დღეს ქალთა ლიგის 2023 წლის გათამაშებამ აიღო სტარტი. საქართველოს 3 ქალაქში დღეს პირველი ტურის შეხვედრები გაიმართა. ამ ტურში, ქალთა ლიგის 2022 წლის ზედა ჯგუფის გუნდებმა, იმავე სეზონის შედეგების მიხედვით, სატურნირო ცხრილის ქვედა ნაწილში მყოფ გუნდებს უმასპინძლეს. 

„სამეგრელო“ – „ბათუმი“ 6-1

საქართველოს მოქმედი ჩემპიონმა „სამეგრელომ“, ახალი სეზონის სასტარტო შეხვედრა ჩხოროწყუში, ბოდნო პაპასკირის სახელობის სტადიონზე, ძლიერთა შორის დაბრუნებული  „ბათუმს“ წინააღმდეგ გამართა და დიდი ანგარიშით 6-1 გაიმარჯვა. ანგარიში ამ შეხვედრაში მე-14 წუთზე თეონა თოდაძემ 11-მეტრიანით გაიტანა. 25-ე წუთისთვის, „სამეგრელოს“ ლეგიონერი ჟიოვანას გოლის შემდეგ, საქართველოს ჩემპიონი უკვე 2-0-ს იგებდა. აღსანიშნავია, რომ ჟიოვანამ დღეს ჰეთ-თრიკი შეასრულა, ჩხოროწყუელთაგან კიდევ ორი გოლის ავტორი კი, ლიზი მწყერაშვილია. ქალთა ლიგის 2023 წლის სეზონის სადებიუტო მატჩში, ბათუმელთაგან პრესტიჟის გოლი თათია შაინიძემ გაიტანა. „ბათუმის“ შემადგენლობაში სადებიუტო მატჩი ჩაატარა ხატია ჭყონიამ. თუმცა, ერთ-ერთი ყველაზე გამოცდილი ქართველი ფეხბურთელი ქალი ამ დღეს, ახალ კლუბს ვერ დაეხმარა. 

„ლანჩხუთი“ – „ნორჩი დინამო“ 5-0

ხუთ გოლიანი სხვაობით დასრულდა შეხვედრა სფფ-ს გვიმბრალაურის საფეხბურთო ცენტრშიც. უკვე პირველი ტაიმის შემდეგ „ლანჩხუთი“ „ნორჩ დინამოს“ 4-0 ამარცხებდა. 2022 წლის საუკეთესო ქალთა ფეხბურთელმა ეთერ სულაშვილმა ანგარიში მე-8 წუთზე გახსნა და ტაიმის მიწურულს, ზუსტად შესრულებული პენალტის შემდეგ, დუბლიც გაიფორმა. დანარჩენი 3 გოლი კი, თეონა ბაქრაძის ანგარიშზეა.

„კოლხეთი“ ხობი - „მართვე“  0-3

პირველი გამარჯვება და ისიც გასვლაზე, ხობში, პაატა თათარიშვილის სახელობის სტადიონზე ჩაიწერა ქუთაისის „მართვემ“. საინტერესო და დაძაბულ შეხვედრაში, მშრალი პირველი ტაიმის შემდეგ გოლები ქუთაისელებმა 14 წუთიან მონაკვეთში გაიტანეს და ამასთან ეს, ერთმა ფეხბურთელმა, მარიამ შონიამ გაიტანა. 

არასრული პირველი ტურის შემდეგ, გათამაშების ცხრილს სათავეში 3-3 ქულით ერთბაშად 3 გუნდი უდგას. თუმცა, მეტი გატანილი გოლის წყალობით პირველ საფეხურზე „სამეგრელოა“. პირველი ტურის შემდეგ, ერთბაშად სამ ფეხბურთელს, ჟიოვანას („სამეგრელო“), თეონა ბაქრაძეს („ლანჩხუთი“) და მარიამ შონიას („მართვე“) 3-3 გატანილი გოლი აქვთ. 

ამ ტურის კიდევ ერთი შეხვედრა რომელიც თბილისში, „სოხუმის დინამოსა“ და „კვარტალს“ შორის უნდა გამართულიყო 26 აპრილისთვის არის გადატანილი. ქალთა ლიგის 2023 წლის სეზონის მორიგი, მეორე ტური კი 18 და 19 მარტს გაიმართება. თამაშების კალენდარი იხილეთ ბმულზე.