17 აპრილს, ქალთა ლიგის მე-6 ტური გაიმართა, რომელშიც გათამაშების ლიდერებმა ქულები დაკარგეს, თუმცა, ორივე გუნდი დაუმარცხებლად აგრძელებს რეგულარულ ჩემპიონატს.

ტურის ცენტრალური შეხვედრა ლანჩხუთში, ევგრაფი შევარდნაძის სახელობის სტადიონზე გაიმართა. საქართველოს მოქმედმა ჩემპიონმა „ლანჩხუთმა“, „ნიკე-ლუსოს“ უმასპინძლა. ამ ტურამდე, შეგახსენებთ, რომ ორივე გუნდს თანაბარი, ქულების მაქსიმუმი, 15-15 ქულა ჰქონდათ და სატურნირო ცხრილშიც, პირველ-მეორე ადგილებს იყოფდნენ. შესაბამისად, ყველა, თანაბარი ბრძოლის მოლოდინში ვიყავით. თუმცა, პირველ ტაიმში, გურულებმა ბურთი მეტოქეს დაუთმეს, შედეგად ერთხელ მათი კარი ხარიხამ იხსნა, ტაიმის მიწურულს კი, ნინო ბუხრიკიძესთან უხეში თამაშის გამო, 11-მეტრიანითაც დაისაჯნენ. აქ, თავი ქალთა ეროვნული ნაკრების კარის მცველმა თათია გაბუნიამ გამოიჩინა, რომელმაც 11-მეტრიანი თეონა ბაქრაძეს აუღო. ტაიმი ფრედ, 0-0 დასრულდა. მეორე ტაიმი აქტიურად, უკვე, მასპინძლებმა დაიწყეს და 50-ე წუთზე ტატა მატვეევა იყო გოლთან ახლოს. თუმცა, აქ სვეტლანა გაბელაიამ გამოიჩინა თავი. საბოლოოდ, შეხვედრა ფრედ დასრულდა, გუნდებმა ქულები გაინაწილეს, თუმცა, ამავდროულად მიმდინარე ჩემპიონატში პირველი ქულებიც დაკარგეს. მიუხედავად ამისა, „ლანჩხუთიცა“ და „ნიკე-ლუსოც“ სატურნირო ცხრილში ლიდერობას ინარჩუნებენ.

მიმდინარე ჩემპიონატში მეხუთე თამაში მოიგო „სამეგრელომ“, რომელმაც ამჯერად, ამბროლაურში,  აგრანო ვაჩაძის სახელობის სტადიონზე ადგილობრივი „რაჭა 2020“ დაამარცხა. მასპინძლებს, ანგარიშის გახსნა მე-9 წუთზე, შეეძლოთ, თუმცა, კესო მეტონიძემ 11-მეტრიანი გააცუდა.  ტაიმის მიწურულს, ჯერ იარელის პალასიომ (35') შემდეგ კი, ანა გობრონიძემ (40') გოლებით სტუმრები დაწინაურდნენ. ამას მოჰყვა, 43-ე წუთზე რაჭველთა შემადგენლობიდან გაძევებული ფეხბურთელი. ერთი ფეხბურთელით მეტობაში მყოფმა „სამეგრელომ“, ეს უპირატესობა ხელიდან არ გაუშვა და მეორე ტაიმში სამი უპასუხო გოლი გაიტანა - 47-ე წუთზე მარიამ კაპანაძე, მე-60 და 76-ე წუთებზე კი, ჩისომ ონიევუენიმ დუბლი გაიფორმა. „სამეგრელომ“ 0-5 გაიმარჯვა და 6 ტურის შემდეგ, გათამაშების ლიდერებს, ერთი ქულითღა ჩამორჩება.

სატურნირო ცხრილის მე-4 საფეხურზეა თბილისის „კვარტალი“, რომელმაც თბილისურ დერბიში, „ნორჩ დინამოს უმასპინძლა“ და დიდი ანგარიშით 20-0 დაამარცხა. სფფ-ის ნუცუბიძის პლატოს საფეხბურთო ცენტრში,  ანგარიში მე-5 წუთზე გაიხსნა. მისმა ავტორმა მარიამ ხუციშვილმა ამ შეხვედრაში ექვსი გოლი (5’, 34’, 50’ 76’, 81’, 89’) გაიტანა. ერთი გოლით მეტი გაიტანა თანაგუნდელთა შედარებით, თინათინ ამბალიამ (13’, 15’, 44’, 49’, 69’, 85’, 87’),  ორმა ფეხბურთელმა ლიზი გოგოლაძემ (12’, 83’) და ანი მინაძემ (43’, 62’) დუბლი გაიფორმეს, ხოლო, ნათია ცეცხლაძემ (22’), მარიამ დარჩიაშვილმა (40’) და ნინო პასიკაშვილმა (80’) თითო გოლი გაიტანეს. „კვარტალი“ სატურნირო ცხრილში, 12 ქულითა და ერთით ნაკლები თამაშით, მე-4 ადგილზეა.

თბილისში, სფფ-ის ვარკეთილის საფეხბურთო ცენტრში „ვერემ“, ქუთაისის „მართვეს“ უმასპინძლა და ლიზი ნიშნიანიძის (16’, 48’) დუბლით, 2-0 გაიმარჯვა. 6 ტურის შემდეგ, თბილისელებს 9 ქულა აქვთ და სატურნირო ცხრილში, მე-5 ადგილზე არიან.

ტური კი, თბილისში, ნიუ ვიჟენის სტადიონზე დაიწყო, სადაც „ელიტამ“, ანგარიშით 2-0, „ბათუმი“ დაამარცხა. შეხვედრაში პირველი გოლი, 25-ე წუთზე ნატა კვირკვაიამ გაიტანა და თბილისური კლუბი დააწინაურა. კიდევ ექვს წუთში, მასპინძლები უკვე ორი ბურთით ლიდერობდნენ. 31-ე წუთზე, ბათუმელთა კარი, გამოცდილმა ანა ზაქაიძემ აიღო. პირველი ტაიმი „ელიტამ“ მოიგო, ანგარიში კი, არც მეორე ნახევარში შეცვლილა.

ექვსი ტურის შემდეგ, ქალთა ლიგის ბომბარდირთა დავას 14 გატანილი გოლით თინათინ ამბალია ჩაუდგა სათავეში. „კვარტალის“ ფეხბურთელს, 2-2 გოლით ჩამორჩებიან, თეონა ბაქრაძე (12 გოლი, „ნიკე-ლუსო“) და ეთერ სულაშვილი (12 გოლი, „ლანჩხუთი“).

ქალთა ლიგის გათამაშების მომდევნო, მე-7 ტური, 27 აპრილს არის დანიშნული.