5 და 6 ოქტომბერს ქალთა ლიგის ზედა და ქვედა ჯგუფის მესამე ტურის თამაშები გაიმართა. გათამაშების დასრულებამდე სამი ტურით ადრე, საჩემპიონო რბოლაში, ქვეყნის მოქმედმა ჩემპიონმა „ლანჩხუთმა“, უშუალო მდევრებისგან „კვარტალისგან“ და „ნიკე-ლუსოსგან“ 5 ქულით დაწინაურება მოახერხა.

ზედა ჯგუფი

ამ ტურში, ზედა ჯგუფის ცენტრალური შეხვედრა თბილისში, „ნიუ ვიჟენის“ სტადიონზე გაიმართა. „ნიკე-ლუსომ“ თბილისის „კვარტალს“ უმასპინძლა და მინიმალური ანგარიშით, 1-0 გაიმარჯვა. შეხვედრაში გამარჯვების მომტანი გოლი, მე-60 წუთზე მაიკო ბებიამ გაიტანა. რაც შეეხება თამაშის მიმდინარეობას, ბურთს, ძირითადად სტუმარი გუნდის ფეხბურთელები აკონტროლებდნენ, თუმცა,  მასპინძლები მწვავე კონტრშეტევებით და შორიდან დარტყმებით, „კვარტალისა“ და საქართველოს ქალთა ეროვნული ნაკრების მეკარეს, თათია გაბუნიას მოდუნების საშუალებას არ აძლევდნენ. „ნიკე-ლუსოდან“ განსაკუთრებით მწვავე ანანო წიქარიძის თამაში იყო.  გაშვებული გოლის შემდეგ, „კვარტალი“ ვითარების გამოსწორებას შეეცადა, თუმცა, მატჩის გადარჩენა ვერ მოახერხა და საჩემპიონო რბოლაში, მნიშნელოვანი ქულები დაკარგა.

მესამე ტურში, სამი ნაბიჯით მიუახლოვდა მორიგ ტიტულს „ლანჩხუთი“. გვიმბალაურის სფფ-ის ტექნიკური ცენტრში, გიორგი ჩხაიძის გაწვრთნილმა გუნდმა „ბათუმს“ უმასპინძლა. აჭარლებმა, მხოლოდ 24 წუთი მოახერხეს გაეძლოთ მეზობელი გურულებისთვის, ამ დროიდან კი, საქართველოს ეროვნული ნაკრების გოლეადორის, თეონა ბაქრაძის პერფორმანსი დაიწყო. ბაქრაძემ 24-ე, 33-ე, 42-ე წუთებზე ჰეთ-თრიქი შეასრულა და შესვენებაზე თანაგუნდელებს მშვიდად გასვლის შესაძლებლობა მისცა. მეორე ტაიმის დაწყებიდან მალევე, 50-ე წუთზე, ბაქრაძემ კიდევ ერთი გოლი გაიტანა და პოკერი გიაფორმა. 58-ე წუთზე ქალთა ფეხბურთში, ერთ-ერთმა გამოცდილმა შემტევმა, ლელუ ჭიჭინაძემ კიდევ ერთი გოლით გაზარდა ლანჩხუთელთა უპირატესობა. უხვგოლიან შეხვედრას 71-ე წუთზე, კლუბის ლეგიონერმა, ვანესა ფრანკო-ხირალდომ, სადებიუტო გოლით წერტილი დაუსვა. „ლანჩხუთმა“ 6-0 გაიმარჯვა.

იხილეთ ზედა ჯგუფის სატურნირო ცხრილი

ქვედა ჯგუფში

ქვედა ჯგუფის ლიდერმა, „ნორჩმა დინამომ“ სტუმრად ქუთაისში, სფფ-ის საფეხბურთო ცენტრში სოფო ხაჟალიასა და ნინო ნიჟარაძის გატანილი გოლებით, მასპინძელი, ქუთაისის „მართვე“ 0-2 დაამარცხა და 19 ქულით, ჯგუფში ინარჩუნებს ლიდერობას.

მანონი საღარაძისა და ნათია სხირტლაძის დუბლით, ანგარიშით 3-0 მოუგო თბილისის „ელიტამ“ ხობის „კოლხეთს“, რომელიც ამ ეტაპზე სატურნირო ცხრილის ბოლო ადგილზეა და დიდი ალბათობით, მომდევნო სეზონში, ქალთა ლიგა 2-ში, მინიმუმ ერთი წლით გადაინაცვლებს.

აქვე გეტყვით, რომ ზედა ჯგუფის მსგავსად, აქაც, ჩემპიონატის დასასრულამდე 3 ტურია დარჩენილი.