ერთწლიანი შესვენების შემდეგ, „ბათუმი“ 2023 წლის სეზონში ქალთა ლიგაში იასპარეზებს. აჭარულმა გუნდმა, ამის უფლება ქალთა ლიგა 2-ში წარმატებული ასპარეზობის ხარჯზე მოიპოვა. ბათუმელებმა, საერთო ჯამში 20 შეხვედრა ჩაატარეს, აქედან 17-ში გაიმაჯრვეს, 2 ფრედ დაასრულეს და მხოლოდ, ერთი დასთმეს. შესაბამისად, 53 ქულით, ქალთა ლიგა 2-ში პირველი ადგილი დაიკავეს და 2 ქულით გადაუსწრეს სოხუმის „დინამოს“ მეორე გუნდს. აღსანიშნავია ისიც, რომ აჭარელებმა ყველაზე მეტი 107 გოლი გაიტანეს 2022 წლის ქალთა ლიგა 2-ის სეზონზე და საკუთარ კარში, მხოლოდ 16 მიიღეს. 

მიუხედავად იმისა, რომ ქალთა ლიგა 2-ის გათამაშება, ოფიციალურად 4 ნოემბერს დასრულდა, „ბათუმს“ 50 ქულა და ერთი გადადებული შეხვედრა ჰქონდა, საჩხერის „ქარიშხალასთან“. გადადებული თამაში, 7 ნოემბერს, ბათუმში, „ბაკურის“ სტადიონზე გაიმართა და მასპინძელთა გამარჯვებით, 10-1 დასრულდა. უხვგოლიან შეხვედრაში, ბათუმელთაგან პოკერი თათია შაინიძემ (3’ 13’ 44’ 45’) პირველ ტაიმშივე შეასრულა. ამავე ტაიმში, დუბლი ნინო ივანიძემ (27’ 30’) გაიფორმა.  შეხვედრის ამ მონაკვეთში, გაიტანა ანა ხავთასმაც (37’ 55’ ), რომელმაც მეორე ტაიმში, აქტივში კიდევ  ერთი გოლი ჩაიწერა. შეხვედრის მიწურულს გოლები ლინდა გელაძემ (62’) და ქეთევან ჭურკვეიძემ (63’) გაიტანეს. საჩხერელთაგან კი, 65-ე წუთზე პრესტიჟის გოლი ლიკა ჭიღლაძემ გაიტანა. 

აქვე გეტყვით, რომ „ქარიშხალამ“ 11-გუნდიან ჩემპიონატში, საბოლოოდ სატურნირო ცხრილში, მე-6 ადგილი დაიკავა.  2022 წლის სეზონზე, ქალთა ლიგა 2-ში სამ გუნდს, სოხუმის „დინამო 2“-ს, თბილისის „ელიტასა“ და წალკის „ეძანს“ ჰქონდა დებიუტი. მათაგან, წარმატებულად იასპარეზა სოხუმის „დინამოს 2“-მა, რომელიც საბოლოოდ 51 ქულით ქალთა ლიგა 2-ის მეორეადგილოსანი გახდა. მესამე ადგილზე, 44 ქულით, „რაჭა 2020“ გავიდა, ქალთა საფეხბურთო ჩემპიონატების დებიუტანტმა, თბილისის „ელიტამ“ კი, 40 ქულით მეოთხე ადგილის დაკავება მოახერხა. გათამაშების ბომბარდირი, 41 გოლით, ხაშურის „ივერიას“ ფეხბურთელი, ირმა ლომიძე გახდა.