თბილისში, სფფ-ს გლდანის საფეხბურთო ცენტრში დასრულდა დღეს, ქალთა ლიგის მეოთხე ტური. ქალთა ლიგის კარგად ნაცნობი მეტოქეების „ნორჩი დინამოსა“ და „მართვეს“ შეხვედრაში, ანგარიში მასპინძლებმა გახსნეს. 27-ე წუთზე ანასტასია ბუჩუკურმა გაიტანა. ქუთაისელებმა ანგარიში 65-ე წუთზე გაიტანეს. გოლი ანა ჯანელიძის ანგარიშზეა, შეხვედრა კი ფრედ, 1-1 დასრულდა.

საბრძოლო ფრე, 1-1 დაფიქსირდა ბათუმში გამართულ შეხვედრაშიც „ბათუმსა“ და თბილისის „კვარტალს“შორის.  ანგისაზე ანგარიში 36-ე წუთზე ხატია ჭყონიამ გახსნა, ტექნიკურად შესრულებული საჯარიმო დარტყმით. მიმდინარე სეზონში ბათუმურ კლუბში გადაბარგებული ჭყონია, საუკეთესო იყო გვანცა დოლიძესთან ერთად.  მასპინძლებმა, ჩემპიონატის ყველაზე ახალგაზრდული გუნდის სახიფათო შეტევები 66-ე წუთამდე შეაკავეს. აქ, კი საჯარიმოს მისადგომებიდან მარცხენა ფეხით უძლიერესი დარტყმით, ანგარიში ნინო პასიკაშვილმა გაათანაბრა. 

გვიმბალაურში, სფფ-ს საფეხბურთო ცენტრში, „ლანჩხუთმა“ ანგარიშით  3-0 დაამარცხა სოხუმის „დინამო“. გურულებმა ანგარიში პირველი ტაიმის მიწურულს, 42-ე წუთზე ანა წულაიას გოლით გახსნეს. 68-ე წუთზე მარიამ კაპანაძის გოლის შემდეგ, გაიმყარეს მორიგი 3 ქულა. ამ შეხვედრაში წერტილი კი, ეთერ სულაშვილმა, 82-ე წუთზე დასვა. 

მეოთხე ტურში, ყველაზე უხვგოლიანი  შეხვედრა ჩხოროწყუში, ბონდო პაპასკირის სახელობის სტადიონზე ჩატარდა. მეგრულ დერბიში, „სამეგრელოსა“ და ხობის „კოლხეთს“ შორის, ანგარიში მე-3 წუთზე ელენე ჩიქოვანმა გახსნა და 25-ე წუთისთვის მისი დუბლით, „სამეგრელო“ უკვე 2 ბურთით ლიდერობდა. რუბი ვილეგასის მიერ 34-ე წუთზე გატანილი გოლით კი, „სამეგრელო“ შესვენებაზე სამბურთიანი უპირატესობით გავიდა. მეორე ტაიმის შუაწელში, 69-ე და 72-ე წუთებზე გოლები ჯერ, კლუბის ლეგიონერმა ჟიოვანამ გაიტანა, შემდეგ კი, ჩიქოვანმა ჰეთ-თრიქი შეასრულა. ხობელთაგან, ლიზი ცაავამ ერთი გოლი მალევე გაქვითა. თუმცა, თამაშის მიწურულს, 2-წუთიან შუალედში, 82-ე და 84-ე წუთებზე ლიზი მწყერაშვილმა დუბლი შეასრულა. საბოლოოდ, „სამეგრელომ“ 7-1 გაიმარჯვა. 

4 ტურის შემდეგ, ქალთა ლიგის გათამაშებას 10-10 ქულით ორი გუნდი, „სამეგრელო“ და „ლანჩხუთი“ ლიდერობენ.