ხანგრძლივი სანაკრებო შესვენების შემდეგ, დღეს საქართველოს ქალთა ლიგის გათამაშება განახლდა. მე-11 ტურის მატჩებიდან, დღეს მხოლოდ, ოთხი გაიმართა და ოთხივე თბილისში, სფფ-ის სხვადასხვა ტექნიკურ ცენტრში ჩატარდა. აქვე გეტყვით, რომ გათამაშებას 31 ქულით, „ნიკე ლუსო“ ლიდერობს.

ტურის ცენტრალური მატჩი, სფფ-ის ნუცუბიძის პლატოს საფეხბურთო ცენტრში გაიმართა. „კვარტალმა“, ქვეყნის მოქმედ ჩემპიონს, „ლანჩხუთს“ უმასპინძლა. ალბათ, როგორც მოსალოდნელი იყო, თამაშში, „ამინდს“ სტუმრები ქმნიდნენ, თუმცა, მასპინძლებმა მოახერხეს თანაბარი პირველი ტაიმი ეთამაშათ. ამასთან, შეხვედრის საწყის წუთებზე, თინათინ ამბალიას, გოლის გატანაც კი შეეძლო. თუმცა, მშრალი ტაიმის შემდეგ, სტუმრებმა მეორე ნახევარი აქტიურად დაიწყეს. ლანჩხუთელთაგან, კარგად უტევდა ფლანგიდან ეთერ სულაშვილი, თუმცა, დაბოლოებაზე რამდენჯერმე სიზუსტე დააკლდა ანასტასია ბოლქვაძეს, რომელმაც ამ შეხვედრაში ბევრი მომენტი გააცუდა, თუმცა, მაინც გაიტანა, 89-ე წუთზე. ანგარიში კი, 59-ე წუთზე ლანჩხუთელთა ლეგიონერმა პალინა ჰირჩიცმა გაიტანა. სხვათა შორის, ბოლქვაძის გოლშიც, რომელი ანანო წიქარიძის გადაცემის შემდეგ გავიდა, ჰირჩიცის დიდი წვლილი იყო, რადგან შეტევა, სწორედ მან დაიწყო. ამ შეხვედრაში კი, წერტილი მასჯის მიერ კომპენსირებული დროის მე-4 წუთზე, ეთერ სულაშვილმა გაიტანა. „ლანჩხუთმა“ 0-3 გაიმარჯვა და მნიშვნელოვანი ქულები მოიპოვა გათამაშებაში. გუნდის გოლეადორის ეთერ სულაშვილის ანგარიშზე კი, უკვე, 19 გოლია.

სფფ-ის დიდი დიღმის საფეხბურთო ცენტრში, გათამაშების ლიდერმა „ნიკე-ლუსომ“, ქალთა ლიგის დებიუტანტ „რაჭა 2020“-ს უმასპინძლა და დიდი ანგარიშით, 9-0 დაამარცხა. ანგარიში მე-5 წუთზე სოლანჟი კარვალიაშმა გახსნა და „ნიკე-ლუსო“ დააწინაურა, თუმცა, სწრაფი გოლის მიუხედავად, პირველ ტაიმში მასპინძლებმა მხოლოდ, 3 გოლი გაიტანეს. მეორე ტაიმში, შეცვლაზე შემოსულმა თეონა ბაქრაძემ კი, ერთ ტაიმში გაიტანა სამი (62’, 67’, 71’) გოლი. ზოგადად, სანაკრებო თამაშებიდან დაბრუნებულმა თითქმის ყველა ფეხბურთელმა საკლუბო შეხვედრაში გოლებით აღნიშნა დაბრუნება: ანა აკობიძე (24’), ნათია დანელია (39’), ზეჰრა ბორაზანჯი (59’), ირინა ხაბურზანი (65’), ნინო ბუხრიკიძე (76’). რაც შეეხება თეონა ბაქრაძეს, დღევანდელი ჰეთ-თრიქის შემდეგ, მიმდინარე სეზონში ბომბარდირთა დავაში, სულაშვილის მსგავსად, მანაც 19 გოლი დააგროვა.

სფფ-ის გლდანის საფეხბურთო ცენტრში „ნორჩმა დინამომ“ ქუთაისის „მართვეს“ უმასპინძლა და 0-10 დამარცხდა. სწრაფი გოლით გაიხსნა ანგარიში ამ შეხვედრაშიც. გოლების ათვლა მანონი საღარაძემ (5’) დაიწყო. ამ ტაიმში გაიტანეს თამარ მარუაშვილი (16’, 44’), მარიამ სოფრომაძე (35’-პ) და ნათია სხირტლაძემ (43’). მეორე ტაიმში კი, გოლები მხოლოდ ანა ჯანელიძე (51’, 66’ 81’, 88’) გაჰქონდა.  ალბათ, ერთადერთი გამონაკლისი, ბარბარე მანაგაძე იყო, რომელმაც 61-ე წუთზე გაუტანა მასპინძლებს. „მართვემ“ კი, ამ მოგებით სატურნირო ცხრილში „რაჭა 2020“-ს გადაასწრო.

სფფ-ის ვაკრეთილის საფეხბურთო ცენტრში კი, ორი თბილისური კლუბი „ელიტა“ და „ვერე“ დაუპირისპირდნენ ერთმანეთს. დღევანდელი ტურის სხვა მატჩების მსგავსად, ეს შეხვედრაც უხვგოლიანი გამოდგა. ანგარიში კი, 37-ე წუთზე, ელიტელთა გამოცდილმა მოთამაშემ ანა კირვალიძემ გახსნა და მეორე ტაიმში 58-ე წუთზე დუბლიც გაიფორმა. დუბლი შეასრულა მასპინძელთა ლეგიონერმა ჯესიკა შირზიმაც, რომელსაც „ელიტას“ რიგებში, თითქმის ყველა თამაშში სტაბილურად გააქვს. 11 ტურის შემდეგ ელიტას 18 ქულა აქვს და მხოლოდ, ორი ქულით ჩამორჩება სატურნირო ცხრილის პირველ ოთხეულს.

ამ ტურის კიდევ ერთი თამაში, „ბათუმსა“ და „სამეგრელოს“ შორის 19 ივნისისთვის არის გადადებული.

ქალთა ლიგის მე-12 ტური 15 ივნისს არის ჩანიშნული.