საქართველოს ჩემპიონობისთვის ბრძოლას სექტემბრიდან „ნიკე-ლუსო“, „ლანჩხუთი“, „კვარტალი“ და „ელიტა“ გააგრძელებენ. ოთხივე გუნდმა დღეს, რეგულარული ჩემპიონატის ბოლო ტურის შეხვედრები მოიგო. თუმცა, ალბათ, ყველაზე მნიშვნელოვანი ორი თამაში იყო. პირველი, თბილისში, ნიუ ვიჟენის სტადიონზე ჩატარდა - „ელიტამ“, ქუთაისის „მართვეს“ უმასპინძლა და 5-0 გაიმარჯვა. მეორე კი, ბათუმში, ჯონი ბაკურაძის სახელობის სტადიონზე  გაიმართა - გათამაშების ლიდერმა „ნიკე-ლუსომ“ ადგილობრივი „ბათუმი“ 0-8 დაამარცხა. სწორედ, ამ ორ თამაშზე იყო დამოკიდებული თუ, ვინ დაიკავებდა, მედლებისთვის მებრძოლ ზედა ოთხეულში ბოლო ვაკანტურ ადგილს.

თბილისში, „ელიტასა“ და „მართვეს“ დაპირისპირებაში, მასპინძლებმა ცალსახად, მეტოქეს აჯობეს. ანგარიში კი, მე-16 წუთზე, ლანა გორგაძემ გახსნა 11-მეტრიანით და საბოლოოდ, მშობლიური გუნდის კარში სამი ბურთი გაიტანა (26’, 69’). დუბლი შეასრულა მარიამ ჯოჯუამ (48’, 80’). „ელიტამ“, 28 ქულა დააგროვა და რეგულარულ ჩემპიონატში მე-4 ადგილი დაიკავა.

ამ შეხვედრიდან, დაახლოებით 10 წუთით გვიან დასრულდა მატჩი ბათუმში, სადაც მასპინძელთა წარმატების შემთხვევაში, ქალთა ლიგის ზედა ჯგუფში, სწორედ, „ბათუმი“ მოხვდებოდა. თუმცა, „ბათუმისა“ და „ნიკე-ლუსოს“ დაპირისპირებაში, საფინალო სასტვენამდეც ცნობილი იყო ამ წყვილის გამარჯვებული, რამეთუ, პირველი ტაიმის შემდეგ, თბილისელებს უკვე 0-4 მიჰყავდათ ანგარიში. „ნიკე-ლუსოს“ შემადგენლობიდან, დღევანდელ შეხვედრაში ყველაზე შედეგიანი თეონა ბაქრაძე იყო, რომელმაც საბოლოოდ, პოკერი (7’, 8’, 47’-პ, 65’) შეასრულა. თბილისელთაგან, დღეს გოლები ირინა ხაბურზანიამ (27’), გაბი და სილვამ (45’+1), იულია სლიასარჩიკმა (58’) და ანა აკობიძემ (87’) გაიტანეს. რეგულარულ ჩემპიონატში „ნიკე-ლუსომ“ 18-დან 17 შეხვედრა მოიგო და მხოლოდ ერთ, „ლანჩხუთთან“ ფრედ ითამაშა. გუნდმა 135 გოლი გაიტანა, საპასუხოდ კი, მხოლოდ 2 მიიღო და 52 ქულით რეგულარულ ჩემპიონატში პირველი ადგილი დაიკავა. ახლა, მედლებისთვის საბრძოლველად, სადაც დებულებიდან გამომდინარე გუნდებს მხოლოდ ურთიერთ შეხვედრებში დაგროვილი ქულები გადაჰყვებათ, თბილისური გუნდი, ჩემპიონობისთვის უშუალო კონკურენტ „ლანჩხუთთან“ 5 ქულიანი უპირატესობით დაიწყებს ასპარეზობას.  

რეგულარული ჩემპიონატის ბოლო ტურის შეხვედრა მოიგო „ლანჩხუთმა“. გვიმბალაურის სფფ-ის საფეხბურთო ცენტრში, გურულებმა კარი მშრალად შეინახეს და თავად 8 გოლი გაუტანეს თბილისის „ვერეს“. ამ შეხვედრაში პოკერი შეასრულა ლელუ ჭიჭინაძემ (7’, 42’, 79’, 89’-პ). დუბლი, გუნდის ლეგიონერის ჩისომ ონიევუენის (17’, 61’) ანგარიშზეა. თითო გოლი კი, ანანო წიქარიძემ (39’) და სილმარის სმიტ-პაუელიმ (58’) გაიტანეს. აღსანიშნავია, რომ დღევანდელ შეხვედრაში, 10-წლიანი კარიერის ბოლო შეხვედრა ჩაატარა, „ლანჩხუთისა“ და საქართველოს ქალთა ეროვნული ნაკრების მცველმა მარიამ კალანდაძემ, რომელიც მეორე ტაიმში (47’) ჰანა რასელმა შეცვალა. კალანდაძე კი, ამ მატჩის შემდეგ, საბერძნეთში გაემგზავრება, სადაც „პანათინაიკოსის“ ქალთა კლუბს, თავისუფალი აგენტის სტატუსით შეუერთდება. მის გარეშე კი, ქართული კლუბი, აგვისტოს დასაწყისში ქალთა შორის უეფა-ს ჩემპიონთა ლიგის საკვალიფიკაციო ეტაპზე დაიწყებს ასპარეზობას.  „ვერესთან“ დაპირისპირება კი, „ლანჩხუთმა“ 8-0 მოიგო და რეგულარულ ჩემპიონატში მეორე ადგილით დაასრულა ასპარეზობა.

რეგულარული ჩემპიონატის ბოლო შეხვედრა მოიგო თბილისის „კვარტალმაც“, რომელმაც, სფფ-ის ნუცუბიძის პლატოს საფეხბურთო ცენტრში „სამეგრელოს“ უმასპინძლა და 2-0 გაიმარჯვა. ამ შეხვედრაში, რომელიც მასპინძელთა უპირატესობით წარიმართა, ორივე ტაიმში თითო გოლი გავიდა. მე-6 წუთზე ანგარიში ლიზი კანკიამ გახსნა. 82-ე წუთზე კი, ნინო პასიკაშვილმა სტუმართა კარი მეორედ აიღო და საბოლოო ანგარიში დააფიქსირა.

ტურის ბოლო შეხვედრაში, ქალთა ლიგის დებიუტანტმა „რაჭა 2020“-მა, ამბროლაურში, აგრანო ვაჩაძეს სახელობის სტადიონზე ქალთა ლიგის ტრადიციული მონაწილე, „ნორჩი დინამო“ მიიღო, რომელიც მიმდინარე სეზონში, სამწუხაროდ, გამოკვეთილი აუტსაიდერია. რაჭველებმა, თბილისური გუნდი 10-0 დაამარცხეს. ათი გოლიდან ცხრა კესო მეტონიძის (4’, 8’, 41’, 45’, 56’, 64’, 70’, 78’, 90’) ანგარიშზეა, ერთი გოლი კი, მარიამ ფართალაძემ გაიტანა მე-80 წუთზე.

ამრიგად, ზედა ჯგუფში და შესაბამისად, მედლებისთვის იბრძოლებენ „ნიკე-ლუსო“, „ლანჩხუთი“, „კვარტალი“ და „ელიტა“. ქვედა ჯგუფში მოხვდნენ „ბათუმი“, „სამეგრელო“, „რაჭა 2020“, „ვერე“, „მართვე“ და „ნორჩი დინამო“. აქვე შეგახსენებთ, რომ ქვედა ჯგუფი, ბოლო ადგილზე გასული გუნდი, ავტომატურად ერთი ლიგით დაქვეითდება. მას, ქალთა ლიგა 2-ის გამარჯვებული ჩაანაცვლებს. ქვედა ჯგუფში მე-5 ადგილზე გასული გუნდი კი, ქალთა ლიგა 2-ის მეორე ადგილოსანთან გაარკვევს ურთიერთობას.

და ბოლოს, ვიდრე ზედა და ქვედა ჯგუფებში განახლდება თამაშები, გეტყვით, რომ მიმდინარე ჩემპიონატის ბომბარდირთა დავას, 29 გოლით თეონა ბაქრაძე („ნიკე-ლუსო“) ლიდერობს, 27 გოლი აქვს ეთერ სულაშვილს („ლანჩხუთი“), 26 - ლელუ ჭიჭინაძეს („ლანჩხუთი“), 23 - თინათინ ამბალიას („კვარტალი“), 21 - ჯესიკა შირზის („ელიტა“) და 20 - კესო მეტონიძეს („რაჭა 2020“).

ქსკ „ელიტას“ ფოტო