უკვე ოფიციალურად, „სამეგრელო“ ქალთა ლიგა 2-ის გამარჯვებულია. შესაბამისად, ის 2025 წლის სეზონში ქალთა ლიგაში იასპარეზებს. მანამდე კი, ჩხოროწყუელებმა გათამაშების ბოლო, 26-ე ტურში, რომელიც 23 და 24 ოქტომბერს გაიმართა, „დინამო გაგრას“ უმასპინძლეს და 5-2 დაამარცხეს. გამარჯვებულთაგან, ამ ტურში, გოლი არ გაუტანია ვალენტინა პაულას, რომელსაც სეზონზე 44 გოლი დაუგროვდა და ბომბარდირთა დავაში მეორე შედეგით დაასრულა წელი.

ქალთა ლიგა 2-ის ბომბარდირი კი, 57 გატანილი გოლით მარიამ მოდრეკილაძე გახდა. ამ ლიგის მეორე ადგილოსანი „ვერეს“ ფეხბურთელმა, ბოლო ტურში თბილისში, სფფ-ის ვარკეთილის საფეხბურთო ცენტრში ითამაშა და გუნდთან ერთად, მესამეადგილოსანი „რაჭა 2020“ მშრალი ანგარიშით, 5-0 დაამარცხა.

გამომდინარე იქიდან, რომ 2025 წლის სეზონზე ქალთა ლიგის გათამაშებაში მონაწილეთა რიცხვი 10 გუნდით განისაზღვრა, მომავალ წელს, „სამეგრელოსთან“ ერთად, ზედა ლიგაში „ვერეც“ დაწინაურდა.

აქვე შეგახსენებთ, რომ ტურნირის დებულების თანახმად, ქალთა ლიგა 2-ის მესამეადგილოსანი გუნდი, ქალთა ლიგის ქვედა ჯგუფის ბოლო ადგილოსანთან ფლეი-ოფში გაარკვევს თუ, რომელ ლიგაში იასპარეზებს 2025 წლის სეზონზე. ფლეი-ოფი  ნოემბრის მეორე დეკადაშია ჩანიშნული.

ქალთა ლიგა 2-ის ბომბარდირთა დავაში, მესამე ადგილზე სალომე არაბულია 32 გატანილი გოლით. მისი გუნდი, „ივერია“ კი, ბოლო ტურში, სახლში, 2-5 დამარცხდა „ახალგორთან“.

ბოლო ტურის სხვა შეხვედრები შემდეგი ანგარიშით დასრულდა:

„თეთრიწყარო“ – „დინამო“ სოხუმი 7-0

 „რუსთავი“ – „ლანჩხუთი 2“ 6-0

„გორი იუნაიტედი“ – „ნორჩები“ 3-0

„ეძანი“ – „ზარზმა“ 2-0

ქალთა ლიგა 2-ის სატურნირო ცხრილი იხილეთ ბმულზე.