ახალი ამბები

„სამეგრელო“ საქართველოს ჩემპიონია!

ქალთა საფეხბურთო კლუბი „სამეგრელო“ საქართველოს ქალთა ლიგის 2022 წლის სეზონის ჩემპიონია. 

გივი კვარაცხელიას გაწვრთნილმა გუნდმა რეგულარულ ჩემპიონატში 14 მატჩი გამართა, 13-ში გაიმარჯვა და მხოლოდ, ერთში, „ლანჩხუთთან“ ითამაშა ფრედ. შესაბამისად, 40 ქულა დააგროვა და საჩემპიონო რბოლაში ზედა ჯგუფში, უშუალო კონკურენტთან, 2021 წლის საქართველოს ჩემპიონთან, „ლანჩხუთთან“ 5-ქულიანი უპირატესობით გააგრძელა ოქროს მედლებისთვის დავა. ქალთა ლიგის გათამაშების ზედა ჯგუფში, ჩხოროწყუელებმა სამი მატჩი მოიგეს, „ლანჩხუთთან“ სახლში, ფრედ ითამაშეს.  დღესაც, სტუმრად, ლანჩხუთში, ევგრაფი შევარდნაძის სტადიონზე შეხვედრა საყაიმოდ, გატანილი გოლების გარეშე, 0-0 დაასრულეს და ჩემპიონატის დამთავრებამდე ერთი ტურით ადრე, საქართველოს ჩემპიონის ტიტული მოიპოვეს.

გივი კვარაცხელია („სამეგრელოს“ მთავარი მწვრთნელი): "მართალია, ჯერ კიდევ დარჩენილია ერთი ტური, მაგრამ ვთვლი, რომ ჩემპიონები ლოგიკურად გავხდით. ჩემპიონატის მანძილზე, „სამეგრელოს“ არ წაუგია. უშუალო კონკურენტთან „ლანჩხუთთან“, სეზონის მანძილზე 4 თამაში ჩავატარეთ და არც ერთი არ წაგვიგია. მინდა, ჩემს გუნდს, რომელმაც ეს წარმატება დაიმსახურა, მადლობა გადავუხადო დღევანდელი თამაშისთვისაც. ასევე, მადლობა გადავუხადო „ლანჩხუთს“, მათ მწვრთნელს გიორგი ჩხაიძეს, რომელმაც თამაშის დასრულების შემდეგ, პირველად მოგვილოცა წარმატება.

„სამეგრელოს“ მომავალ გეგმებს რაც შეეხება, გარდაუვალია, რომ გუნდი გაძლიერდება. მოვლენ, კვალიფიცირებული ფეხბურთელები და ვეცდებით, რომ ჩვენი სახელი და ჩვენი სიტყვა ვთქვათ, ევროპულ სარბიელზეც".

თამარ ნადირაშვილი („სამეგრელოს“ მეკარე): "წლევანდელი ჩემპიონატი ძალიან დაძაბული იყო. თითქმის ყველა გუნდი კარგ ფორმაში იმყოფებოდა, მაგრამ „სამეგრელო“ მეტად კარგ ფორმაში იყო. ჩვენს მონდომებას რაც შეეხება, ეს იყო ერთობლივი დაუღალავი შრომის ფასად მიღწეული. მადლობა ჩემს გოგოებს. მადლობა მათ, ვინც გვერდში გვიდგას. მადლობა, გივი კვარაცხელიას. ჩვენ წელს ვიყავით ძლიერები და ეს დავამტკიცეთ.   საოცარი შეგრძნებაა და მეტად გაძლიერებს შემდეგისთვის... რაც შეეხება ჩემს დაბრუნებას მოედანზე... მე არც წავსულვარ უბრალოდ, პაუზა მქონდა სულ ცოტახანს. ახლა კი ჩემპიონები ვართ!

„სამეგრელო“, ქალთა ლიგის გათამაშების ზედა ჯგუფის ბოლო, მე-6 ტურში, ჩხოროწყუში უკვე ჩემპიონის სტატუსში სოხუმის „დინამოს“ უმასპინძლებს. მომავალ წელს კი, ჩხოროწყუელები უეფა-ს ქალთა ჩემპიონთა ლიგაზე იასპარეზებენ".

დღესვე, ქალთა ლიგის ზედა ჯგუფის კიდევ ერთი შეხვედრა გაიმართა. თბილისში, სფფ-ს ნუცუბიძის პლატოს საფეხბურთო ცენტრში, სოხუმის „დინამო“ ხობის „კოლხეთს“ დაუპირისპირდა. ფინალური ეტაპის მე-5 ტურის ამ მატჩამდე, სოხუმელებს უკვე გარანტირებული ჰქონდათ ბრინჯაოს მედლები. თუმცა, დინამოელებმა, დღეს, მაინც იბრძოლეს. მიუხედავად იმისა, რომ თამაშის პირველ ნახევარში, ორივე გუნდს ჰქონდა საინტერესო მომენტები, შეხვედრის ამ მონაკვეთში, მხოლოდ ერთი გოლი გავიდა. მე-10 წუთზე, ანგარიში ხობელებმა, თინათინ ამბალიას გოლით გახსნეს. მეორე ტაიმი, სოხუმელების აქტიურობით წარიმართა, თუმცა, გოლი 83-ე წუთზე კვლავ მათ კარში გავიდა - თინათინ ამბალიამ, დუბლი გაიფორმა. ხობელებმა 0-2 მოიგეს და ზედა ჯგუფში, ამ გუნდების პირველ შეხვედრაში განცდილი მარცხის გამო, ერთგვარი რევანშიც აიღეს. მიუხედავად იმისა, რომ დღეს, კვლავ ვერ გაიტანა სოხუმელთა თავდამსხმელმა ლელუ ჭიჭინაძემ, ისმ 27 გოლით, ქალთა ლიგის დასრულებამდე ერთი ტურით ადრე, კვლავ ბომბარდირთა სიას უდგას სათავეში. 

 

ქვედა ჯგუფი

დღეს გაიმართა, ქვედა ჯგუფის ორი შეხვედრაც. ორივე მატჩი თბილისში ჩატარდა.

„ნორჩი დინამო“ – „გორი იუნაიტედი“ 6-0

თბილისში, სფფ-ს ვაკის საფეხბურთ ცენტრში, „ნორჩი დინამო“ „გორი იუნაიტედს“ დაუპირისპირდა. გორელებმა, ვერც ამჯერად მოახერხეს ქულის აღება. „გორი იუნაიტედი“, ბოლო ტურის წინ, ერთადერთი გუნდია, რომელსაც, მიმდინარე გათამაშებაში ქულა არ აქვს. შესაბამისად, „გორი იუნაიტედი“, მომდევნო სეზონში, მინუმუმ ერთი წლით ქალთა ლიგა 2-ში იასპარეზებს. დღევანდელ შეხვედრაში კი, ანი მინაძის ჰეთ-ტრიკით (11’ 20’ 37’) ნორჩი დინამოელები პირველი ტაიმის შემდეგ უკვე კომფორტული უპირატესობით დაწინაურდნენ და თამაში გამარჯვებამდე მიიყვანეს. ამასთან, ლავრენტი დავითაშვილის გუნდმა, მეორე ტაიმში, კიდევ სამი გოლი გაიტანა. 54-ე წუთზე ნინო ჯგუშიამ ანგარიში ოთხამდე გაზარდა. ჟუჟუნა ხმელიძემ კი, 64-ე და 90-ე წუთებზე დუბლი შეასრულა. 

„კვარტალი“ – „მართვე“ 1-0

ქვედა ჯგუფში, ქუთაისის „მართვეს“ წაუგებელი სერია, თბილისში, სფფ-ს ნუცუბიძის პლატოს საფეხბურთო ცენტრში, გათამაშების ყველაზე ახალგაზრდულმა „კვარტალმა“ შეწყვიტა. თბილისელებმა, ერთადერთი გოლი 77-ე წუთზე გაიტანეს. ლიზი კანიამ ზუსტად დაარტყა 11-მეტრიანი. აღსანიშნავია, რომ თამაში ორმხრივ შეტევებში, სანახაობრივად წარიმართა და პირველი წუთებიდან ნათელი იყო, რომ მატჩის ბედს, ერთი გოლი გადაწყვეტდა. მთლიანად შეხვედრაში კი, გამორჩეული თბილისელთა 13 წლის მეკარე ვიქტორია დობროვოლსკაია გამოდგა, რომელმაც სამი „მკვდარი“ ბურთი აიღო, აქედან ერთი, საკმაოდ უხერხული სტანდარტულის შემდეგ.  

ქალთა ლიგის ბოლო, ტური ზედა და ქვედა ჯგუფებში 19 ნოემბერს გაიმართება. თუმცა, ერთი ტურით ადრე, მიმდინარე წლის ჩემპიონატში, ყველა გუნდის ხვედრი, უკვე გარკვეულია.