ქალთა ლიგის დასრულებამდე ორი ტურიღა რჩება, სატურნირო ცხრილში კი, ვითარება საინტერესოდ იძაბება.

ზედა ჯგუფი

დღეს, ზედა ჯგუფის მეოთხე ტურში, „ლანჩხუთმა“ ქულები დაკარგა. ქვეყნის მოქმედმა ჩემპიონმა ფრედ, 0-0 ითამაშა თბილისში, ნიუ ვიჟენის საფეხბურთო მოედანზე „ნიკე-ლუსოს“ წინააღმდეგ. დაძაბულ შეხვედრაში გოლის გატანის შესაძლებლობა ორივე გუნდს ჰქონდა. მაგალითად, მე-16 წუთზე, თეონა ბაქრაძის გადაცემის შემდეგ, ეთერ სულაშვილს შეეძლო ანგარიშის გახსნა და „ლანჩხუთის“ დაწინაურება. 29-ე წუთზე მაიკო ბებიას გადაცემის შემდეგ, უკვე თბილისელებს შეეძლოთ გოლის გატანა, თუმცა, სტანდარტული, „ნიკე-ლუსოს“ ფეხბურთელებმა ვერ „ჩაკეტეს“.  32-ე წუთზე უკვე თავად მაიკო ბებიას შეეძლო გოლის გატანა. კიდევ ერთი მომენტი, რომელიც გამორჩეულად დაგვამახსოვრდა, 67-ე წუთზე ეთერ სულაშვილის შორეული დარტყმული ბურთი იყო, მაგრამ ამჯერად, თბილისელთა უკრაინელმა მეკარემ ალბინა ფომჩენკომ გამოიჩინა თავი, რომელიც აღნიშნულ შეხვედრაში, მასპინძელთაგან, მაიკო ბებიასთან ერთად, საუკეთესო იყო.

ზედა ჯგუფში, ამ ტურამდე, „ლანჩხუთსა“ და ორ მდევარ გუნდს შორის, რომელთაგან ერთ-ერთი „ნიკე ლუსი“, ხოლო მეორე „კვარტალი“ იყო, სხვაობა 5 ქულას შეადგენდა. დღევანდელი ტურის შემდეგ კი, „კვარტალმა“, რომელიც, „ლანჩხუთს“ მომდევნო, მე-5 ტურში, სტუმრად დაუპირისპირდება, სხვაობა 3 ქულამდე შეამცირა და საჩემპიონო რბოლა დაძაბა. თბილისურმა კლუბმა დღეს, გასვლაზე „ბათუმს“ მოუგო 1-5. ანგარიში მე-8 წუთზე თინათინ ამბალიამ გახსნა. მე-9 და მე-18 წუთებზე ნათია დანელიამ დუბლი გაიფორმა. ტაიმის ბოლოს, საქართველოს 2023 წლის სეზონის ტრიუმფატორი ქალი ფეხბურთელის ანგარიშზე უკვე ჰეთ-თრიქი იყო. თუმცა, შუალედში, 25-ე წუთზე, მასპინძლებმა ერთი ბურთის გაქვითვა მოახერხეს. გოლი დარია ანთაძემ გაიტანა. შეხვედრის მიწურულს, 90-ე წუთზე კიდევ ერთი გოლი გავიდა. მეორე ტაიმში, „კვარტალის“ შემადგენლობაში შეცვლაზე შემოსულმა ლიზა კანკიამ გაიტანა.

ქალთა ლიგის მე-5, ბოლოს წინა ტური 9 ნოემბერს არის დაგეგმილი.

ქვედა ჯგუფი

ფრედ 1-1 დასრულდა ქვედა ჯგუფში ხობის „კოლხეთისა“ და „ნორჩი დინამოს“ დაპირისპირება. ხობელებმა, რომლებიც, გათამაშების დასრულებამდე ორი ტურით ადრე, 5 ქულით, ბოლო ადგილზე არიან და ქვედა ლიგაში გადასვლის ყველაზე რეალური კანდიდატები, ანგარიში მე-15 წუთზე 11-მეტრიანით გახსნეს. გოლი, სალომე თოდუამ გაიტანა. „კოლხეთი“ ახლოს იყო, მნიშნელოვან სამ ქულასთან, თუმცა, მსაჯის მიერ კომპენსირებული დროის მე-4 წუთზე ჯგუფის ლიდერმა, მარიამ ოლქიაშვილის გოლით ქულა გადაარჩინა. 

მნიშვნელოვანი სამი ქულა დააგროვა და გასავარდნ ზონას დასცილდა ქუთაისის „მართვე“, რომელმაც ქუთაისში, სფფ-ს საფეხბურთო ცენტრში „ელიტა“ 5-2 დაამარცხა. ქუთაისელთაგან ორმა ფეხბურთელმა ანა ჯანელიძემ (17’, 33’) და ანა სინატაშვილმა (19’, 26’) პირვე ტაიმში დუბლი შეასრულეს. შეხვედრის ამ ტაიმში, სტუმრებმა, მხოლოდ ერთი გოლი გაქვითეს. 28-ე წუთზე თეკლა ბერიძემ გაიტანა. მეორე ტაიმში, მე-60 წუთზე შეცვლაზე შემოსული ნათია სხირტლაძის გოლით, თბილისელებმა შეამცირეს სხვაობა, თუმცა, 6 წუთში, ქუთაისელებმა სტატუს-კვო აღადგინეს. ჯანელიძემ კი, მესამე გოლო გაიტანა.

ქვედა ჯგუფის მომდევნო ტური 9 ნოემბერს არის ჩანიშნული, მანამდე კი, სატურნირო ცხრილს 23 ქულით „ნორჩი დინამო“ ლიდერობს.