ქალთა ლიგის რეგულარული ჩემპიონატის პირველი წრე დასრულდა. ვიდრე უშუალოდ მე-9 ტურის შეხვედრებს მიმოვიხილავთ, გეტყვით, რომ პირველ წრეში, საშუალოდ ტურში 32 გოლი გადიოდა. ამ მომენტისთვის ბომბარდირთა სიას სათავეში კი, 17 გატანილი გოლით, ეთერ სულაშვილი უდგას  „ლანჩხუთიდან“. 16 გოლი აქვს გატანილი თინათინ ამბალიას თბილისის „კვარტალიდან“, 13 გატანილი გოლით, მესამე პოზიციაზეა ანასტასია ბოლქვაძე, 12 გოლი აქვს გატანილი ლელუ ჭიჭინაძეს (ორივე „ლანჩხუთი“). რაც შეეხება სატურნირო ცხრილს, რეგულარული ჩემპიონატის პირველი წრის შემდეგ, სათავეში „ნიკე-ლუსოა“, რომელიც 2 ქულით უსწრებს, მეორე ადგილზე მყოფ „ლანჩხუთს“.

მე-9 ტურის ცენტრალური შეხვედრა კი,  ჩხოროწყუში, ბონდო პაპასკირის სახელობის სტადიონზე გაიმართა, რომელშიც,  მესამე და მეოთხე ადგილებზე მყოფი „სამეგრელო“ და „კვარტალი“ დაუპირისპირდნენ. გუნდებს შორის სხვაობა კი, მხოლოდ ერთი ქულა იყო. შეხვედრაში, რომელშიც მიუხედავად იმისა, რომ გოლები პირველ ტაიმში გავიდა, ალბათ, უფრო სანახაობრივი მეორე ტაიმი იყო, ანგარიში, მე-4 წუთზე, სტუმრებმა, მარიამ ცისკარიშვილის გოლით გახსნეს. მე-12 წუთზე მეგრელთა გუნდის ლეგიონერმა, ჩისომ ონივეუენიმ წონასწორობა აღადგინა. მეორე ტაიმში, დაწინაურების შესაძლებლობა ჰქონდა „კვარტალს“, თუმცა, 11-მეტრიანი ლიზი გოგოლაძემ გააცუდა. შეხვედრა კი, ფრედ, 1-1 დასრულდა და გუნდებმა ქულები გაინაწილეს.

თბილისში, სფფ-ის ვარკეთილის საფეხბურთო ცენტრში, „ვერემ“, ქვეყნის მოქმედ ჩემპიონს, „ლანჩხუთს“ უმასპინძლა და 1-4 დამარცხდა. ანგარში, მე-9 წუთზე, გამოცდილმა ტატა მატვეევამ გახსნა. ეთერ სულაშვილის მიერ, მე-17 წუთზე გატანილი გოლით კი, სტუმრებმა პირველი ტაიმი 0-2 მოიგეს. მეორე ტაიმის სტარტზევე, 47-ე წუთზე, ანასტასია ბოლქვაძემ, „ვერეს“ კარი მესამედ აიღო. თუმცა, მასპინძლები მაინც შეეცადნენ წინააღმდეგობის გაწევას და შეხვედრის ბოლო ათწუთეულში დაუფასდათ კიდეც. ლანჩხუთელებმა წესები დაარღვიეს, 11-მეტრიანი კი, 81-ე წუთზე, ანი კულდონაშვილმა გაიტანა. თამაშის ბოლო წუთზე, სულაშვილმა დუბლი გაიფორმა და პირველი წრის შემდეგ, 17 გატანილი გოლით ბომბარდირთა დავას ჩაუდგა სათავეში.

კიდევ ერთ თბილისურ შეხვედრაში, გათამაშების ლიდერმა, „ნიკე-ლუსომ“ მორიგი სამი ქულა ჩაიწერა აქტივში. ამჯერად, ნიკელებმა, „ბათუმი“ დაამარცხეს 3-0. სფფ-ის დიდი დიღმის საფეხბურთო ცენტრში, გოლები პირველ ტაიმში გავიდა. მასპინძლები, 21-ე წუთზე იულია სლიასარჩიკმა დააწინაურა. 39-ე წუთზე გაიტანა ლიზი მწყერაშვილმა, ტაიმის მიწურულს კი, 41-ე წუთზე, ირინა ხაბურზანიამ  ამ შეხვედრაში ბოლოჯერ აიღო ბათუმელთა კარი. „ნიკე ლუსო“ პირველი წრის შემდეგ, მხოლოდ ერთი მატჩი ითამაშა ფრედ, დანარჩენში კი მაქსიმალური ქულები დააგროვა. 

„რაჭა 2020“-მა სატურნირო ცხრილში, ორი ქულით გადაასწრო ქუთაისის „მართვეს“. ამბროლაურელებმა დღეს, თბილისში, სფფ-ის გლდანის საფეხბურთო ცენტრში, დიდი ანგარიშით 0-13 „ნორჩი დინამო“ დაამარცხეს. რაჭველთაგან ორმა ფეხბურთელმა, გვანცა ძოწენიძემ (10’, 35’, 66’) და  მუნოსიბ მადინა (26’, 31’, 80’) სამ-სამი გოლი გაიტანეს, ხოლო, კესო მეტონიძემ (6’პ, 13’-პ, 74’, 85’), რომელმაც ამ შეხვედრაში გოლების ათვლა დაიწყო, პოკერი შეასრულა. თითო გოლი ბარბარე ჭელიძემ (15’), ნინო მაისაშვილმა (51’) და ნინო ჭელიძემ (55’) გაიტანეს.

და დღევანდელი ტურის ბოლო შეხვედრა, რომელიც სფფ-ის YouTube არით გადაიცა, ქუთაისის სფფ-ის საფეხბურთო ცენტრში ჩატარდა. ადგილობრივმა „მართვემ“, თბილისის „ელიტა“ მიიღო და 1-2 დამარცხდა. ანგარიშიც ამ შეხვედრაში სტუმრებმა გახსნეს. ჯესიკა შირზიმ, მისივე მოპოვებული 11-მეტრიანი გამოიყენა 22-ე წუთზე. სხვათა შორის, თბილისელთა ეს ლეგიონერი, დღევანდელი შეხვედრის გამორჩეული მოთამაშე იყო. უნდა აღინიშნოს, რომ მასპინძლებმა მალევე მოახერხეს ანგარიშის გათანაბრება. სტანდარტულიდან გოლი გამოცდილმა თეონა თოდაძემ გაიტანა. მეორე ტაიმში კი, სტუმრები უკეთესად ათამაშდნენ. ანგარიშს გაზრდის რამდენიმე შანსიც ჰქონდათ, თუმცა, გოლის გატანა მხოლოდ, 73-ე წუთზე მოახერხეს, როდესაც ნატა კვირკაიამ, „ელიტასთვის“ გამარჯვების გოლი გაიტანა, გუნდმა სამი ქულა მოიპოვა და სატურნირო ცხრილში, „ბათუმს“ გადაასწრო.

ქალთა ლიგის მეორე წრე და შესაბამისად, მე-10 ტური, 17 მაისს არის ჩანიშნული.