ახალი ამბები
ლიდერებმა ამ ტურშიც მოიგეს, ზეგა ჯგუფში 3, ქვედაში კი 6 ტური რჩება

ქალთა ლიგაში მორიგი სათამაშო ტური იყო. მატჩები, როგორც ზედა, ასევე ქვედა ჯგუფში გაიმართა. ზედა ჯგუფს, კვლავ, „ნიკე-ლუსო“ ლიდერობს და 6 ქულით უსწრებს ოქროს მედლებისთვის კონკურენტ „ლანჩხუთს“. ქვედა ჯგუფში კი, „ბათუმმა“ ქულები დაკარგა, თუმცა, კვლავ სათავეშია და 7 ქულით უსწრებს „რაჭა 2020“-ს, რომელმაც, „რაჭული ტემპით“ აუღო, ძლიერთა ლიგას ალღო.
„ნიკე-ლუსომ“, ზედა ჯგუფის მესამე ტურის მატჩი, სფფ-ის ნუცუბიძის პლატოს საფეხბურთო ცენტრში „კვარტალის“ წინააღმდეგ, სტუმრად ითამაშა და 0-5 გაიმარჯვა. თბილისურ დაპირისპირებაში, მიმდინარე გათამაშების ერთ-ერთი ახალგაზრდული გუნდი, ტოლს არ უდებდა მეტოქეს, რომელსაც ქვეყნის ჩემპიონობამდე სამი ტური აშორებს. ანგარიშის გახსნის შესაძლებლობა „ნიკე-ლუსოს“ მე-4 წუთზე ჰქონდა, თუმცა, ლიზი მწყერაშვილის დარტყმული მიზანს ასცდა. რეალურად, სტუმრებს პირველი გოლის გატანაში მასპინძლები თავად მიეხმარნენ, საქართველოს ბოლო წლების საუკეთესო ფეხბურთელ ქალს თეონა ბაქრაძეს კი, 25-ე წუთზე, ისღა რჩებოდა, გოლი გაეტანა. 37-ე წუთზე, საკუთარ კარში ნათია წოწერიამ ჩაჭრა, „ნიკე-ლუსომ“ კი, პირველი ტაიმი 0-2 მოიგო. მეორე ტაიმში, ბაქრაძემ, კიდევ ერთი გოლი გაიატანა (57’) და ჩემპიონატის დასრულებამდე 3 ტურით ადრე, 34 გატანილი გოლით, მეორეა ბომბარდირთა დავაში. მეორე ტაიმის შუაწელში, 69’ და 72’-ე წუთებზე, „კვარტალის“ კარი ორჯერ სტუმართა გუნდის ლეგიონერმა გაბრიელ და სილვა სანტოსმა აიღო. აქვე უნდა აღვნიშნოთ, რომ სტუმართა გუნდს, სფფ-ის სადისციპლინო და დავების განმხილველი კომიტეტის გადაწყვეტილებით სამი ფეხბურთელი (ნათია დანელია, სალომე გასვიანი და ნინო ბუხრიკიძე) აკლდა.
ამავე მიზეზით, „ლანჩხუთს“ ამ ტურში, ორი ლეგიონერი, მურილო და სმიტი ვერ ეხმარებოდნენ. მოქმედმა ჩემპიონმა კი, მესამე ტურში, ევგრაფი შევარდნაძის სტადიონზე, „ელიტას“ უმასპინძლა და 5-0 გაიმარჯვა. ანგარიში მე-10 წუთზე ჰანა რასელმა გახსნა. მე-17 წუთზე გაბრიელა კამარგოს გოლის შემდეგ, გურულების გუნდი, უკვე 2-0-ს იგებდა და თამაშში, სადაც ფავორიტად, ქვეყნის მოქმედი ჩემპიონი იყო მიჩნეული, სტატუსსაც ამართლებდა და მთელი მატჩი დომინირებდა კიდეც. თბილისში გამართული შეხვედრის მსგავსად, აქაც პირველი ტაიმი იდენტური ანგარიშით დასრულდა. მეორეში, 54-ე წუთზე, ანანო წიქარიძემ გაიტანა მორიგი გოლი. ავტოგოლის გარეშე, ვერც ამ შეხვედრამ ჩაიარა - „ელიტამ“, 64-ე წუთზე, გურულებს ერთი გოლი „აჩუქა“. ამ შეხვედრაში ბოლო, მეხუთე გოლი კი, ეთერ სულაშვილმა გაიტანა 77-ე წუთზე, რომელიც, მიმდინარე სეზონში, ფეხბურთელისთვის, 31-ე გამოდგა.
ფრედ, 1-1 დასრულდა, ქვედა ჯგუფის ლიდერის „ბათუმის“ შეხვედრა თბილისურ „ვერესთან“. თამაშში, რომელიც ქობულეთში, „ჩელე არენაზე“ ჩატარდა, მშრალი პირველი ტაიმის შემდეგ, ანგარიში, 74-ე წუთზე გაიხსნა. გოლი თათია შაინიძემ გაიტანა და მისი გუნდიც, გამარჯვებასთან ახლოს იყო, თუმცა, მასპინძელთა კარში დანიშნული პენალტი, 88-ე წუთზე ზუსტად შეასრულა ანა კულდონაშვილმა.
ჩხოროწყუში, ბონდო პაპასკირის სახელობის სტადიონზე, ადგილობრივი „სამეგრელო“, 0-5 დამარცხდა ქუთაისის „მართვესთან“. ამ გუნდების დაპირისპირება, იმ თვალსაზრისით იყო საინტერესო, რომ „მართვე“, გადათამაშების ზონაშია და ძლიერთა შორის ადგილის შესანარჩუნებლად, მას დარჩენილ ტურებში მაქსიმუმის გაკეთება მოუწევს. თუმცა, იგივე ითქმის „სამეგრელოზე“, რომელიც დღევანდელი მარცხის მიუხედავად, ჯერ ისევ „სამშვიდობოზეა“. ანგარიში კი, ქვედა ჯგუფში, „სამეზობლოში“ მყოფი გუნდების მეოთხე ტურის ამ შეხვედრაში, მე-7 წუთზე მანონი საღარაძემ გახსნა, რომელმაც საბოლოოდ ჰეთ-თრიქიც გაიფორმა - ფეხბურთელმა კიდევ ორი გოლი მე-17 და 54-ე წუთებზე გაიტანა. შეხვედრის ბოლო ათწუთეულში კი, თავი თეონა თოდაძემ (81’) და შეცვლაზე შემოსულმა თამარ მარუაშვილმა (90’) გამოიჩინეს.
ქალთა ლიგის დებიუტანტი „რაჭა 2020“ კი, თბილისში, დიდი ანგარიშით, 0-13 ამარცხებს ამავე ლიგის ერთ-ერთ ყველაზე ძველ თუმცა, მიმდინარე სეზონში, ყველაზე ახალგაზრდა ფეხბურთელებით დაკომპლექტებულ „ნორჩ დინამოს“ რომელიც, ქალთა ლიგის ქვედა ჯგუფის მეორე წრის დამთავრებამდე, 6 ტურით ადრე კვლავ, 0 ქულით არის სატურნირო ცხრილში და მომავალ სეზონში, ქალთა ლიგა 2-ში გადაინაცვლებს. დღეს კი, მათ კარში, 13-დან 11 გოლი კესო მეტონიძემ (15’, 22’, 38’(პ), 45’, 46’, 46’, 64, 75’, 84’(პ), 86’, 89’) გაიტანა. ფეხბურთელს, ამ ტურის შემდეგ, საერთო ჯამში 45 გოლი დაუგროვდა და ის, ქალთა ლიგის ბომბარდირთა დავას უდგას სათავეში. მე-60 წუთზე გაიტანა კესო მეტრეველმა. შეხვედრაში კი, გოლების ათვლა, მასპინძელთა სწრაფი ავტოგოლით, მე-4 წუთზე დაიწყო.
ქალთა ლიგის მომდევნო სათამაშო დღე 11 ოქტომბერს არის ჩანიშნული.