ერთი ტურისა და ერთი გადადებული მატჩის შემდეგ, ქალთა ლიგის ზედა ჯგუფის კანდიდატ ორ გუნდს „კვარტალსა“ და „ელიტას“ შორის, რომელიც 24 ივლისს არის ჩანიშნული, გაირკვევა საბოლოოდ, რომელი გუნდები გააგრძელებენ მედლებისთვის ბრძოლას, 2025 წლის ქალთა ლიგის გათამაშებაში „ნიკე-ლუსოსთან“ და „ლანჩხუთთან“ ერთად. ზედა ჯგუფში მოხვედრის შანსი აქვს „ბათუმსა“, რომელიც ამ მომენტში, სატურნირო ცხრილში, მესამე ადგილზეა. აქვე გეტყვით, რომ რეგულარული ჩემპიონატის ბოლო ტური, რომლის შემდეგაც გუნდები ცოტას შეისვენებენ, 27 ივლისს არის ჩანიშნული.

რაც შეეხება ბოლოს წინა, ტურს რომელიც 20 ივლისს გაიმართა, მოულოდნელობები არ ახლდა.

თბილისში, სფფ-ის დიდი დიღმის საფეხბურთო ცენტრში, გათამაშების ლიდერმა „ნიკე-ლუსომ“, მისთვის უჩვეულოდ, მხოლოდ ორბურთიანი სხვაობით, 2-0 დაამარცხა თბილისის „ელიტა“. სატურნირო ცხრილის ლიდერებმა ანგარიში სწრაფი გოლით გახსნეს. მე-7 წუთზე იულია სლიასარჩიკმა გაიტანა, რომელმაც, მე-40 წუთზე დუბლიც გაიფორმა. მასპინძლებს, მესამე გოლის გატანის შანსიც ჰქონდა, თუმცა, მსაჯის მიერ კომპენსირებული დროის მე-4 წუთზე, ტაისინიამ შანსი ვერ გამოიყენა.

მშრალი ფრე, 0-0 დაფიქსირდა სფფ-ის კიდევ ერთ საფეხბურთო ცენტრში, ვარკეთილში, სადაც „ვერემ“, „რაჭა 2020“-ს უმასპინძლა. ამ შეხვედრაში მსაჯმა 6 ფეხბურთელი გააფრთხილა, სტუმართა გუნდიდან ერთს კი, ორი ყვითელის გამო, მინდვრის დატოვება მოუხდა.

თბილისშივე, სფფ-ის გლდანის საფეხბურთო ცენტრში, „ნორჩი დინამო“, ამჯერად, „ბათუმთან“ 0-12 დამარცხდა. აჭარული გუნდიდან, რომელიც ზედა ოთხეულში მოხვედრისა და შესაბამისად, მედლებისთვის ბრძოლის ერთ-ერთი კანდიდატია, გოლების ათვლა გვანცა მესხიძემ მე-6 წუთზე ზუსტი 11-მეტრიანით დაიწყო, მე-13 და მე-16 წუთებზე, კიდევ ორჯერ აიღო მეტოქის კარი და საბოლოოდ, ჰეთ-თრიქით დახურა დღევანდელი შეხვედრა. დუბლი გაიფორმეს ეკატერინე მალიშევამ (21’, 87’), თათია შაინიძემ (51’, 53’)  და ელენე ბოლქვაძემ (58’-პ, 66’). თითო გოლი კი, დარინა სელიმბამ (32’), ქეთევან ჭურკვეიძემ  (42’) და ნატა მიქელაძემ (75’) გაიტანეს.

დიდი ანგარიშით დასრულდა დაპირისპირება ჩხოროწყუშიც, სადაც ბონდო პაპასკირის სახელობის სტადიონზე, ადგილობრივი „სამეგრელო“, საქართველოს მოქმედ ჩემპიონს „ლანჩხუთს“ მასპინძლობდა. გურულების გუნდმა, რომელიც, ქალთა შორის ჩემპიონთა ლიგის საკვალიფიკაციო რაუნდიდან მალე დაიწყებს ასპარეზობას,  ორივე ტაიმი თანაბარი ანგარიშით, 0-5 მოიგო, საერთო ჯამში კი, 0-10 გაიმარჯვა. ანგარიში, თითქმის მსაჯის სასტვენთან ერთად, გაბრიელა კამარგომ გახსნა და 26-ე წუთზე დუბლიც გაიფორმა. მორიგი გოლი გაიტანა ლანჩხუთის მაისურით ანანო წიქარიძემ (7’), ასევე ჩისომ ონივეურამ (64’) და სილმარის სმიტ-პაუელიმ (80’) რომელმაც მეორე ტაიმში, ლელუ ჭიჭინაძე შეცვალა. ამ შეხვედრის MVP კი, უდავოდ ეთერ სულაშვილი იყო, რომლის ანგარიშზეც ბოლოს წინა ტურში პენტატრიკია (17’, 27’, 57’, 60’, 87’). ამ ტურის შემდეგ, სულაშვილს, 27 გოლი აქვს გატანილი და ის, ამ მომენტში ჩემპიონატის ბომბარდირთა დავას ლიდერობს.

თანაბარი, საინტერესო და დაძაბული გამოდგა მატჩი ქუთაისში, სფფ-ის ტექნიკურ ცენტრში, სადაც ადგილობრივმა „მართვემ“, თბილისის „კვარტალს“ უმასპინძლა. პირველი ტაიმი მასპინძლებმა მოიგეს, მეორე კი, სტუმრებმა - თუმცა, თამაში ფრედ 2-2 დასრულდა. ანგარიში ამ შეხვედრაში, მანონი საღარაძემ გახსნა 32-ე წუთზე. მეორე ტაიმის დაწყებიდან მალევე კი, ნინო პასიკაშვილმა (54’) ანგარიში გაათანაბრა. გამოცდილ თანაგუნდელს, მხარი ასაკობრივი ნაკრებებიდან მარიამ გასანოვამ აუბა და „კვარტალი“ დაწინაურდა, თუმცა, სტუმართა სიხარული ცოტა ხანს გაგრძელდა - მანონი საღარაძემ, 64-ე წუთზე დუბლი გაიფორმა და ანგარიში გაათანაბრა, 2-2.