15 და 16 ივნისს საქართველოს ქალთა ლიგის მე-12 ტური გაიმართა, რომელმაც სატურნირო ცხრილში, რამდენიმე ცვლილება შეიტანა. კერძოდ, „სამეგრელომ“, რომელსაც ერთი გადადებული შეხვედრა აქვს გასამართი 19 ივნისს, ამ ტურის შემდეგ, 23 ქულა დააგროვა და მესამე ადგილზე აინაცვლა.

ქუთაისში, სფფ-ის საფეხბურთო ცენტრში ადგილობრივმა „მართვემ“ გათამაშების ლიდერი „ნიკე-ლუსო“ მიიღო. ანგარიში სწრაფი გოლით, თბილისური კლუბის თურქმა ლეგიონერმა იამურ იალჩინმა  (4’, 18’) გახსნა და პირველ ტაიმშივე მოახერხა დუბლის გაკეთებაც. პირველ ტაიმში გაიტანა ერთი და ასევე დუბლი შეასრულა , თეონა ბაქრაძემ (28’, 67’), რომელსაც 12 ტურის შემდეგ, 21 გოლი აქვს გატანილი და მიმდინარე გათამაშებაში ბომბარდირთა დავას ლიდერობს. მე-12 ტურის ქუთაისურ შეხვედრაში, კი, თამაში სტუმართა კარნახით წარიმართა, უკვე აღნიშნული გოლების გარდა  ირინა ხაბურზანიამ (18’) და იულია სლიასარჩიკმაც  (87’) გაიტანეს და საბოლოოდ, ანგარიშით 0-6 მოიგეს.

მე-8 წუთზე, მარიამ კალანდაძის გოლით გაიხსნა ანგარიში „ლანჩხუთისა“ და თბილისის „ელიტას“ დაპირისპირებაში, რომელიც  გვიმბალაურის სფფ-ის საფეხბურთო ცენტრში გაიმართა. მიუხედავად იმისა, რომ აღნიშნულ შეხვედრაში დომინანტი, ქვეყნის მოქმედი ჩემპიონი იყო, სტუმრებმა 42-ე წუთზე ანგარიშის გათანაბრება მოახერხეს - ეთერ სულაშვილისა და თათია გაბუნიას შეუთანხმებელ მოქმედებას, მასპინძელთა კარში დანიშნული პენალტი მოჰყვა, რომელიც, ჯესიკა შირზიმ ზუსტად გამოიყენა. 78-ე წუთზე კი, სოფო ბერულავამ „ელიტა“ დააწინაურა. მატჩის მიწურულს, გამოცდილმა ლანჩხუთელებმა მეტოქეზე ზეწოლა გააძლიერეს და შედეგად, მსაჯის მიერ კომპენსირებულ დროში, ორი 11-მეტრიანიც გამოიმუშავეს, რომელიც, ჯერ ტატა მატვეევამ გაიტანა (90’+1) და შემდეგ, ლელუ ჭიჭინაძემ (90’+7). საბოლოოდ კი, „ლანჩხუთმა“ მოახერხა გამარჯვება 3-2 და სატურნირო ცხრილში, უშუალო მეტოქეს, კვლავ 2 ქულით ჩამორჩება.

ფრედ, 0-0 დასრულდა შეხვედრა თბილისში, სფფ-ის ვარკეთილის საფეხბურთო ცენტრში, სადაც „ვერემ“, „ბათუმს“ უმასპინძლა. აჭარულ გუნდს, რომელიც ზედა ოთხეულში მოსახვედრად იბრძვის, ახლა 14 ქულა აქვს, ერთით ნაკლები ჩატარებული თამაში. თუმცა, რეგულარული ჩემპიონატის დასრულებამდე, გუნდს, კვლავ რჩება შანსი, ზედა ოთხეულში მოსახვედრად. მე-12 ტურის ეს შეხვედრა კი, სფფ-ის YouTube არხით გადაიცემოდა.

ამასობაში, „სამეგრელომ“  ჩხოროწყუში, ბონდო პაპასკირის სახელობის სტადიონზე, გათამაშების აუტსაიდერი, „ნორჩი დინამო“ მიიღო და დიდი ანგარიშით, 9-1 დაამარცხა. ანგარიშის მიუხედავად, პირველი გოლი, ამ შეხვედრაში მხოლოდ, 25-ე წუთზე გავიდა. მეგრული გუნდი, ლეგიონერმა ჩისომ ონიევუენიმ დააწინაურა. აღსანიშნავია, რომ ფეხბურთელმა მინდორზე სრული შეხვედრა ჩაატარა და ორივე ტაიმში 3-3 გოლი (25’, 28’, 36’ 65’, 85’, 87’) გაიტანა. მეგრელთა გუნდიდან თითო გოლი მარიამ გორიზიამ (45’+1), ბარბარე ბერიამ (48’) და თამარ მოდებაძემ (48’) გაიტანეს. სხვათა შორის, თბილისელებმა პირველ გოლს, მალევე უპასუხეს. თამარ მეგრელიშვილმა 26-ე წუთზე გაათანაბრა ანგარიში, თუმცა, ამის მეტი სტუმრებმა ვერ შეძლეს.

ტურის ბოლო შეხვედრა, 16 ივნისს,  ამბროლაურში, აგრანო ვაჩაძეს სახელობის სტადიონზე გაიმართა. გათამაშების დებიუტანტმა „რაჭა 2020“-მა, ქალთა ლიგის ერთ-ერთი თვითმყოფადი და ტრადიციული გუნდი „კვარტალი“ 3-1 დაამარცხა. ამ შეხვედრაში, ანგარიშის გახსნის საშუალება, თამაშის დაწყებიდან მალევე ჰქონდათ სტუმრებს, თუმცა, თინათინ ამბალიამ მე-5 წუთზე პენალტი გააცუდა. 36-ე წუთზე კი, 11-მეტრიანიდან თავისი შანსი კესო მეტონიძემ გამოიყენა და მასპინძლები დააწინაურა. ამ ტაიმში, კიდევ ერთი პენალტი დაინიშნა, რომელიც მსაჯის მიერ კომპენსირებულ დროში კვლავ თინათინ ამბალიამ, ამჯერად, ზუსტად შეასრულა და გუნდები შესვენებაზე საყაიმო ანგარიშით, 1-1 გავიდნენ. 52-ე წუთზე მარიამ ფართლაძემ კვლავ დააწინაურა მასპინძლები, შეხვედრის ბოლოს, მსაჯის მიერ კომპენსირებულ დროში კი, მეტონიძემ დუბლი გაიფორმა.

ქალთა ლიგის მომდევნო ტური 22 ივნისს არის ჩანიშნული. თუმცა, მანამდე 19 ივნისს, „ბათუმი“ და „სამეგრელო“ მე-11 ტურის გადადებულ შეხვედრას ითამაშებენ.