ქალთა ლიგის გათამაშება განახლდა. რეგულარული ჩემპიონატის დასრულების შემდეგ, შეგახსენებთ, რომ გუნდები, საჩემპიონო რბოლას ზედა, ლიგაში დასარჩენად კი, ქვედა ჯგუფებში აგრძელებენ. ტურნირის დებულების თანახმად, გუნდები ორ წრედ, საერთო ჯამში, 6-6 მატჩს გამართავენ. შეგახსენებთ იმასაც, რომ აღნიშნულ ეტაპზე გუნდებს ჯგუფებში, რეგულარული ჩემპიონატის დროს, ურთიერთშეხვედრებში აღებული ქულები, გატანილი და გაშვებული გოლები გადმოჰყვათ.

ზედა ჯგუფი

საქართველოს მოქმედი ჩემპიონი „ლანჩხუთი“, ევგრაფი შევარდნაძის სახელობის სტადიონზე, „ნიკე-ლუსოს“ დაუპირისპირდა. ძველი მეტოქეების შეხვედრა, წუთიერი დუმილით დაიწყო, რომელიც ქსკ „ლანჩხუთის“ დამაარსებლის, დურმიშხან ჩხაიძის ხსოვნას მიეძღვნა. თავად შეხვედრა კი, გარდამავალი უპირატესობით წარიმართა. ორივე გუნდს ჰქონდა მომენტები, თუმცა, მასპინძლებმა მეორე ტაიმის ბოლო 20 წუთი მოუმატეს, მსაჯის მიერ კომპენსირებული დროის მეოთხე წუთზე კი, ეთერ სულაშვილის გარღვევას ფლანგიდან და გამოზომილ გადაცემას, გამოცდილი ლელუ ჭიჭინაძის ზუსტი და ძლიერი თავური დარტყმა მოჰყვა. სტუმართა მეკარე, ალბინა ფომჩენკო კი, რომელიც „ნიკე-ლუსოს“ შემადგენლობიდან ერთ-ერთი საუკეთესო იყო, ამ ჯერზე უძლური აღმოჩნდა. „ლანჩხუთმა“ 1-0 მოიგო და საჭირო 3 ქულა ჩაიწერა სატურნირო ცხრილში.

თბილისში, სფფ-ს ნუცუბიძის პლატოს საფეხბურთო ცენტრში, მიმდინარე გათამაშების სატურნირო ცხრილის ლიდერმა თბილისის „კვარტალმა“, „ბათუმს“ უმასპინძლა. როგორც მოსალოდნელი იყო, თამაში თბილისელთა კარნახით წარიმართა და საბოლოოდ, მათი გამარჯვებით, 5-0 დასრულდა. „კვარტალის“ მაისურით, 27-ე წუთზე სადებიუტო გოლი გაიტანა, გამოცდილმა ტატა მატვეევამ, რომელიც თბილისურ კლუბს, ზაფხულის სატრანსფერო ფანჯრის დროს შეუერთდა. „კვარტალმა“, პირველი ტაიმი, სწორედ მატვეევას გოლით მოიგო, ტატამ კი, მეორე ტაიმშიც გაიტანა 51-ე წუთზე და თამაშს ბოლოს, ერთი „ასისტიც“ მიითვალა. თბილისელთაგან გოლები ანასტასია ბოლქვაძემ (75’), ლიზი კანკიამ (89’) და ნათია დანელიამ (90’+3) გაიტანეს. თავის მხრივ, საგოლე გადაცემები ნათია დანელიამ, მეგი ენჯიბაძემ (ორი) და ერთიც კლუბის დებიუტანტმა პალინა კურჩეტმა ჩაიწერეს.

მომდევნო ტურში ერთმანეთს „კვარტალი“ და „ლანჩხუთი“ დაუპირისპირდებიან. აღნიშნულ გუნდებს შორის, ამ ეტაპზე მხოლოდ ქულაა სხვაობა.

იხილეთ ზედა ჯგუფის სატურნირო ცხრილი

ქვედა ჯგუფი

ფრედ, 1-1 დასრულდა შეხვედრა თბილისში, სფფ-ს ვარკეთილის საფეხბურთო ცენტრში თბილისის „ელიტასა“ და ქუთაისის „მართვეს“ დაპირისპირება.

ამ ჯგუფის კიდევ ერთი მატჩი გაიმართა თბილისში, სფფ-ს გლდანის საფეხბურთო ცენტრში. „ნორჩმა დინამომ“ გათამაშების აუტსაიდერს, ხობის „კოლხეთს“ უმასპინძლა და მინიმალური ანგარიშით 1-0 დაამარცხა. შეხვედრის ერთადერთი გოლი 67-ე წუთზე მარიამ ღვინიაშვილმა გაიტანა.

იხილეთ ქვედა ჯგუფის სატურნირო ცხრილი

ქალთა ლიგის მომდევნო ტური ორივე ჯგუფისთვის 28 სექტემბერს არის ჩანიშნული.