-ლუსო“ ჩაუდგა სათავეში. ბომბარდირთა დავაში, 8 ტურის შემდეგ, 16 გატანილი გოლით კი, „კვარტალისა“ და საქართველოს ქალთა ეროვნული ნაკრების ფეხბურთელი, თინათინ ამბალია ლიდერობს. მასზე ერთი გოლით (15) ნაკლები აქვს გატანილი ლანჩხუთელ ეთერ სულაშვილს. დღევანდელ ტურში, ორივე ფეხბურთელმა გაიტანა.

თბილისურმა კლუბმა დღეს, მორიგი 3 ქულა, „ნიუ ვიჟენის“ სტადიონზე მოიპოვა. „ელიტასთან“ შეხვედრაში, „ნიკე-ლუსომ“ 0-2 გაიმარჯვა. ანგარიში, მე-17 წუთზე ირინა ხაბურზანიამ გახსნა. კიდევ ერთი გოლი სტუმრებმა მეორე ტაიმში, 82-ე წუთზე გაიტანეს. მისი ავტორია ზეჰრა ბორაზანჯი, რომელიც ტრადიციულად, ერთ-ერთი გამორჩეული იყო დღევანდელ შეხვედრაშიც. ამ ტურის შემდეგ, „ნიკე-ლუსომ“, ორი ქულით გადაასწრო „ლანჩხუთს“, რომელმაც მე-8 ტურში ქულები დაკარგა.

გვიმბალაურის სფფ-ის საფეხბურთო ცენტრში, ტურის ცენტრალური შეხვედრა მოქმედ ჩემპიონ „ლანჩხუთსა“ და „სამეგრელოს“ შორის, რომელიც პირდაპირ ეთერში სფფ-ის YouTube გვერდით გადაიცა და როგორც მოსალოდნელი იყო, საკმაოდ დაძაბულიც გამოდგა. თამაში, გარდამავალი უპირატესობით წარიმართა, თუმცა, მასპინძლებმა, მაინც მოახერხეს ბურთის გაკონტროლება და ალბათ, რომ არა ორი შეცდომა, რომელიც გაეპარათ, შესაძლოა, ანგარიშიც სხვა ყოფილიყო. ანგარიში კი, მე-8 წუთზე ანა გობრონიძის სწრაფი გოლით გაიხსნა, რომელმაც ყოფილ გუნდის გამოცდილ მეკარეს, თათია გაბუნიას ბურთი, ტექნიკურად თავზე გადაუგდო. საყურადღებოა, რომ „ლანჩხუთმა“ პირველად კარის მიმართულებით, მხოლოდ, 34-ე წუთზე დაარტყა, მცდელობა ეთერ სულაშვილს ჰქონდა. თუმცა, მალევე, 39-ე წუთზე, ლელუ ჭიჭინაძემ ანგარიშის გათანაბრება მოახერხა და გუნდებიც შესვენებაზე საყაიმო ანგარიშით, 1-1 გავიდნენ. მეორე ტაიმი, გიორგი ჩხაიძის გუნდმა უფრო აქტიურად დაიწყო. ალბათ, აქვე უნდა აღვნიშნოთ, რომ ამ დღეს, სტუმრებს მხსნელად, მეკარე - ეკა თაბაგარი მოევლინათ, რომელიც გასულ სეზონში, „ლანჩხუთის“ კარს იცავდა და ჩემპიონობაც ამ გუნდთან ერთად იზეიმა. თუმცა, დღეს მოწინააღმდეგე გუნდის კარის მცველი იყო და „სამეგრელოს“ კარში გასული მეორე გოლის მომენტში, მანაც კი, ვერ უშველა გუნდს. 67-ე წუთზე, გოლი ეთერ სულაშვილმა გაიტანა. მასპინძლებმა, გვარიანად, დაწინაურების გამო ვერც იზეიმეს, რადგან ძალიან მალევე, მეგრული კლუბის ლეგიონერმა, ალია ჰილმა კარიდან გამოსული თათია გაბუნია შენიშნა და საჯარიმოს გარედან გაუტანა გოლი.  შეხვედრა ფრედ, 2-2 დასრულდა. „ლანჩხუთმა“ ქულები დაკარგა, „სამეგრელო“ კი, 3 ქულაში მიუახლოვდა მეორე ადგილოსან გურულთა გუნდს.

თავის მხრივ, ერთი ქულა აშორებს და 18 ქულით მეოთხე ადგილზეა თბილისის „კვარტალი“, რომელმაც სფფ-ის საფეხბურთო ცენტრში დღეს, ქუთაისის „მართვეს“ უმასპინძლა და უხვგოლიან შეხვედრაში 5-3 დაამარცხა. პრაქტიკულად, „კვარტალმა“ „საქმე“ პირველივე ტაიმში გააკეთა, როდესაც 5-0 იმარჯვა. ანგარიში, სწრაფი გოლით ნინო პასიკაშვილმა გახსნა, რომელმაც დუბლიც (2’, 33’) გაიფორმა. თითო გოლი ნათია წოწერიამ (30’), ლიზი გოგალაძემ (36’) და თინათინ ამბალიამ (41’) გაიტანეს. მეორე ტაიმშიც, გოლების ათვლა მასპინძლებმა დაიწყეს, თუმცა, ეს 66-ე წუთზე საკუთარ კარში გატანილი გოლი იყო. ტაიმის მიწურულს, ქუთათურებმა მაინც მოახერხეს ორი გოლის გატანა, 75-ე წუთზე ეს, მანონი საღარაძემ, 81-ე წუთზე კი, თამარ მარუაშვილმა გააკეთეს.

ამბროლაურში, აგრანო ვაჩაძის სახელობის სტადიონზე, ქალთა ლიგის დებიუტანტმა „რაჭა 2020“-მა „ვერე“ 3-0 დაამარცხა. მშრალი პირველი ტაიმის შემდეგ, მეორეში ბარბარე ჭელიძემ ჰეთ-თრიქი (49’, 74’, 78’) შეასრულა და რაჭულ გუნდს პირველი 3 ქულა მოუტანა მიმდინარე ჩემპიონატში.

ბათუმში, ლეონიძის საფეხბურთო ცენტრში, ადგილობრივმა „ბათუმმა“, გათამაშების აუტსაიდერს, „ნორჩ დინამოს“ უმასპინძლა და დიდი ანგარიშით 12-1 დაამარცხა. ამ შეხვედრაში ანგარიში ნატა მიქელაძემ (13’-პ, 14’, 33’) 11 მეტრიანით გახსნა და პირველ ტაიმშივე ჰეთ-თრიქი შეასრულა. თანაგუნდელზე ერთი გოლი მეტი გაიტანა მარიამ მოდრეკილაძემ (16’, 27’, 71’, 89’), რომელსაც ბათუმელთა რიგებში დებიუტი ჰქონდა. სხვათა შორის, კიდევ ერთმა ფეხბურთელმა, დიანა ბაქრაძემ (41’) სადებიუტო თამაში გოლით აღნიშნა. აჭარლებმა პირველი ტაიმი 6-1 მოიგეს. „ნორჩი დინამოდან“ ამ ტაიმშიც და მატჩშიც, ერთადერთი გოლის გატანა 37-ე წუთზე ნატა ბეჟანიშვილმა მოახერხა. სხვათა შორის, ეს იყო აღნიშნული გუნდისთვის პირველი გატანილი გოლი მიმდინარე ჩემპიონატში. მეორე ტაიმში, აჭარლებმა კიდევ გაზარდეს უპირატესობა. უკვე ხსენებული ფეხბურთელების გარდა, გოლები გაიტანეს ელენე ბოლქვაძემ (47’), ნათია თავართქილაძემ (66’), ლიზი დიასამიძემ (82’-პ) და თამრიკო სალუქვაძემ (88’).

ქალთა ლიგის მომდევნო, მეცხრე ტური კვირას, 11 მაისს არის დანიშნული.