ქალთა ლიგის მე-5 ტურის შემდეგაც, სატურნირო ცხრილი კვლავ, ორხელისუფლებიანობაა. გათამაშების ლიდერებმა, მოქმედმა ჩემპიონმა „სამეგრელომ“ და ვიცე-ჩემპიონმა „ლანჩხუთმა“ ისევ, სოლიდური სხვაობით მოიგეს. 

ქუთაისში, „ნიკეას“ ბაზაზე, ადგილობრივი „მართვე“ 1-7 (მატჩის სტატისტიკა) დამარცხდა ქვეყნის მოქმედ ჩემპიონთან, „სამეგრელოსთან“. მასპინძლებმა მხოლოდ 12 წუთი მოახერხეს კარი მშრალად შეენახათ, ლიზი მწყერაშვილმა ანგარიში მე-14 წუთზე გახსნა და 21-ე წუთზე დუბლიც გაიფორმა. ამ ტაიმში, ქუთაისელთა კარი მაიკო ბებიამაც აიღო, რომელმაც ასევე დუბლი შეასრულა. თითო გოლი ნინო აბულაძემ, ელენე ჩიქოვანმა და ანა კვარაცხელიამ გაიტანეს. სხვათა შორის, ამ შეხვედრაში, სტუმრებს მეკარე გაუძევეს. თუმცა, რიცხობრივი უპირატესობის მიუხედავად, გოლები ისევ სტუმრებმა გაიტანეს. „მართვედან“, მხოლოდ მატჩის ბოლო წუთზე მარიამ შონიამ მოახერხა პრესტიჟის გოლის გატანა. 

ხუთბურთიანი სხვაობით მოიგო ტურის შეხვედრა „ლანჩხუთმა“, ხობში, პაატა თათარიშვილის სახელობის სტადიონზე. მასპინძელმა „კოლხეთმა“, მხოლოდ ერთი, ლიკა ქობალავას გოლით უპასუხა, გურულების გოლების წვიმას. პირველ ტაიმს კი, გურულები ალბათ, სოფიკო ნარსიას მიერ გატანილი ორი გოლით (9’, 17’) მოიგებდნენ, მასპინძლებს, ტაიმის მიწურულს ერთი ბურთი საკუთარ კარში რომ არ ჩაეჭრათ. ნარსიამ ამ შეხვედრაში კიდევ ერთი გოლი გაიტანა. ბოლო ორი ბურთი კი, ლანჩხუთელთაგან, თინათინ ამბალიამ და თეონა ბაქრაძემ გაიტანეს. „ლანჩხუთმა“ 1-6 (მატჩის სტატისტიკა) მოიგო და ახლა, 13-13 ქულით სატურნირო ცხრილს „სამეგრელოსთან“ ერთად ლიდერობს. 

პირველ ტაიმში გადაწყვიტა მატჩის ბედი სოხუმი „დინამომ“ თბილისში, სფფ-ს ვაკის საფეხბურთო ცენტრში. დინამოელებმა მე-5 ტურში „ბათუმს“ უმასპინძლეს. ანგარიში, 25-ე წუთზე გვანცა ქადაგიშვილმა გახსნა, 44-ე წუთზე კი, ლელა ჭიჭინაძის გოლით, სოხუმელებმა საჭირო 3 ქულა მოიპოვე, ანგარიშით 2-0  (მატჩის სტატისტიკა) მოიგეს და მეოთხე ადგილზე მყოფ „ნორჩ დინამოს“ გაუთანაბრდნენ. 

თბილისში, სფფ-ს ნუცუბიძის საფეხბურთო ცენტრში „კვარტალმა“, დაძაბულ ორთაბრძოლაში „ნორჩი დინამო“ ერთბურთიანი სხვაობით, 2-1 (მატჩის სტატისტიკა) დაამარცხა. მშრალი პირველი ტაიმის შემდეგ, ანგარიში მეორე ტაიმში, 48-ე წუთზე ანანო წიქარიძემ გახსნა და „კვარტალი“ დააწინაურა, თუმცა, 8 წუთში, ნორჩმა დინამოელებმა სტატუს-კვო ანასტასია ბუჩუკურის გოლის შემდეგ აღადგინეს. „კვარტალს“ 77-ე წუთზე შეეძლო დაწინაურება, თუმცა, ნათია დანელიამ პენალტი გააფუჭა. გამარჯვება კი, ჩემპიონატის ყველაზე ახალგაზრდულ გუნდს, 82-ე წუთზე, ლამარა ბაბაიანის გოლმა მოუტანა. „კვარტალი“ 11 ქულით, სატურნირო ცხრილის მესამე საფეხურზეა და მხოლოდ, 2 ქულით ჩამორჩება ლიდერებს. 

ქალთა ლიგის გათამაშების მორიგი, მე-6 ტური 6 მაისს გაიმართება.