22 ივნისს, ქალთა ლიგის მე-13 ტურის შეხვედრები გაიმართა. რეგულარული ჩემპიონატის დასრულებამდე 5 ტურით ადრე, სატურნირო ცხრილის სათავეში კვლავ, „ნიკე-ლუსო“ არის 37 ქულით. ორი ქულით ნაკლები, 35 ქულა აქვს „ლანჩხუთს“, რომელიც ფეხდაფეხ მიჰყვება ლიდერს, ზედა ოთხეულში მოხვედრის კარგი შანსი კი, ამ ეტაპზე „სამეგრელოსა“ და „კვარტალს“ აქვთ, თუმცა, შეგახსენებთ, ჯერ კიდევ 5 ტური არის წინ. 

ილია კოკაიას სახელობის საფეხბურთო ცენტრში, „ნორჩმა დინამომ“ „ვერეს“ უმასპინძლა და 0-6 დამარცხდა. თბილისური კლუბების დაპირისპირებაში, 23-ე წუთზე მარია-იზაბელა მელიქიშვილმა გახსნა ანგარიში. 32-ე წუთზე ლიზი ნიშნიანიძემ სტუმრები ორი ბურთით დააწინაურა, მე-40 წუთზე თამარ ეპიტაშვილის გატანილი გოლით კი, პირველი ტაიმი „ვერემ“ 3-0 მოიგო. ეპიტაშვილმა (55’) და  ნიშნიანიძემ (69’) მეორე ტაიმში დუბლი გაიფორმეს. შეხვედრაში კი, წერტილი 83-ე წუთზე ნინო აბულაძემ დასვა.

ქუთაისში, სფფ-ის საფეხბურთო ცენტრში, „მართვემ“ მინიმალური ანგარიშით 1-0, „რაჭა 2020“ დაამარცხა. ამ შეხვედრაში ერთადერთი გოლი, 26-ე წუთზე ანა ჯანელიძემ გაიტანა. უშუალო მეტოქესთან აღებული 3 ქულის წყალობით, ქუთაისურმა კლუბმა, 13 ტურის შემდეგ, 11 ქულა დააგროვა და ერთი ქულით გადაუსწრო გათამაშების დებიუტანტ „რაჭა 2020“-ს.

გათამაშების ლიდერმა „ნიკე-ლუსომ“ თბილისში, სფფ-ის დიდი დიღმის საფეხბურთო ცენტრში „სამეგრელო“, დიდი ანგარიშით 18-0 დაამარცხა. მასპინძლებმა თითო ტაიმში 9 გოლის გატანა მოახერხეს, ნიკელთა დღევანდელი გოლეადორებიდან კი, ყველაზე შედეგიანი, თეკლა ბერიძე (15’, 22’, 28’, 55’, 62’, 81’) იყო, რომელიც ჰექსტრიკის ავტორი გახდა. პოკერი შეასრულა ნინო ბუხრიკიძე (8’, 23’, 32’, 43’), დუბლი კი, ორი ფეხბურთელის - ანასტასია ბუჩუკურისა (5’, 64’) და იამურ იალვაჩის (26’, 50’) ანგარიშზეა. ამ დღეს, მხოლოდ ერთი გოლით შემოიფარგლნენ ქეთევან სუხაშვილი (46’), თეონა ბაქრაძე (64’), ანი აკობიძე (65’) და ლიზი მწყერაშვილი (70’). აქვე გეტყვით, რომ გათამაშების ბომბარდირთა დავას, 22 გატანილი გოლით კვლავ, თეონა ბაქრაძე ლიდერობს.

20 გატანილი გოლი აქვს და ბომბარდირთა დავაში მეორე საფეხურზეა ეთერ სულაშვილი, რომელმაც ამჯერად, თავი, „ბათუმთან“ შეხვედრაში გამოიჩინა. ჯონი ბაკურიძის სახელობის სტადიონზე „ბათუმისა“ და „ლანჩხუთის“ დაპირისპირებაში ანგარიში სტუმრებმა მე-9 წუთზე ეთერ სულაშვილის გოლით გახსნეს. 39-ე წუთზე კი, გაბრიელა კამარგოს ავტოგოლის შემდეგ, რომელიც ლანჩხუთელთა შეტევების ლოგიკური გაგრძელება უფრო იყო, სტუმრებმა ის სათამაშო უპირატესობა, რომელიც მთლიანად თამაშში იგრძნობოდა, ანგარიშში გამოსახეს. მართალია, მესამე გოლი ლანჩხუთელმა ტატა მატვეევამ, მხოლოდ, 70-ე წუთზე გაიტანა, თუმცა, შეხვედრა, როგორც უკვე აღვნიშნეთ, სტუმართა კარნახით წარიმართა. მიუხედავად ამისა, აუცილებლად გამოსაყოფია ორი მომენტიც, თითო ტაიმში, რომელშიც „ბათუმსაც“ შეეძლო გოლის გატანა, თუკი, პირველ ტაიმში თათია გაბუნიამ, აშკარა გოლისგან იხსნა საკუთრი კარი და კუთხურზე მოიგერია, მეორე ტაიმში, ცარიელი კარიდან ბურთი გამოცდილმა ლანჩხუთელმა მცველმა, ნინო ჩხარტიშვილმა გამოიტანა. საბოლოოდ, „ლანჩხუთმა“ 0-3 მოიგო და კვლავ, ორ ქულაში ჩამორჩება „ნიკე ლუსოს“.

ამ ტურის ბოლო შეხვედრა, „ელიტასა“ და „კვარტალს“ შორის, 3 ივლისს არის ჩანიშნული და 20:00 საათზე თბილისში, ნიუ ვიჟენის სტადიონზე გაიმართება. ქალთა ლიგის მომდევნო, მე-14 ტური კი, 29 ივნისს არის ჩანიშნული.

ქსკ „ბათუმის“ ფოტო