ქალთა ლიგის მესამე ტურის შემდეგ, სამი კლუბი, „ნიკე-ლუსო“, „ლანჩხუთი“ და „სამეგრელო“ ქულების დაუკარგავად აგრძელებენ ასპარეზობას. ამ სამიდან ერთი, „ნიკე-ლუსო“ კი, ჯერ-ჯერობით კარის მშრალად შენახვასაც ახერხებს.

მესამე ტურის ოთხი შეხვედრა დღეს, თბილისში გაიმართა. „ნიკე-ლუსომ“, სფფ-ის დიდი დიღმის საფეხბურთო ცენტრში, ქუთაისის „მართვეს“ უმასპინძლა და 9-0 დაამარცხა. გამარჯვებული გუნდიდან, კვლავ გაიტანა და ამასთან მორიგი ჰეთ-თრიქი შეასრულა თეონა ბაქრაძემ (7’, 10’, 17’). შესაბამისად, სამი ტურის შემდეგ, 2024 წლის საუკეთესო ქალი ფეხბურთელი, 11 გატანილი გოლით, ბომბარდირთა სიას უდგას სათავეში.  დუბლი შეასრულა ლიზი მწყერაშვილმა (29’, 55’), თითო გოლი კი, ნინო ბუხრიკიძემ (4’), არინია სიტნიკოვამ (14’) და ზეჰრა ბორაზანჩმა (57’) გაიტანეს. მასპინძლების სასარგებლო, ქუთაისელებმა, ერთი ავტო-გოლითაც შეავსეს გათამაშების ლიდერის ყულაბა.

თბილისში, სფფ-ის ვაკის საფეხბურთო ცენტრში, „ელიტამ“, ქვეყნის მოქმედ ჩემპიონს, „ლანჩხუთს“ უმასპინძლა და 1-5 დამარცხდა. ანგარიში, მე-14 წუთზე ანასტასია ბოლქვაძე გახსნა. 39-ე წუთზე კი, მანვე დუბლი გაიფორმა. ტაიმის მიწურულს, 44-ე წუთზე, მიმდინარე ჩემპიონატში, მე-4 გოლი გაიტანა ეთერ სულაშვილმა, პირველი ნახევარი კი, „ლანჩხუთმა“, 0-3 მოიგო. ანგარიშიდან გამოდინარე, ლანჩხუთელთა მთავარმა მწვრთნელმა, გიორგი ჩხაიძემ, გუნდისა და ქალთა ეროვნული ნაკრების მთავარი მეკარე დაასვენა და სათამაშო დრო, მარიამ ჭრიკიშვილს მისცა. შეხვედრის ეს მონაკვეთიც, სტუმართა აქტიურობით დაწყო და წარიმართა. 52-ე და 84-ე წუთებზე, პალინა გირჩიციმა დუბლი შეასრულა და ალბათ, მატჩის მშრალად დასრულდებოდა, თუმცა, ამ დღეს, პრესტიჟის გოლის გატანა, ქანია ქესემ მოახერხა, 89-ე წუთზე. სხვათა შორის, მიუხედავად იმისა, რომ „ელიტას“ ჯერ-ჯერობით, სამიდან სამივე შეხვედრა წაგებული აქვს, გუნდი იბრძვის და გატანილი გოლის გარეშე, თამაშს არ ასრულებს.

მესამე გამარჯვება ჩაიწერა ძლიერთა შორის დაბრუნებულმა „სამეგრელომ“. თბილისში, სფფ-ის გლდანის საფეხბურთო ცენტრში, ანგარიში სტუმრებმა სწრაფი გოლით მე-3 წუთზე გახსნეს. საინტერესო დეტალი, შეხვედრაში, რომელიც, სტუმართა გამარჯვებით, 0-9 დასრულდა, ცხრავე გოლი სხვადასხვა ფეხბურთელმა გაიტანა: იარელის პალასიომ (3’), ანა გობრონიძემ (6’) ლიკა კუპრეიშვილმა (12’),  თამარ მოდებაძემ (13’), ლანა გორგაძემ (25’),  ანი დავითულიანმა (27’), გვანცა პაპასიკრმა (44’), მარიამ გორიზიამ (81’) და სილმარის სმიტმა (86’).

მიმდინარე ჩემპიონატში, მეორე შეხვედრა მოიგო თბილისის „კვარტალმა“. სფფ-ის ნუცუბიძის პლატოს საფეხბურთო ცენტრში, პირველი ტაიმის შემდეგ, რომელშიც, ანგარიშის გახსნა მასპინძლებმა მხოლოდ, 37-ე წუთზე მოახერხეს, როდესაც „რაჭა 2020“-ს გოლი, 11 მეტრიანით ლიზი კანკიამ გაუტანა, ხოლო, 44-ე წუთზე, გამოცდილმა ნინო პასიკაშვილმა  ანგარიში ორამდე გაზარდა, თბილისელთა აშკარა უპირატესობის მიუხედავად, ანგარიშში სხვაობა მხოლოდ ორბურთიანი იყო. მეორე ტაიმში, სტუმრებმა, ავტოგოლით გახსნეს. თინათინ ამბალიას, კი, რომელმაც გოლების გატანა, მე-80 წუთიდან დაიწყო, პოკერამდე ერთი გაცუდებული პენალტი დააკლდა და მხოლოდ ჰეთ-თრიქს დასჯერდა. სხვათა შორის, ამბალიამ, სამივე ტურში მოახერხა გატანა. ეს შეხვედრა კი, „კვარტალმა“ 6-0 მოიგო.

ტურის ბოლო და არა თბილისური მატჩი კი, ბათუმში, ლეონიძის საფეხბურთო ცენტრში გაიმართა. ადგილობრივმა „ბათუმმა“, ქალთა ლიგის ახალი მობინარდე „ვერე“, 6-0 დაამარცხა. ამ შეხვედრაში, გოლების ათვლა, ელენე ბოლქვაძემ დაიწყო, რომელმაც მეტოქის კარში, შეხვედრის პირველი (26’) და ბოლო (89’) გოლები გაიტანა. ბოლქვაძის მსგავსად, დუბლი გაიფორმა, ეკატერინა მალიშევამ (28’, 88’), თითო გოლი კი, გაბრიელა კამარგოსა (30’) და ანანო ჯოჯუას (67’) ანგარიშზეა. სამი ტურის შემდეგ, ათ გუნდიან ქალთა ჩემპიონატში, „ბათუმი“ ყველაზე ახლოსაა, სატურნირო ცხრილის ზედა ოთხეულთან.

ქალთა ლიგის მორიგი, მე-4 ტური, 24 მარტს არის დაგეგმილი.