ქალთა ლიგის მეორე ტური, პირველის მსგავსად უხვგოლიანი გამოდგა.  თუმცა, ამჯერად, გოლები 8 გუნდის ანგარიშზე მოდის და საერთო ჯამში ტურში, 33 გოლი გავიდა. ორი ტურის შემდეგ, „ნიკე-ლოსოს“ ფეხბურთელისა და საქართველოს 2024 წლის სეზონის საუკეთესო ქალი ფეხბურთელის თეონა ბაქრაძის ანგარიშზე, უკვე, 8 გატანილი გოლი.

მეორე ტურის ცენტრალური შეხვედრა კი, გვიმბალაურში, სფფ-ის საფეხბურთო ცენტრში გაიმართა და მისი ხილვა ასევე, სფფ-ის Youtube-ი არხითაც იყო შესაძლებელი. გასული წლის ჩემპიონატის ყველაზე დამაინტრიგებელი წყვილის, „ლანჩხუთისა“ და „კვარტალის“ ერთწლიანი „დავა“, რომელიც შარშან საბოლოოდ, „ლანჩხუთის“ ჩემპიონობით დასრულდა, დღეს სტუმართა გოლით დაიწყო. გურულებისთვის მოულოდნელად, ანგარიში მე-16 წუთზე გაიხსნა. თბილისელთა ყველაზე ახალგაზრდა მოთამაშის, 14 წლის მარიამ გასანოვას ტექნიკურ თამაშს, ლანჩხუთელთა საჯარიმოში, ზუსტი გადაცემა და თინათინ ამბალიას გოლი მოჰყვა. ზოგადად, აღსანიშნავია, რომ დღევანდელ შეხვედრაში საბოლოოდ, გაშვებული ოთხი გოლის მიუხედავად, კარგად ჩაატარა შეხვედრა ლიკა ცუხრუკაიძემ, რომელმაც წლევანდელ სეზონში, „კვარტალის“ კარში, გამოცდილი თათია გაბუნია ჩაანაცვლა. თათია კი, დღეს „ლანჩხუთის“ კაროს სადარაჯოზე იდგა ერთწლიანი შესვენების შემდეგ. აქვე ვიტყვით, რომ მასპინძელთაგან, დღევანდელ შეხვედრაში ცალსახად, ეთერ სულაშვილი თამაში იყო გამორჩეული, რომელსაც მართალია გოლი არ გაუტანია, თუმცა, თითქმის ყველა გოლში მიუძღვის წვლილი. მაგალითად, პენალტი, რომლითაც მეგი ეჯიბიამ 41-ე წუთზე ანგარიში გაათანაბრა, სწორედ, ეთერ სულაშვილმა „აჰკიდა“ ნათია წოწერიას. რადგან მასპინძლებზე ვთქვით, სტუმრებშიც აღვნიშნოთ გამორჩეული - თინათინ ამბალია, რომელიც „კვარტალიდან“, ახლად დაწყებულ ჩემპიონატში აშკარად ლიდერობას ითავსებს და მეორე თამაშა გოლი გააქვს. დღეს კი, მეორე ტაიმში, მასპინძლებმა უფრო მეტად გააკონტროლეს ბურთი და მეტოქეც მეტად შეაწუხეს. 63-ე წუთზე შეცვლაზე შემოსულმა ლელუ ჭიჭინაძემ, „ლანჩხუთი“ დააწინაურა. 81-ე წუთზე, სულაშვილის გადაცემის შემდეგ, ტატა მატვეევამ ორი ბურთიანი სხვაობით გაიყვანა გურულები წინ. შეხვედრაში წერტილი კი, ნინო გუჯაბიძემ დაუსვა 85-ე წუთზე, რომელმაც ტრავმირებული ლელუ ჭიჭინაძე შეცვალა. საბოლოოდ, „ლანჩხუთმა“ 4-1 გაიმარჯვა და ორი ტურის შემდეგ, დაუმარცხებელია. დღევანდელ შეხვედრას, საქართველოს ქალთა ეროვნული ნაკრების მთავარი მწვრთნელი, ირის ანტმანი ესწრებოდა.

ორი ტურის შემდეგ, დაუმარცხებლად ასპარეზობს „ნიკე-ლუსოც“, რომელმაც ამჯერად, გასვლაზე და „მოკრძალებულად“ 0-7 დაამარცხა გათამაშების დებიუტანტი „რაჭა 2020“. ამბროლაურში, აგრანო ვაჩაძის სახელობის სტადიონზე კი, როგორც მოსალოდნელი იყო, შეხვედრა სტუმართა უპირატესობით წარიმართა, უკვე მე-15 წუთისთვის თეონა ბაქრაძის დუბლით, რომელმაც საბოლოოდ, ჰეთ-თრიქიც გაიფორმა (64-ე წუთზე 11-მეტრიანი გაიტანა), „ნიკე-ლუსი“ დაწინაურდა. პირველი ტაიმი საბოლოოდ 0-3 დასრულდა. კიდევ ერთი გოლი, ამ მონაკვეთში ნინო ბუხრიკიძემ (32’) გაიტანა. მეორე ტაიმში კი, სპლანჟე კარვალისმა (58’), ლიზი მწყერაშვილმა (70’) და მაია დანგაძემაც გაიტანეს. ორი ტურის შემდეგ, სატურნირო ცხრილში, „ნიკე-ლუსო“ გატანილი გოლების წყალობით პირველია, თუმცა, „ლანჩხუთისა“ და „სამეგრელოს“ მსგავსად, მათაც ორიდან ორი მოგებული თამაში და შესაბამისად, 6 ქულა აქვთ.

ძლიერთა ლიგაში დაბრუნებული „სამეგრელო“ რეგულარული ჩემპიონატის მეორე კალენდარულ შეხვედრასაც იგებს. ჩხოროწყუელებმა, ამჯერად „ბათუმი“ დაამარცხეს, 4-2. უნდა აღვნიშნოთ, რომ აჭარული კლუბი, შემადგენლობის თვალსაზრისით, ერთ-ერთი სტაბილური კლუბია ქართულ ქალთა ჩემპიონატში. დღეს კი, ბონდო პაპასკირის სახელობის სტადიონზე, ანგარიში მასპინძლებმა გახსნეს. მე-5 წუთზე, ჩისომ სოფია ონიევუენიმ მასპინძლები დააწინაურა. ეს „სამეგრელოს“ ლეგიონერის მეორე გოლია მიმდინარე ჩემპიონატში. ძალიან მალე, ორ წუთში, გოლს უკვე აჭარლები ზეიმობდნენ. ანგარიში ბათუმელთა გამოცდილმა მოთამაშემ, თათია შაინიძემ მე-7 წუთზე აღადგინა. მალევე, მე-13 წუთზე მეგრული კლუბის კიდევ ერთმა ლეგიონერმა მარია მურილომ 11-მეტიანით, კვლავ მასპინძლები დააწინაურა. სხვათა შორის, მანვე, 84-ე წუთზე კიდევ ერთი პენალტი გაიტანა. ამ გოლამდე, ორივე გუნდიდან თავი გამოცდილმა მოთამაშეებმა გამოიჩინეს, მასპინძელთაგან ლანა გორგაძემ (65’), სტუმართაგან კი, თამარ სალუქვაძემ (89’) გაიტანეს.

თბილისი სფფ-ის ვარკეთილის საფეხბურთო ცენტრში ჩემპიონატის დებიუტანტმა „ვერემ“ პირველი გამარჯვება იზეიმა. თბილისური კლუბების, „ვერესა“ და „ელიტას“ დაპირისპირებაში მასპინძლებმა 2-1 გაიმარჯვეს. შეხვედრა კი, მე-3 წუთზე ლიზი ნიშნიანიძის გოლით გაიხსნა. მასპინძელთაგან, 24-ე წუთზე, გამოცდილმა მარიამ მოდრეკილაძემ, ანგარიში ორამდე გაზარდა. მიუხედავად ამისა, „ელიტა“ მარტივად არ დანებდა, თუმცა, მხოლოდ ერთი გოლის გაქვითვა მოახერხა. 82-ე წუთზე ნათია ჯოჯუამ გაიტანა.

ტურის ბოლო შეხვედრა ქუთაისის სფფ-ის საფეხბურთო ცენტრში ჩატარდა. საქართველოს ორგზის ჩემპიონმა „მართვემ“ დიდი ანგარიშით 12-0 სძლია „ნორჩ დინამოს“, რომელიც რეალურად, მიმდინარე ჩემპიონატის ყველაზე ახალგაზრდული გუნდია. ქუთაისელთაგან ჰეთ-თრიქი, გამოცდილმა ანა ჯანელიძემ გაიფორმა, რომელსაც ორი ტურის შემდეგ უკვე 4 გოლი დაუგროვდა. ქუთაისელთაგან, სამმა ფეხბურთელმა ანა სინატაშვილმა, თამარ მარუაშვილმა და მანონი საღარაძემ დუბლი გაიფორმეს, თითო გოლი კი, ნატა სამხარაძის, ელენე თვალჭრელიძისა და გამოცდილი თეონა თოდაძის ანგარიშზეა.

ქალთა ლიგის მორიგი, მე-3 ტური 19 მარტს არის დაგეგმილი.