დღეს, საქართველოს ქალთა ლიგის 2025 წლის სეზონი დაიწყო. განახლებული ფორმატით და გუნდების გაზრდილი რაოდენობით. შეგახსენებთ, რომ ამ სეზონიდან ქალთა ლიგაში რვის ნაცვლად ათი გუნდი: „ლანჩხუთი“, „კვარტალი“, „ნორჩი დინამო“, „ბათუმი“, „მართვე“, „ელიტა“, „ნიკე-ლუსო“, „სამეგრელო“, „რაჭა 2020“ და „ვერე“ ასპარეზობენ. ჩემპიონატი ორ ეტაპად ტარდება. აქედან, საწყის ეტაპზე, რეგულარულ ჩემპიონატში გუნდები სახლი-გასვლის პრინციპით დაუპირისპირდებიან ერთმანეთს და საერთო ჯამში 18-18 შეხვედრას გამართავენ. ამის შემდეგ, სატურნირო ცხრილის ზედა ოთხეული მედლებისთვის, ქვედა 6 გუნდი კი, ქალთა ლიგაში ადგილის შესანარჩუნებლად იბრძოლებენ.

პირველი ტური, ორ სათამაშო დღეზე გადანაწილდა. დღეს, ოთხი შეხვედრა გაიმართა, რომელთაგან ყველაზე თანაბარი და საინტერესო სფფ-ის ვაკის საფეხბურთო ცენტრში ჩატარებული „ელიტასა“ და ძლიერთა შორის დაბრუნებული „სამეგრელოს“ შეხვედრა გამოდგა. მიუხედავად იმისა, რომ ორივე გუნდს ჰქონდა საგოლე მომენტები, ამ შეხვედრაში უფრო ზუსტები სტუმრები აღმოჩნდნენ. ანგარიში, 33-ე წუთზე ჩისომ ონიევენიმ გახსნა და „სამეგრელო“ დააწინაურა. თუმცა, 51-ე წუთზე ნატა კვირკაიამ მოახერხა გათანაბრება. ამის შემდეგ, „ელიტას“ ჰქონდა დაწინაურების შესაძლებლობა, თუმცა, მატჩის საუკეთესო მოთამაშის, მასპინძელთა მეკარის, სალომე ხაჭაპურიძის მონდომების მიუხედავად, 68-ე წუთზე მეგრელთა კლუბის კიდევ ერთმა ლეგიონერმა ნიკოლე დე ობალდიამ, ამ შეხვედრის საბოლოო შედეგი, 1-2 დააფიქსირა და „სამეგრელოს“ პირველი 3 ქულა მოუტანა. სხვათა შორის, ამ შეხვედრაში, ყველაზე უმცროსი თუ არა, ქალთა ლიგის ერთ-ერთმა ყველაზე ახალგაზრდა ფეხბურთელმა, 14 წლის ელენე კერესელიძემ ითამაშა.

როგორც მოსალოდნელი იყო, პირველი გამარჯვება მოიპოვა ქვეყნის მოქმედმა ჩემპიონმა „ლანჩხუთმა“, რომელმაც ფოთის სფფ-ის საფეხბურთო ცენტრში დიდი ანგარიშით, 15-0 მოიგო, ძლიერთა შორის ამოსულ „რაჭა 2020“-ს. ლანჩხუთელთა ორმა ფეხბურთელმა პირველი ჰეთ-თრიქიც გაიფორმა, სამ-სამი გოლი ეთერ სულაშვილმა და ანასტასია ბოლქვაძემ გაიტანეს.

კიდევ უფრო დიდი ანგარიში დაფიქსირდა თბილისში, სფფ-ის გლდანის საფეხბურთო ცენტრში. „ნიკე-ლუსომ“, რომელმაც სეზონებს შორის შესვენებაზე მოახერხა განახლება, გაძლიერება, როგორც ადგილობრივი, მათ შორის საქართველოს ეროვნული ნაკრების ფეხბურთელებით, ასევე ლეგიონერებით, „ნორჩი დინამო“ 0-24 დაამარცხა. ამ შეხვედრაში დაფიქსირდა პირველი პენტატრიკი, რომელიც საქართველოს 2024 წლის საუკეთესო ქალი ფეხბურთელის თეონა ბაქრაძის ანგარიშზეა, პირველი პოკერი თეკლა ბერიძემ, ხოლო ჰეთ-თრიქის შესრულება ოთხმა ფეხბურთელმა მოახერხა. ალბათ, ამ ანგარიშიდან გამომდინარე, აუცილებლად უნდა აღინიშნოს, რომ მიმდინარე სეზონში, „ნორჩი დინამო“ გადახალისებული და შეიძლება ითქვას, ყველაზე ახალგაზრდული გუნდია. სწორედ, ამიტომ, იმედს ვიტოვებთ რომ უკვე მომავალი ტურიდან, დინამოელები ყველა მეტოქეს სათანადო წინააღმდეგობას გაუწევენ.

დღევანდელი დღის კიდევ ერთი შეხვედრა, თბილისში, სფფ-ის ნუცუბიძის პლატოს საფეხბურთო ცენტრში გაიმართა. „კვარტალმა“, 7-0 დაამარცხა „ვერე“, რომელსაც ქალთა ლიგაში დებიუტი აქვს. გამარჯვებულთაგან ერთმა, თინათინ ამბალიამ, პირველივე შეხვედრაში სამი გოლი გაიტანა. სხვათა შორის, ეროვნული ლიგის კიდევ ერთმა 14 წლის ფეხბურთელმა,  მარიამ გასანოვამ დღეს, „კვარტალის“ შემადგენლობაში, თამაში სასტარტო შემადგენლობიდან დაიწყო და მოედანზე 80 წუთი ითამაშა.

პირველი ფრე, ქალთა ლიგის 2025 წლის გათამაშებაში, პირველი ტურის მეორე სათამაშო დღეს დაფიქსირდა. ქუთაისში, სფფ-ის საფეხბურთო ცენტრში, გახსნითი ტურის ბოლო მატჩში საქართველოს ორგზის ჩემპიონი ქუთაისის „მართვე“ და „ბათუმი“ დაუპირისპირდა.

შავი ზღვისპირელებმა, რეალურად მოახერხეს თამაშის გაკონტროლება, თუმცა, მასპინძლებმა მეორე ტაიმის საწყის წუთებში ინიციატივა მოიპოვეს და შესაბამისად, გოლიც გაიტანეს. საჯარიმოდან, ეფექტური დარტყმით, ქუთათურების გოლების ათვლა, სასტარტო შეხვედრის მე-60 წუთზე, გამოცდილმა ანა ჯანელიძემ დაიწყო. თუმცა, მანამდე ანგარიში პირველი ტაიმის 21-ე წუთზე გაიხსნა. გოლი, ბათუმელთა გამოცდილმა მოთამაშემ თამარ სალუქვაძემ გაიტანა. სხვათა შორის შეხვედრის ბოლო წუთებში, ბათუმი სამი ქულის მოსაპოვებლადაც გაისარჯა, თუმცა, შეხვედრა ფრედ 1-1 დასრულდა.

ქალთა ლიგის მეორე ტური 15 მარტს არის ჩანიშნული.