ახალი ამბები

„სამეგრელო“ სატურნირო ცხრილს, ლელა ჭიჭინაძე კი, ბომბარდირთა დავას ლიდერობს

4 ივნისს, ქალთა ლიგის მე-6 ტური გაიმართა. „სამეგრელო“ ამ ტურის შემდეგაც ლიდერის პოზიციას ინარჩუნებს. სატურნირო ცხრილის ბოლო ადგილზე კი, ქულების გარეშე კვლავ „გორი იუნაიტედია“.

„კოლხეთი“ ხობი - „სამეგრელო“ 1-4

ხობში, პაატა თათარაშვილის სახელობის სტადიონზე გამართული მეგრული დერბი უხვგოლიანი გამოდგა. მე-6 წუთზე ანა კირვალიძემ ანგარიში გახსნა და 20 წუთში, ჩხოროწყუელები უკვე ორბურთანი სხვაობით დააწინაურა. ტაიმის მიწურულს გუნდებმა გოლები გაცვალეს. ჯერ, 45-ე წუთზე, თამარ სალუქვაძემ კვლავ სტუმრები დააწინაურა, შემდეგ კი, მსაჯის მიერ პირველი ტაიმისთვის კომპენსირებულ დროში, ნინი ბერიძემ, ერთი ბურთით ანგარიში შეამცირა. მეორე ტაიმი, კვლავ სტუმართა უპირატესობით წარიმართა, თუმცა „სამეგრელომ“, „კოლხეთის“ კარი, ამ მონაკვეთში მხოლოდ ერხთხელ აიღო. ჰეთ-თრიქი ანა კირვალიძემ შეასრულა.

„ლანჩხუთი“ – „მართვე“ 3-2

ძველი მეტოქეების, სხვადასხვა დროს ქალთა ლიგის ქვეყნის ჩემპიონების დუელი, ხატია ჭყონიას გოლით, პირველ წუთზე გაიხსნა. მოლოდინისამებრ, ბურთს ძირითადად, „ლანჩხუთი“ აკონტროლებდა და პირველ ტაიმშიც 3 ბურთის გატანა მოახერხა. ჭყონიას გატანილი გოლის შემდეგ, „მართვეს“ კარი, მარიამ კაპანაძემ (9’) და ანასტასია ბოლქვაძემ (31’) აიღეს, ტაიმი 3-0 მოიგეს. თუმცა, აქ, გურულებმა, საქმე გაკეთებულად ჩათვალეს და ბურთი, ქუთათურებს დაუთმეს, რითაც, „მართვემ“ კარგად ისარგებლა. ლანა გორგაძემ, 54-ე წუთზე ანგარიში ერთი ბურთით შეამცირა. გოლამდე 2 წუთით ადრე, ლანჩხუთელებმა ცენტრალური მცველი შეცვალეს და გადაწყობასაც ცოტა მეტი დრო დაუთმეს. გატანილი გოლის შემდეგ კი, ქუთაისელებს შემართება მოემატათ და გამოცდილმა ანა სინატაშვილმა, მოქმედი ჩემპიონის კარში, 76-ე წუთზე კიდევ ერთი გოლი გაიტანა. მხოლოდ, ამის შემდეგ მოახერხეს, გურულებმა ძალების მობილიზება და თამაშის გამარჯვებამდე მიყვანა.

„კვარტალი“ – „ნორჩი დინამო“ 0-0

ფრედ დასრულდა თბილისური დერბი სფფ-ს ნუცუბიძის პლატოს საფეხბურთ ცენტრში. ძირითადად საქართველოს ქალთა ასაკობრივი ნაკრების ფეხბურთელებით დაკომპლექტებულმა გუნდებმა, მატჩზე მისულ გულშემატკივარს, საკმაოდ საინტერესო თამაში შესთავაზეს. თანაბარი ორთაბრძოლა, ორივე კარის მიმართულებით შექმნილი მომენტები და ერთი გაძევებული ფეხბურთელი, მასპინძელთა რიგებიდან. შესაბამისად, ნორჩდინამოელებსაც 25 წუთი ერთი ფეხბურთელის უპირატესობა ჰქონდათ, თუმცა, ვერ გამოიყენეს და შეხვედრა ფრედ დასრულდა.

„გორი იუნაიტედი“ – „დინამო სოხუმი“ 0-4

გორის ახალბაღის სტადიონზე, მასპინძლები, კვლავ დამარცხდნენ. სოხუმის დინამოელებმა, გორელთა კარში ოთხი უპასუხო გოლი გაიტანეს. ამ შეხვედრაში მორიგი ჰეთ-თრიქი შეასრულა ლელა ჭიჭინაძემ (13’, 56’, 62’), რომელსაც 6 ტურის შემდეგ უკვე, 10 გატანილი გოლი დაუგროვდა. ერთი გოლი კი, დინამოელთაგან თამარ წვიმიტაძემ გაიტანა.

ქალთა ლიგის მომდევნო მე-7 ტური 11 და 12 ივნისს გაიმართება.