4 და 5 აპრილს ქალთა ლიგის მე-6 ტურის შეხვედრები იმართება. მოგეხსენებთ, ამ ტურის შემდეგ ქალთა საფეხბურთო ჩემპიონატში 23 აპრილამდე შესვენება ცხადდება, ვინაიდან გოგონებს სანაკრებო ფანჯარა უწევთ.

4 აპრილს აღნიშნული ტურის ორი შეხვედრა გაიმართა. თბილისში, სფფ-ის ნუცუბიძის პლატოს საფეხბურთო ცენტრში „კვარტალისა“ და „ელიტას“ დაპირისპირება ფრედ, 0-0 დასრულდა. გუნდებმა ქულები გაინაწილეს. მიმდინარე ჩემპიონატში „ელიტასთვის“ ეს, პირველი ქულა იყო. რაც შეეხება „კვარტალს“, რომელსაც ერთი ტურით ადრე, საკმაოდ პრინციპული დაპირისპირება ჰქონდა ქვეყნის მოქმედი ჩემპიონის წინააღმდეგ, როგორც ჩანს ბოლომდე, ძალების აღდგენა ვერ მოახერხა.

დღის მეორე შეხვედრა ასევე თბილისში, სფფ-ის საფეხბურთო ცენტრ „ავაზაზე“ ჩატარდა. სოხუმის „დინამომ“, რომლისთვისაც აღნიშნული რეაბილიტირებული საფეხბურთო ცენტრი ამ სეზონში საშინაო მოედანია, თბილისის „ვერეს“ უმასპინძლა, რომელიც ქალთა ლიგის სასტარტო ტურებში საკმაოდ სტაბილურად გამოიყურება და დაძაბულ ბრძოლაში, 1-2 დამარცხდა. ანგარიში სტუმრებმა 34-ე წუთზე ალბინა პარუშიჩის გოლით გახსნეს, რომელმაც 43-ე წუთზე დუბლიც გაიფორმა. ტაიმისთვის კომპენსირებულ დროში კი, ლიზი კაკულიამ ერთი ბურთი გაქვითა. მეორე ტაიმში გოლები აღარ გასულა.

ხვალ ამ ტურის კიდევ სამი შეხვედრაა. რუსთავში, სფფ-ის ტექნიკურ ცენტრში, გათამაშების დებიუტანტი „თეთრიწყარო“ ქუთაისის „მართვეს“ უმასპინძლებს.

თბილისში, სფფ-ის დიდი დიღმის საფეხბურთო ცენტრში, „ნიკე-ლუსო“ „რაჭა 2020“-ს მიიღებს.

ტურის ცენტრალური მატჩი კი, რომლის რეპორტაჟსაც სფფ-ის YouTube გვერდი გეგმავს,  გვიმბალაურის სფფ-ის ტექნიკური ცენტრში გაიმართება და თბილისის დროით 16:00 საათზე დაიწყება. ქვეყნის ყველაზე ტიტულოვანი კლუბი „ლანჩხუთი“, „ბათუმს“ უმასპინძლებს. ამ მომენტისთვის გუნდებს, თანაბარი ქულები აქვთ, შესაბამისად, ხვალინდელი მატჩი ორივე გუნდისთვის საკვანძოა.

აქვე შეგახსენებთ, რომ არასრულ მე-6 ტურს, ცოცხალ ცხრილში „ნიკე-ლუსო“ ქულების მაქსიმუმით ლიდერობს.