ქალთა ლიგის მე-6 ტურის შემდეგაც სატურნირო ცხრილის სათავეში კვლავ ორხელისუფლებიანობაა. „ლანჩხუთმა“ და „სამეგრელომ“ მორიგი 3-3 ქულა ჩაიწერეს.

ტურის ცენტრალური შეხვედრა ჩხოროწყუში, ბონდო პაპასკირის სახელობის სტადიონზე მასპინძლების, „სამეგრელოს“ მიერ გატანილი სწრაფი გოლით დაიწყო. „კვარტალის“ ახალგაზრდული გუნდის მოთამაშეებმა საკუთარ საჯარიმოში წესები დაარღვიეს, „სამეგრელოს“ ლეგიონერმა რუბი ვილეგასმა კი, 11-მეტრიანი ზუსტად შეასრულა. 28-ე წუთზე, ლიზი მწყერაშვილმა ანგარიში ორამდე გაზარდა. მასპინძლები, დიდი ალბათობით, ამ შეხვედრას მშრალად დაასრულებდნენ, შეხვედრის ბოლო წუთზე ლიზი კანკიას, პრესტიჟის გოლი, რომ არ გაეტანა. შეხვედრა 2-1 „სამეგრელომ“ მოიგო.

„ლანჩხუთმა“, ევგრაფი შევარდნაძის სახელობის სტადიონზე „მართვე“ დიდი ანგარიშით 11-0 დაამარცხა. ანგარიში ეთერ სულაშვილის სწრაფი გოლით გაიხსნა. სულაშვილმა მე-2 წუთზე გატანილ გოლს, მეორე ტაიმში კიდევ ორი დაუმატა და ლანჩხუთელთაგან პირველმა შეასრულა ჰეთ-თრიქი. ჰეთ-თრიქი შეასრულა თეონა ბაქრაძემაც (18’, 63’, 76’), დუბლი თინათინ ამბალიას (35’, 37’), თითო გოლი კი, მარიამ კალანდაძის (9’), ნინო გუჯაბიძისა (55’) და ნინო ჩხარტიშვილის (85’) ანგარიშზეა. აღსანიშნავია, რომ უკვე პირველი ტაიმის შემდეგ, მასპინძლებს 5 ბურთის სხვაობით მიჰყავდათ ანგარიში და 90 წუთის მანძილზე სრულად გააკონტროლეს თამაში.

„ბათუმმა“ ანგისაზე თანაბარ ორთაბრძოლაში მინიმალური ანგარიშით, 1-0 „ნორჩი დინამოს“ დამარცხება მოახერხა. მასპინძელთაგან, შეხვედრის 73-ე წუთზე „სამქულიანი“ გოლი თათია შაინიძემ გაიტანა. ამ გამარჯვებით აჭარულმა გუნდმა უშუალო კონკურენტს 2 ქულით გადაუსწრო და ახლა, სატურნირო ცხრილში მე-4 საფეხურზეა.

თბილისში, სფფ-ს ვაკის საფეხბურთო ცენტრში, მინიმალური ანგარიშით 0-1 მოიგო ხობის „კოლხეთმაც“. ხობელთაგან, გამარჯვების გოლი სოხუმის „დინამოს“ კარში, 83-ე წუთზე ნატა კვირკვაიამ გაიტანა.

ქალთა ლიგის მე-7 ტური 13 და 14 მაისს გაიმართება.