დღეს ჩხოროწყუში, პაატა პაპასკირის სახელობის სტადიონზე საქართველოს ქალთა შორის 2022 წლის და ამავდროულად, ახალ ჩემპიონს „სამეგრელოს“ მინიმუმ ერთი წლით, ჩემპიონატის მთავარი თასი და ოქროს მედლები გადასცეს. საქართველოს ჩემპიონები  ქალთა ფეხბურთის ფედერაციის პრეზიდენტმა ნინო სორდიამ და სფფ-ს პირველმა ვიცე-პრეზიდენტმა კახა ჭუმბურიძემ დააჯილდოვეს. პირველი ჯილდო, ბრინჯაოს მედლები ჩაიბარეს სოხუმის „დინამოს“ წარმომადგენლებმაც.  

მანამდე კი, ამავე სტადიონზე უკვე მოქმედი ჩემპიონის რანგში, „სამეგრელომ“ სოხუმის „დინამოს“ უმასპინძლა და დიდი ანგარიშით 21-0 დაამარცხა. ჩხოროწყუელბი, უკვე პირველი ტაიმის შემდეგ 9-0 იგებდნენ. როგორც სჩანს, სოხუმელებმა ბოლო მატჩში, ახალგაზრდა ფეხბურთელების გამოცდა გადაწყვიტეს და მთავარი შემადგენლობიდან წამყვანი მოთამაშეები დაასვენეს. ჩემპიონებმა კი, პირველი წუთიდან ბოლომდე იბრძოლეს და სეზონის ყველაზე დიდი ანგარიშით დახურეს წელი. ამ შეხვედრაში გოლები გაიტანეს მაიკო ბებიამ (13’ 20’ 24’ 81’ 83’),  თამრიკო სალუქვაძემ (თავიდან 11 მეტრიანი გააცუდა, თუმცა, შემდეგ 5-ჯერ იყო ზუსტი 14’ 30’ 41’ 61’ 65’), ლიზი მწყერაშვილმა  (37’ 42’ 70’ 90’), ანა კირვალიძემ (19’ 57’ 58’ 78’), ნინო ბუხრიკიძემ (48’ 87’) და ელენე კახნიშვილმა (85’). 

უხვგოლიანი მატჩის მიუხედავად, სოხუმის „დინამოს“ თავდამსმელს ლელუ ჭიჭინაძეს, რომელსაც ზედა ჯგუფის მე-6 ტურში არ უთამაშია და რომელსაც მიმდინარე გათამაშებაში 27 გოლი ჰქონდა გატანილი, ვერც ამ შეხვედრის მონაწილეებმა და ვერც ტურის სხვა მატჩებში მონაწილე ფეხბურთელებმა, ვერ გადაასწრეს. შესაბამისად, ჭიჭინაძე 2022 წლის ქალთა ლიგის ბომბარდირი გახდა 27 გატანილი გოლით. 

„სამეგრელო“ კი, 2022-2023 წლების სეზონზე, საქართველოს ქალთა ჩემპიონთა ლიგაზე წარმოადგენს.

დღესვე გაიმართა, ქალთა ლიგის 2022 წლის სეზონის ბოლო ტურის კიდევ სამი შეხვედრა. გამომდინარე იქიდან, რომ, როგორც ზედა, ასევე ქვედა ჯგუფებში, უკვე ყველაფერი გარკვეული იყო, ბოლო ტურსაც, შესაბამისად, სიმბოლური ხასიათი ჰქონდა. ერთადერთი რაც ამ ტურს შეეძლო შეეცვალა, გათამაშების ბომბარდირი იყო, თუმცა, „სამეგრელოს“ მოთამაშეების მსგავსად, ვერც „ლანჩხუთის“ ახალგაზრდა თავდამსმელმა ეთერ სულაშვილმა, რომელსაც ბოლო ტურამდე 21 გოლი ჰქონდა გატანილი, ეს ვერ მოახერხა. სულაშვილმა, ხობში, პაატა თათარიშვილის სახელობის სტადიონზე, ადგილობრივი „კოლხეთის“ წინააღმდეგ, მხოლოდ დუბლი გაიფორმა (9’ 71’). ანგარიში კი, გურულებმა მე-8 წუთზე მარიამ კაპანაძის გოლით გახსნეს.  ხატია ჭყონიას გოლის წყალობით, 41-ე წუთზე, ქვეყნის 2022 წლის ვიცე-ჩემპიონი, უკვე 0-3 იგებდა. საბოლოოდ კი, „ლანჩხუთმა“ 0-4 გაიმარჯვა და წელი მოგებით დაასრულა.

ორი შეხვედრა გაიმართა ქვედა ჯგუფში. დასრულებული ჩემპიონატის ყველაზე ახალგაზრდულმა გუნდმა თბილისის „კვარტალმა“ სტუმრად გორში, ადგილობრივი „გორი იუნაიტედი“ 0-7 საკმაოდ მარტივად დაამარცხა. თბილისელთაგან ჰეთ-თრიქი (59’ 69’ 73’) ნათია დანელიას ანგარიშზეა, თითო გოლი ელენე ჩიქოვანმა (16’), ლიზი კანკიამ (50’), მარიამ მამფორიამ (81’) და მარიამ ცისკარიშვილმა (87’) გაიტანეს. შეგახსენებთ, რომ გორელთა კლუბი, მომავალ სეზონში ქალთა ლიგა 2-ში იასპარეზებს. მათი ადგილი კი, ძლიერთა შორის „ბათუმმა“ დაიკავა, რომელმაც, ქალთა ლიგა 2 მოიგო და ზედა ლიგაში თამაშის უფლება დაიბრუნა. 

ქალთა ლიგის ბოლო შეხვედრა კი, ქუთაისში გაიმართა - „მართვემ“ „ნორჩ დინამოს“ უმასპინძლა. „ნიკეაზე“ გატანილი 10 გოლიდან 6 მასპინძლების სათვალავშია. ანგარიში, ლანა გორგაძემ მე-15 წუთზე გახსნა. გამოცდილმა ფეხბურთელმა, 62-ე წუთზე დუბლიც გაიფორმა. თუმცა, მანამდე, დუბლის ავტორი უკვე იყო ანა ჯანელიძე (21’ 24’). „მართვემ“ პირველი ტაიმი 4 ბურთის სხვაობით მოიგო. წლის ბოლო ავტოგოლი ნორჩმა დინამოელმა თამარ სვანიძემ გაიტანა. მეორე ტაიმში, ქუთაისელთაგან მარიამ ხარგელიამ (51’ 65’) შეასრულა მორიგი დუბლი. თბილისელებმა, შეხვედრის მეორე ნახევარში, მაინც მოახერხეს მობილიზება და მასპინძლებს სამჯერ გაუტანეს - ლიკა მანუჩარიშვილმა (59’), ლიზი გუგეშაშვილმა (81’), ანა მინაძემ (84’) თითოჯერ აიღეს მეტოქის კარი. საბოლოოდ, „მართვემ“ 7-3 გაიმარჯვა და ქვედა ჯგუფიც მოიგო.

ქალთა ლიგის 2022 წლის ყველა შედეგი და ინფორმაცია იხილეთ ბმულზე.