ახალი ამბები
ქალთა ლიგის ზედა ჯგუფის დასრულებამდე ორი ტურით ადრე „ნიკე-ლუსო“ ჩემპიონობას ზეიმობს

საქართველოს ქალთა ლიგის ზედა ჯგუფის გათამაშების დასრულებამდე ორი ტურით ადრე, 2025 წლის ჩემპიონის ვინაობა ცნობილია - თბილისის „ნიკე-ლუსო“ ქალთა ლიგის გამარჯვებულია. თუმცა, რა უპირატესობით მოიგებს ჩემპიონატს თბილისური გუნდი, მხოლოდ 30 ნოემბერს გაირკვევა, მითუმეტეს, რომ სეზონის კონკურენტების წლის ბოლო დაპირისპირება ჯერ კიდევ წინაა, მომდევნო ტურში. მანამდე კი, დღეს ქალთა ლიგის ზედა ჯგუფის მე-4 და ქვედა ჯგუფის მე-5 ტურები გაიმართა.
ზედა ჯგუფში, თბილისის „ელიტასა“ და „ნიკე-ლუსოს“ ორთაბრძოლა, რომელიც ნიუ ვიჟენის სტადიონზე შედგა, როგორც მოსალოდნელი იყო, სტუმართა გუნდის უპირატესობითა და კარნახით წარიმართა. შეხვედრის დაწყებიდან მალევე, თეონა ბაქრაძეს ჰქონდა ანგარიშის გახსნის შესაძლებლობა, მაგრამ, მიმდინარე სეზონში, ერთ-ერთმა საუკეთესო ფეხბურთელმა ვერ გაიტანა. თუმცა, მოგვიანებით „ბაქრამ“ დუბლი შეასრულა (31’, 54’), ისევე, როგორც ზეჰრა ბორაზანჯიმ (23’, 90’). გოლების ათვლა კი, არინა სიტნიკოვამ დაიწყო მე-16 წუთზე. თითო გოლი გაიტანეს გაბი და სილვამ (36’) და სოფიკო ნარსიამაც (75’). „ნიკე-ლუსომ“ კი, მე-4 ტურის ეს შეხვედრა 0-7 მოიგო. ქალთა ლიგის დასრულებამდე 2 ტურით ადრე, თეონა ბაქრაძეს, მიმდინარე სეზონში 36 გოლი აქვს გატანილი.
მოიგო „ლანჩხუთმაც“, რომელიც ამ მომენტისთვის სატურნირო ცხრილში მეორე ადგილზეა და ამ ტურამდე, 6 ქულით ჩამორჩებოდა ლიდერს. გურულებმა, ტურის ეს შეხვედრა თბილისში, სფფ-ის ნუცუბიძის პლატოს საფეხბურთო ცენტრში, „კვარტალის“ წინააღმდეგ გამართეს და საკმაოდ დაძაბულ ორთაბრძოლაში 2-5 მოიგეს. მიუხედავად იმისა, ანგარიში მე-9 წუთზე ანანო წიქარიძის გოლით გაიხსნა, მე-13 წუთზე მასპინძელთაგან, ლიზი კანკიამ გაათანაბრა. სტუმრები, კიდევ ერთხელ მე-20 წუთზე ანასტასია ბოლქვაძის გოლით დაწინაურდნენ. თუმცა, 28-ე წუთზე კანკიამ, კიდევ ერთხელ გაათანაბრა. პირველი ტაიმის შემდეგ საბრძოლო ფრე, 2-2 დაფიქსირდა. თუმცა, მეორე ტაიმში, ორ წუთიან მონაკვეთში, ჩისომ ონიევუენიმ (62’) და ტატა მატვეევამ (65’), „ლანჩხუთი“ ორი ბურთით დააწინაურეს. ზედა ჯგუფის ყველაზე ახალგაზრდულმა გუნდმა, კი, გამოცდილ მეტოქეს მეტი წინააღმდეგობა ვეღარ გაუწია. საბოლოოდ კი, ამ შეხვედრაში წერტილი 73-ე წუთზე ანანო წიქარიძემ დასვა, რომელმაც დუბლი გაიფორმა.
ქვედა ჯგუფში სატურნირო ცხრილის ლიდერმა „ბათუმმა“, გასვლით შეხვედრაში, ამბროლაურში ფრედ, 2-2 ითამაშა, ქალთა ლიგის დებიუტანტ „რაჭა 2020“-თან. აგრანო ვაჩაძის სახელობის სტადიონზე, ანგარიში აჭარულმა გუნდმა გახსნა. 36-ე წუთზე, ანანო ჯოჯუამ გაიტანა. მეორე ტაიმის სტარტზევე, კი, ქალთა ლიგის მიმდინარე გათამაშების გოლეადორმა, კესო მეტონიძემ მორიგი გოლი გაიტანა და ბომბარდირთა დავაში, კიდევ უფრო გაიუმჯობესა მდგომარეობა, ახლა მის ანგარიშზე უკვე, 46 გატანილი გოლია. 84-ე წუთზე, დარინა სელიმბამ, კვლავ დააწინაურა ბათუმელები, თუმცა, რაჭველებმა მსაჯის მიერ კომპენსირებული დროის მე-4 დამატებულ წუთზე, კიდევ ერთხელ გაათანაბრეს. გოლი, გვანცა ძოწენიძის ანგარიშზეა. საბოლოოდ, გუნდებმა ქულები გაიყვეს და სატურნირო ცხრილშიც, გვერდი-გვერდ არიან.
ამავე ცხრილში, მესამე პოზიციაზეა „ვერე“, რომელსაც 25 ქულა აქვს და რომელმაც ქვედა ჯგუფის მე-5 ტურში, მნიშვნელოვანი 3 ქულა აიღო. თბილისში, სფფ-ის ვარკეთილის საფეხბურთო ცენტრში „ვერემ“ ორბურთიანი სხვაობით, 2-0, „სამეგრელო“ დაამარცხა. მასპინძელთაგან დუბლი, სესილი გაბრელიანმა შეასრულა.
ამ ტურში, ქვედა ჯგუფში, ყველაზე უხვგოლიანი ქუთაისში, სფფ-ის ტექნიკურ ცენტრში გამართული მატჩი გამოდგა, რომელშიც „მართვემ“ დიდი ანგარიშით 10-0 „ნორჩი დინამო“ დაამარცხა და დაგეგმილი 3 ქულა აიღო. სწორედ, ამ ქულების სხვაობით, ქუთათურები სატურნირო ცხრილში, „სამეგრელოს“ გაუთანაბრდნენ, თუმცა, ბურთების უკეთესი შეფარდების წყალობით, ჩხოროწყუელებს ადგილი გაუცვალეს და მეოთხე პოზიციაზე გადაინაცვლეს. შეხვედრაში ანგარიში სწრაფი გოლით თამარ მარუაშვილმა (3’, 7’, 25’, 75’) გახსნა და საბოლოოდ, პოკერიც გაიფორმა. ორი ფეხბურთელის, ანა ჯანელიძისა (16’, 52’) და ნატა სამხარაძის (42’, 83’) ანგარიშზე დუბლია. თითო გოლი კი, ნათია ქურციკიძემ (68’) და ბარბარე მანაგაძემ (87’) გაიტანეს.
ქალთა ლიგის ზედა ჯგუფის შეხვედრები 8 ნოემბერს არის დაგეგმილი.
რაც შეეხება ქვედა ჯგუფს, აქ მომდევნო, მე-6 ტური, 19 ოქტომბერს არის ჩანიშნული.